Marie Prevost
|
C'l artìcul chè 'l è scrit in
Miranduléś |
.jpg)
La Mary Bickford Dunn, cgnusùda méj cuma Marie Prevost ma dal vòlti anc cuma Mary Prevost o Marie Provost (Sarnia, 8 ad Śnar dal 1896 - Hollywood, 23 ad Śnar dal 1937, a s lèś [məˈriː preɪˈvoʊ] in ingléś), l'è stada n'atōra canadéśa, famóśa a i tèmp dal cìnema mut. La gh'à na stéla in dla Hollywood Walk of Fame.
In dla sò caréra, da 'l 1915 a 'l 1936, 'l à girâ 127 film e laurâ cun di regìsta cuma Ernst Lubitsch, Frank Capra e Cecil B. DeMille, tulénd part a pelìculi cuma Salomè (1919), Matrimonio in quattro (1924), Baciami ancora (1925), Su in camera di Mabel (1926), La diga della morte (1929), a fiànc dla Ginger Rogers, Femmine di lusso (1930), insém a la Barbara Stanwyck, Debito d'odio (1930), cun prutagunìsta la Joan Crawford, e I milioni della manicure (1935) cun la Carole Lombard.
Dòp la mòrt ad sò màd'r in 'n incidènt in màchina in dal 1926, l'à patî di brut mumènt andànd in depresiòṅ e tacànd a bévar. Dòp avēr divursiâ da 'l sò secónd marè la s è anc catàda in buléta sparàda parchè l'è stada tajàda fóra da 'l cìnema sunôr avénd anc mis sù soquànt chilo, cun la Warner Bros. ch'la n gh'à minga arnuvâ 'l cuntràt. A dita di prudutōr la gh'iva di prubléma cun la disiòṅ e anc la sò vōś ch'la n andàvia minga tant bèṅ.
L'è mòrta da par lē in miśèria a quarànt'an, puòsa e patìda parchè la s éra ardùta a magnàr pôc. A dar 'l alàrm i èṅ stâ i sò vśèṅ 'd cà ch'i n la vdìvan piò ma ch'i sentìv'n al sò caṅ bajàr da drē da 'l us. Darènt a 'l sò còrp, c'n al gambi ruśgàdi da 'l caṅ, la pulisìa l'à catâ na trata 'd sènt dòlar che la Prevost l'iva da dar indrē a la sò culéga Joan Crawford ch'la i gh'iva dâ in prèst parchè sénsa più bèsi. La Crawford la gh'à pagâ pò 'l funeràł andànd-ag pur insém a Clark Gable, a Wallace Beery e a la Barbara Stanwyck.
Culegamènt estéran
Àtar prugèt
Wikimedia Commons contiene file multimediali su Marie Prevost
