Loa loa

Da Wikipedia.
C'l artìcul chè 'l è scrit in Miranduléś Emiliàn
Al bêg Loa loa in dal sangṿ
Un cirùśig al tira via 'n bêg da 'n òć
Un vérum 'd 'l òć grand
Soquànt bêg Loa loa a 'l micruscòpi


La Loa loa l'è 'n bêg nematôd parasìta d'l óm e 'd àtar mamìfar grand ch'al viṿ specialmènt in Àfrica e in Ìndia. In gènar 'l è anc ciamâ vérum d'l òć parchè al gh finìs da spés esénd che là al cata dla ròba bòna da magnàr par lò. S'a n s fà minga quèl in présia a s và in a risć 'd armàgnar òrub.

'L è òṅ di bêg, insém a 'l Uncucérca vòlvulus e a la Munsunèlla streptusérć, ch'al fà vgnir un brut mâł ciamâ „Filariàśi sót-pèla“. Al sò larvi i èṅ ciamàdi micrufilàri.

Descrisiòṅ

Al còrp ad chi vérum chè 'l è fat da 'n cô, da 'n còrp e da na cóa. I masć in gèn'r i èṅ lung da i vint a i trénta-quàtar milimétar e larg fra i tarśènt-sinquànta e i quatarsènt-trénta μm. Al fémni i èṅ più grandi parchè i pōlan rivàr a sinquànta milimétar ad lunghésa par 425 µm ad larghésa.

La Loa loa la s móṿ bèṅ sót-pèla faghénd-as strada magnànd al gras ch'la s cata davànti ma la s cùcia anc in dal sangṿ, in di tesû e in dal sistéma linfàtig. Quànd al bêg 'l armàgn férum 'l è 'l mumènt ch'al fà più mâł dònca 'l è méj, p'r a n sintìr briśa dulōr, ch'al girìs lìbar.

Al sò ciclo 'd vita al taca quànd 'n insèt, na mósca, 'n tavàṅ o na sinsàla, la mòrśga 'n óm infèt. Al bêg al finìs in dal sò budèli in dua al taca a far dal larvi ch'i crésan e pò quànd i èṅ madùri i finìs'n incóra in dla sò bóca acsè i èṅ prònti par turnàr in d'l óm durànt al past a vgnir. In dal còrp umàṅ al larvi i dvèntan di vér'm adûlt.

Par tiràr via chi bêg lè a gh'è da far 'n intervènt chirùrgic e pò tōr di fàrmag.

Culegamènt estéran

Àtar prugèt