Mascra da cirùśic
|
C'l artìcul chè 'l è scrit in
Miranduléś |
La mascra da cirùśic, cgnusùda anc cuma mascra par la ghigna o anc sōl cuma mascarìna, 'l è na mascra druàda da mèdag, cirùśic e infarmēr par far in manéra ch'i sò batēr e vìrus i n vàgan minga in gir par gl'ambînt vgnénd fóra p'r al naś e par la bóca c'n al guslìni 'd salìa, cōlp ad tós, starnûd, fiâ e aerosol.
I èṅ druàdi in gènar durànt gl'uperasiòṅ da part dal persunàl sanitàri par prutéś'r i pasiènt parchè i n èṅ minga pinsàdi par salvaguardàr la gint ch'la s la mét ma piutòst tut chi àtar. Inóltar la mascra l'impedìs a la gint ad tucàr-'s al naś e la bóca c'n i dî sénsa pinsàr-ag.
In Cina, Giapòṅ e Curèa dal Sud la gint l'è abituàda a purtàr-l' adòs quànd la và in gir, par rispèt ad chi àtar e par prutéś'r-as da l'inquinamènt dal sità.
Al mascarìni i èṅ da spés fati 'd carta e i vànan butàdi in dal rusc subìt dòp avēr-li druàdi, al cutòṅ al n và minga bèṅ. L'è fàcil ch'i gh'àppian dal pighi, par parmét'r a 'l parsòni 'd giustàr-li da 'l naś a la baśèla, e ch'i sìan fati 'd tri fój schisâ òṅ su c'l àtar. Par tgnir-li sòdi a gh'è da stricàr-li da drē da 'l cô o sinò atàc a gl'uréci cun di elàstic, a dipénd da 'l mudèl.