Massacro nella casa della morte
|
C'l artìcul chè 'l è scrit in
Miranduléś |
 Bloodbath at the House of Death | ||
| Massacro nella casa della morte | ||
 John Stephen Hill e la Rocos in na fugùra dal film | ||
| Masèl in dla cà dla mòrt 1984 | ||
|---|---|---|
| Regìa: Ray Cameron | ||
| Scritōr: Ray Cameron • Barry Cryer | ||
| Atōr: Kenny Everett • Vincent Price • Cleo Rocos Pamela Stephenson • Gareth Hunt • Sheila Steafel Don Warrington • John Stephen Hill • David Lodge John Fortune • Graham Stark • Pat Ashton | ||
| Müsica: Mark London • Mike Moran | ||
| Léngua: Ingléś • Tedésc | ||
| Dürä dal film: 92 minüt | ||
| Nasiōṅ: Régn Unî | ||
Massacro nella casa della morte (Masèl in dla cà dla mòrt) 'l è 'n film ad scarésa còmig britànig dal 1984 ad Ray Cameron ch'al 'l à scrit insém a Barry Cryer. 'L è stâ girâ c'n un budget ad dū migliòṅ ad sterlìni a 'l incìrca.
La pelìcula l'è na parudìa ad soquànt film ad scarésa e fantàstic ad chi an lè, cuma Amityville Horror, Shining, Poltergeist - Demoniache presenze, Lo squalo, Guerre stellari, Alien, L'esorcista, Entity, E.T. l'extra-terrestre e Carrie, lo sguardo di Satana, méntar Vincent Price al fà la parudìa dal Vincent Price prutagunìsta di film dla Hammer Film Productions.
Sunt
In na nòt dal 1975 un grup ad mònag satanìsta al s insfìlsa dènt'r a na vila a Headstone Manor in dua di óm 'd afâr e dal ragàsi 'd un camp istìṿ i s pas'n al tèmp a gusàr in di fîṅ 'd stmana. In quàt'r e quàt'r òt i fàn'n un masèl, cupànd daśdòt parsòni. Òt an dòp al guèran britànig al manda su 'l pòst un grup ad siensiâ p'r investigàr su cla cà lè parchè in dal sit a gh'è di ségn ad radiuatività minga tant nurmàł.
I rìvan lè al dutōr Lukas Mandeville (Kenny Everett), èx cirùśìg a Francfòrt da spés cun la sfésa śò e ch'al gira sòp par via dna gamba 'd metàl, la sò asistènta Barbara Coyle (Pamela Stephenson), la rósa 'd cavìi Sheila Finch (Sheila Steafel), ch'la gh'à na valìś pîna 'd scuri e che da śōvna l'iva cupâ sò màdar bigòta (Davilia O'Connor) druànd la telecinéśi parchè chi lē la gh stava sèmp'r adòs e la la mitìva sèmp'r in castîg, John Harrison (John Fortune), dutōr c'n al visi dla butìglia, Henry Noland (John Stephen Hill), un śuvnòt cun na màcia scûra su 'l bras e 'n piruchèṅ in cô, la sò muróśa Deborah Kedding (Cleo Rocos), e na còpia 'd gay, Elliot Broome (Gareth Hunt) e 'l sò amìg ad culōr Stephen Wilson (Don Warrington).
Al fat che lè dènt'r a gh sia quèl ch'a traśa 'l è cunfirmâ cla nòt lè quànd la Barbara la vîṅ viulentàda da 'n spìrit. Subìt chi lē la gh'à terōr ma pò la gh cata gust ma purtròp al fantàśma al s in và dòp ès'r-as fumâ na sigaréta. I abitànt dal pòst, cuma la barìsta 'd un pub (Pat Ashton), 'l ispetōr Goule (David Lodge) e 'n óm òrub piutòst imbranâ (Graham Stark), i fànan tut part in segrét dla séta satanìsta prutagunìsta di masamènt dal 1975 e a i órdan 'd un santòṅ misterióś e sinìstar (Vincent Price), 'n óm ch'al sarvìs Sàtana da sèt-sènt an, i èṅ prònt a far àtar tant c'n i siensiâ parchè i n vōlan minga ch'i vàg'n a naśàr in dla cà dla mòrt cum i la ciàman lōr.
Durànt un rît in di bòsc però al santòṅ al mōr par via dal sò tabàr ch'l iva ciapâ fōg dòp che òṅ 'l iva druâ 'n fulminànt p'r impisàr la léggna da bruśàr ch'l iva mis in sughéta. Subìt dòp i sàltan fóra da na buśa òt doppelgänger di siensiâ ch'i fànan saltàr p'r ària i mémbar dla séta. Chi dópi catìṿ lè i vànan pò in dla vila par cupàr i uriginài.