Martine Brochard

C'l artìcul chè 'l è scrit in Miranduléś

La Martine Brochard (Parì, 2 'd Avrìl dal 1944 - Murlóv, 18 'd Utóbar dal 2025, a s lèś [maʁ.tin bʁɔ.ʃaʁ]] in francéś) l'è stada n'atōra, cantànta, scritōra e persunàǵ televiśìṿ francéś cun sitadinànsa itagliàna.

L'à tacâ la sò caréra da atōra a la fîṅ di an Ssanta dòp avēr studiâ balét clàsic, jazz e recitasiòṅ. Òṅ di sò prim lavōr, piculèṅ a èsar sćèt, 'l è stâ la cumèdia dramàtica Baci rubati (1968) ad François Truffaut. Dòp soquànt àtar rōi cic in Frància, cuma in dal thriller La mano nera dal 1968, la s trasferìs in Itàglia in dua la cata 'n sèrt sucès, tulénd part a pelìculi cuma Milano trema: la polizia vuole giustizia (1973), insém a Luc Merenda, No, il caso è felicemente risolto (1973), drama su la malagiustìsia in du la fà la mujēr 'd Enzo Cerusico, e La governante (1974), trat da na pièce ad Vitaliano Brancati ch'la gh fà vìnsar na Mascra 'd Argìnt.

Sèmp'r in chi an lè la tōś part a 'l còmig Armiamoci e partite! (1971), insém a Franco Franchi e a Ciccio Ingrassia, a 'l drama Storia di una monaca di clausura (1973), in dla part dal sōra Lucia a fiànc dl'Eleonora Giorgi, dla Catherine Spaak, dla Suzy Kendall e dla Giuliana Calandra, a Prigione di donne (1974), in dla part dna śōvna ch'la finìs in parśòṅ dòp che di ragàs i gh'ìvan mis dla dròga in bisàca prima 'd un cuntròl dla pulisìa, e a 'l thriller Gatti rossi in un labirinto di vetro (1975), in dla part dl'amànta 'd John Richardson ch'la s cata a Barcelóna insém a di àtar turìsta americàṅ vitmi 'd un manìag ch'al gh cava via i òć quànd 'l i masa.

Àtar sò film di an Stanta i èṅ stâ al pulisiésc Fango bollente (1975), cun Enrico Maria Salerno e Joe Dallesandro, al drama internasiunàł Una donna alla finestra (1976), a fiànc dla Romy Schneider e 'd Philippe Noiret, al pulisiésc C'è una spia nel mio letto (1976), insém a la Susan Scott, 'l eròtic Il solco di pesca (1976), in còpia cun la Gloria Guida, al western Mannaja (1977), cun prutagunìsta Maurizio Merli, e 'l śal Una spirale di nebbia (1977), in di pagn dn'infarméra ligàda a 'l mèdag Flavio Bucci.

In di an Utànta l'à recitâ in dal film ad scarésa Murder Obsession (Follia omicida) (1981) e in dal biugràfic I miei primi 40 anni (1987), ispirâ a la vita dla Marina Ripa di Meana. In dal 1991 l'à fat la Madame Colette in dal film spurcaciòṅ Paprika ad Tinto Brass in dua la fà lauràr la Debora Caprioglio in dal sò caśèṅ dand-'g al nóm 'd art ad “Paprika”. In dal 1994 l'à laurâ incóra cun Brass in L'uomo che guarda e pò anc in dal thriller L'orso di peluche a fiànc dla Francesca Dellera e 'd Alain Delon. A l'arcurdém anc p'r al film ad Pupi Avati dal 2010 Una sconfinata giovinezza cun la Francesca Neri e Fabrizio Bentivoglio méntar la sò ultma pelìcula l'è stada Il tempo delle mimose in còpia cun Fabio Testi.

La Brochard l'à laurâ anc in televiśiòṅ in di an Utànta in prugrama cuma Gino Bramieri Show, Il tastomatto e Per chi suona la campanella e in série televiśìvi in du a psém nutàr I ragazzi della 3ª C, I promessi sposi, Non lasciamoci più, Incantesimo, Una donna per amico, La squadra, Vento di ponente, Il bello delle donne, Il sangue e la rosa, Il peccato e la vergogna e Il bello delle donne... alcuni anni dopo.

A teàtar l'è stada impgnàda in òvri ad Gustave Flaubert, Molière, Ray Cooney, Jean Cocteau e 'd Igor Stravinsky. Da scritōra l'à fat vgnir fóra soquànt lìb'r ad fòli. Cuma cantànta a 'rcurdém al sò sìngul dal 1977 Una Donna e Una Donna e 'l àlbum La vie continue dal 2003.