M'el Dowd
|
C'l artìcul chè 'l è scrit in
Miranduléś |
La Mary Ellen Dowd, cgnusùda méj cuma M'el Dowd (Chicago, 2 ad Favràr dal 1933 - Tarrytown, 26 ad Setémbar dal 2012), l'è stada n'atōra e cantànta americàna. L'éra uriginària d'l Illinòis ma l'à pasâ la sò giuinésa in d'l Iowa.
Dòp avēr studiâ recitasiòṅ a 'l Goodman Theatre ad Chicago, la Dowd l'è andàda a star a New York par recitàr a teàtar a la fiṅ di an Sinquànta, specialmènt in òvri ad William Shakespeare, faghénd al part dla Lady Macbeth, dla Titania, dla Portia e dla Lady Capuleti. In dal 1958 l'à fat al sò debùt a Broadway faghénd la fata Murgàna in dal musical Camelot a fiànc ad Richard Burton e dla Julie Andrews.
A 'l cìnema a l'ém vista in dal drama 'd Alfred Hitchcock dal 1956 Il ladro, in dua la fava l'infarméra ch'la jutàva la pòvra Vera Miles, in dal thriller dal 1986 F/X - Effetto mortale, a fiànc ad Bryan Brown, e in dal drama 'd Alan J. Pakula dal 1989 Ci penseremo domani, in dua l'à laurâ cun Jeff Bridges e la Farrah Fawcett.
In televiśiòṅ a l'arcurdém p'r avēr recitâ in La parola alla difesa, Flipper, The Adams Chronicles, La signora in giallo, Così gira il mondo, Squadra emergenza e Law & Order - I due volti della giustizia.
L'è mòrta a stanta-nóṿ in dla sò cà darènt a New York. La s éra spuśàda in dal 1962 c'n al risturadōr francéś Henri G. Eudes avénd sèg un fiōl ciamâ Richard.
Filmugrafìa
[mudéfica la surzéia]
- 1956 - Il ladro (The Wrong Man), regìa 'd Alfred Hitchcock
- 1957 - Questa notte o mai (This Could Be the Night), regìa ad Robert Wise
- 1971 - The 300 Year Weekend, regìa ad Victor Stoloff
- 1973 - Duty Bound, regìa ad Martin Hoade - Film TV
- 1986 - F/X - Effetto mortale (F/X), regìa ad Robert Mandel
- 1989 - Ci penseremo domani (See You in the Morning), regìa 'd Alan J. Pakula