Margot Kidder

C'l artìcul chè 'l è scrit in Miranduléś

La Margaret Ruth Kidder, cgnusùda méj cuma Margot Kidder (Yellowknife, 17 'd Utóbar dal 1948 - Livingston, 13 ad Maǵ dal 2018, a s lèś [ˈmɑːrɡoʊ ˈkɪdər] in ingléś), l'è stada n'atōra canadéśa cun sitadinànsa americàna, famóśa p'r avēr fat la part dla Lois Lane, persunàǵ di fumét dla DC Comics, in Superman (1978), Superman II (1980), Superman III (1983) e Superman IV (1987), laurànd cun Christopher Reeve, Marlon Brando e Gene Hackman.

Uriginària di Teritóri dal Nòrd-Òvest, la Kidder l'à tacâ na caréra da atōra girànd un quàlc telefìlm quànd l'è andàda a star a Turònt a la fîṅ di an Ssanta. L'à pò fat al sò debùt a 'l cìnema in dal 1969, tulénd part a la cumèdia Chicago Chicago cun prutagunìsta Beau Bridges, méntar quàt'r an dòp l'è stada prutagunìsta dal thriller Le due sorelle ad Brian De Palma. In dal 1974 a l'ém vista in dal film ad scarésa Black Christmas - Un Natale rosso sangue a fiànc ad John Saxon e pò 'l an dòp in d'l aventuróś Il temerario insém a Robert Redford e a la Susan Sarandon.

In dal 1975 l'à girâ la cumèdia dramàtica Novantadue gradi all'ombra, faghénd la muróśa ad Peter Fonda e spuśànd pò 'l an dòp al regìsta Thomas McGuane, anc s'al matrimòni 'l è durâ 'n an e basta. Dasfurtunâ i èṅ stâ anc i sò matrimòni cun 'l atōr John Heard (siē dè) e c'n al regìsta francéś Philippe de Broca (da 'l 1983 a 'l 1984). Dòp la pelìcula Superman l'à tòlt part a 'l film ad scarésa Amityville Horror (1979), in dua la ciàma in ajùt pàdar Delaney (interpretâ par Rod Steiger) par banadìr la cà maladìda in du l'è andàda a star insém a sò marè James Brolin e a i sò tri fiōi.

Dòp avēr laurâ in dal 1983 cun Peter O'Toole in dla versiòṅ televiśìva ad Pigmajòṅ, cumèdia ad George Bernard Shaw ispiràda a 'l mît 'd Uvìdi, l'à tacâ a lauràr a teàtar cuma in dl'òvra I munòlug dla vagìna dl'Eve Ensler. In dal 1990 la gh'à abû 'n incidènt in màchina ch'al l'à tgnuda férma par dū an.

Fra i sò àtar film fat in séguit a 'rcurdém al western Maverick (1994), cun prutagunìsta Mel Gibson e la Jodie Foster, al drama Delitto e castigo (2002), insém a Crispin Glover, la Vanessa Redgrave e John Hurt, al thriller The Last Sign (2005), a fiànc dl'Andie MacDowell e 'd Tim Roth, la pelìcula ad scarésa Halloween II (2009) ad Rob Zombie e 'l śal The Red Maple Leaf (2016) in du l'à incruśâ James Caan, Martin Landau, Paul Sorvino, la Mira Sorvino e Daniel Baldwin.

La Kidder l'à laurâ dimóndi da spés in série televiśìvi catànd spasi in telefìlm cuma Mod Squad, i ragazzi di Greer, Un vero sceriffo, Baretta, Switch, I viaggiatori delle tenebre, I racconti della cripta, Street Legal, La signora in giallo, Le avventure di Black Stallion, Io e mio fratello, The Hunger, Il tocco di un angelo, PSI Factor, Nikita, Law & Order - Unità vittime speciali, Smallville, The L Word e R. L. Stine's The Haunting Hour.

A la Kidder a gh'è stâ catâ un distùrub bipulàr in dal 1996 quànd par na criśi maniacàla, finìda pò su i giurnài, la pulisìa 'd Los Angeles la l'à catàda nûda in un bòsc sénsa soquànt dènt e pîna 'd ànsia. Dòp èsar stada purtàda in na clìnica psichiàtrica, la Kidder l'à dit 'd avēr pasâ chi but mumènt lè (ciamâ da lē “i sò móstar”) cun 'l ajùt dal psichiàtra Abram Hoffer e dla sò madśìna naturàla.

L'è mòrta a ssanta-nóṿ an in dla sò cà in Muntàna, dòp avēr tòlt un mix ad madśìni e alcol, dand-'s acsè la mòrt.