Mae West
|
C'l artìcul chè 'l è scrit in
Miranduléś |
La Mary Jean West, cgnusùda méj cuma Mae West (New York, 17 'd Agóst dal 1893 - Los Angeles, 22 ad Nuvémbar dal 1980, a s lèś [ˌmeɪ ˈwest] in ingléś), l'è stada n'atōra e star dal musical americàna. La gh'à na stéla in dla Hollywood Walk of Fame.
La West l'è stada una dal primi sex symbol dal mónd dal cìnema anc s'l'à tacâ tard a far cal mistēr lè ch'la gh'iva dagnóra quarànt'an. Prima la lauràva a teàtar faghénd di spetàcui scrit da lē, cuma “Sex” dal 1926 ch'l'iva fat scàndal dabòṅ in alóra tant ch'la pulisìa la l'iva arestàda a teàtar.
La gh'iva 'l sèns d'l umurìśum e a gh piaśìva dimóndi far dal batùdi a dópi sèns, esénd franca e śbcada, druànd al sò còrp e 'l sò curvi par stusigàr. A 'l cìnema la scrivìva lē i sò tèst e la sarnìva anc i atōr óm ch'i gh'ìvan da recitàr sèg.
I sò prim film la i à girâ in di an Trénta par la Paramount Pictures cuma la cumèdia Lady Lou dal 1933 ambintàda in dla New York dla fiṅ dal XIX sécul in dua la fava na cantànta 'd saloon, insaplàda in un gir ad prustitusiòṅ, che pò la spuśarà 'n agìnt ad pulisìa, un śōvan Cary Grant.
In di an Quarànta l'è pasàda a lauràr par la Universal Pictures, tacànd cun la cumèdia western Mia bella pollastrella, in còpia cun W.C. Fields, par pò dar un taj a la sò caréra dòp al 1943, turnànd a recitàr a teàtar.
In di an Stanta l'à fat un pìcul ritór'n a 'l cìnema recitànd da vècia in dū pelìculi: Il caso Myra Breckinridge (1970), cun la Raquel Welch e la Farrah Fawcett, e Sextette, cun Timothy Dalton e Tony Curtis e 'l rockstar Ringo Starr e Alice Cooper.
'L American Film Institute al l'à misa a 'l 15śum pòst in dla lista dal stéli più grandi dla stòria dal cìnema.
Filmugrafìa
[mudéfica la surzéia].jpg)
- 1932 - Night After Night, regìa 'd Archie Mayo
- 1933 - Lady Lou (She Done Him Wrong), regìa ad Lowell Sherman
- 1933 - Non sono un angelo (I'm No Angel), regìa ad Wesley Ruggles
- 1934 - Belle of the Nineties, regìa ad Leo McCarey
- 1935 - Goin' To Town, regìa 'd Alexander Hall
- 1936 - Annie del Klondike (Klondike Annie), regìa ad Raoul Walsh
- 1936 - Go West Young Man, regìa 'd Henry Hathaway
- 1937 - Every Day's A Holiday, regìa 'd A. Edward Sutherland
- 1940 - Mia bella pollastrella (My Little Chickadee), regìa 'd Edward F. Cline
- 1943 - The Heat's On, regìa ad Gregory Ratoff
- 1970 - Il caso Myra Breckinridge (Myra Breckinridge), regìa ad Michael Sarne
- 1978 - Sextette, regìa ad Ken Hughes
Culegamènt estéran
[mudéfica la surzéia]Àtar prugèt
[mudéfica la surzéia]
Wikimedia Commons contiene file multimediali su Mae West
