Maria regina di Scozia
|
C'l artìcul chè 'l è scrit in
Miranduléś |
 Mary Queen of Scots | ||
| Maria regina di Scozia | ||
 Lowden e la Ronan in na figùra dal film | ||
| Marìa regìna dla Scòsia 2018 | ||
|---|---|---|
| Regìa: Josie Rourke | ||
| Scritōr: Beau Willimon • John Guy | ||
| Atōr: Saoirse Ronan • Margot Robbie • Joe Alwyn Jack Lowden • David Tennant • Gemma Chan Guy Pearce • Brendan Coyle • Martin Compston James McArdle • Ismael Cruz Córdova • Ian Hart | ||
| Müsica: Max Richter | ||
| Léngua: Ingléś • Francéś • Gaèlic | ||
| Dürä dal film: 124 minüt | ||
| Nasiōṅ: Régn Unî • Stat Unî | ||
Maria regina di Scozia (Marìa regìna dla Scòsia) 'l è 'n film biugràfic britànig e americàṅ dal 2018 dla Josie Rourke ch'al cònta la vita dla Marìa Stuàrda, regìna dla Scòsia da 'l 1952 a 'l 1567 e regìna 'd Frància par matrimòni da 'l 1559 a 'l 1560. La pelìcula l'è stada candidàda a dū Prèmi Òscar, p'r i custùm e p'r al truc.
Custâ vint-sinc migliòṅ ad dòlar, al film al 'n à pò muciâ sù quarànta-sèt.
Sunt
[mudéfica la surzéia]A la mòrt dal rè 'd Frància Fransésc II, che lē l'iva spuśâ tri an prima a séd'ś quànd lò al gh 'n iva quatórdas, la Marìa Stuàrda (Saoirse Ronan) dal caśâ di Stuart la tórna in Gran Bretàgna par regnàr cuma sò dirìt su la Scòsia ch'in cal méntar 'l éra cmandàda da 'n regènt, al sò fradlàstar Jàcum Stewart (James McArdle), cònt ad Moray. Chi lò al gh'éra nemìg, cumpàgn a i lord scuséś, anc parché chi lē l'éra catòlica, carsùda in Frància da quànd l'éra putìna, méntar lò prutestànt.
In chi an lè in Inghiltèra a cmandàva na sò cuśìna a la luntàna, la Śabèta I (Margot Robbie) dla dinastìa di Tudor, ch'l'éra scampàda a 'l varōl ch'al gh'iva però lasâ di brut castròṅ in ghigna e pôc cavìi in cô. Anch chi lē la gh'éra cóntar p'r al stés mutìṿ ma anc parchè l'éra puta e sénsa fiōi e dònca a la sò mòrt 'l éra fàcil ch'la Marìa Stuàrda la psis dvintàr regìna anc 'd Inghiltèra e Irlànda, specialmènt dòp al sò matrimòni c'n al lord ingléś Henry Darnley (Jack Lowden), catòlig e Stuart anc lò, caśâ cun di dirìt più grand su la curóna. Insém a 'l sò cunsiliēr William Cecil (Guy Pearce), baròṅ Burghley, la strulga di piàṅ par farmàr-la.
Dòp ch'la Marìa l'iva abû 'n fiōl ciamâ Jàcum I da sò marè, dal vòlti imbariàg e viulènt sèg, chi lò al vîṅ bcâ a lèt cun Davide Rizzio (Ismael Cruz Córdova), un sunadōr piemuntéś dla cōrt dimóndi amìg dla regìna. A séguit dna traplàda fata da i lord insém a 'n Darnley sóta ricàt, Razzio al vîṅ masâ a scurtlàdi davànti a i òć dla regìna ch'la 'l vliva prutèśar. I lord i gh'ìv'n in mènt ad far-la pasàr davànti a 'l pòpul cuma na purcùsa nimàla ch'la gh'iva dal stòri cun di àt'r óm, anc mandâ da Róma cuma Razzio. Quànd la Marìa la vîṅ a savēr che sò marè 'l iva firmâ 'l pat dal masamènt anc lò, la 'l casa via sénsa però divursiàr. Darnley al và a vìvar da 'n atra banda par pò èsar masâ durànt 'n atintâ subìt dòp.
In séguit i lord scuséś i custrìnśan prima la regìna a spuśàr òṅ di suo, James Hepburn duca 'd Bothwell (Martin Compston), e pò a abdicàr in favōr ad sò fiōl ch'al gh'éra stâ purtâ via. La regìna la dmanda ajùt a la Śabèta ch'la la tōś sèg a 'l sò cundisiòṅ in Inghiltèra, tgnénd-la sémpar cuntrulàda, par pò far-la masàr soquànt an dòp, cun l'acùśa 'd tradimènt.