Libera
C'l artìcul chè 'l è scrit in Miranduléś |
Libera | ||
La Iaia Forte in na figùra dal film | ||
Libra 1993 | ||
---|---|---|
Regìa: Pappi Corsicato | ||
Scritōr: Pappi Corsicato | ||
Atōr: Iaia Forte • Cristina Donadio • Ciro Piscopo Ninni Bruschetta • Enzo Moscato • Cinzia Mirabella Tosca D'Aquino • Vincenzo Peluso • Paola Iovinella Pina Cipriani • Manrico Gammarota • Fiorenzo Serra | ||
Müsica: Adamo • Enzo Moscato Tony Riccio • Sergio Bruni | ||
Léngua: Itagliàṅ • Napulitàṅ | ||
Dürä dal film: 83 minüt | ||
Nasiōṅ: Itàglia |
Libera (Libra) l'è na cumèdia itagliàna dal 1993 ad Pappi Corsicato, chè a 'l sò debùt. L'è stada giràda a Nàpuli.
A 'l inìsi al film 'l éra fat sōl da 'l curtumetràǵ finàł girâ in dal 1991. Sōl dòp al regìsta, ex asistènt ad Pedro Almodóvar in dal film Légami!, al gh 'n à śuntâ àtar dū par dar vita a 'n film a epiśòdi preśentâ pò cun sucès a 'l Fèstival ad Berlîṅ dal 1993. La pelìcula l'à vins anc un Nàstar 'd Argìnt par l'òpra prima.
Sunt
Prim epiśòdi: Aurora
L’Aurora (Iaia Forte) l'è na dóna napulitàna ch'la fà la mantgnùda esénd ch'l'à spuśâ p'r interès al ric Sandro, òṅ ch'l è sèmpar via par lavōr e ch'al gh mét anc i còran. La dóna la s pasa 'l tèmp śugànd a 'l carti c'n al sò amìghi e andànd in céśa da cal chichèṅ ad don Arcangelo (Enzo Moscato). Un dè la ciàma di muradōr par giustàr quèl in cà e in mèś a i ragàs la véd ch'a gh'è anc un sò vèć muróś, Pistoletta (Ninni Bruschetta). Chi lò al vrév turnàr sèg, ma sōl cuma amànt, e al gh fà n'inserenàda 'd nòt par cunvins'r-la ma a n gh'è gnint da far. In cal méntar Sandro al scapa a 'l èstar cun tut i bèsi, esénd lò 'n trufadōr ad mistēr, e Pistoletta al gh vōda la cà. A l’Aurora a n gh armàgn gnint àtar da far che piànśar da par lē par strada.
Secónd epiśòdi: Carmela
Sebastiano (Ciro Piscopo) 'l è 'n ragàs napulitàṅ ch'l à péna finî ad scuntàr la sò péna in rifurmatòri. Adès al viṿ a cà ad sò màdar, la Carmela (Cristina Donadio); sò pàd'r invéci al n 'l à mai cgnusû. Par rigàr drit Sebastiano al próa a catàr-'s un mistēr faghénd al barbēr ma al n è briśa bòṅ. Un dè la sarta dal piàṅ ad sōvar, la “cougar” Miriam (Cinzia Mirabella), la gh buta i òć adòs vlénd purtàr-'s-'l a lèt ma lò al gh diś ad vansàr anc parchè al sò interès 'l è tut p'r Enzo (Vincenzo Peluso), un śuvnòt ch'al vénd dal caséti muśicàli ad cuntrabànd par strada. Turnànd a cà Sebastiano al fà a mènt a na foto in dua a s véd lò da piculèṅ insém a i sò genitōr e al capìs la véra: la Carmela na vòlta 'l éra sò pàdar ch'l à cambiâ sès dòp che sò màdar l'éra mòrta.
Tèrs epiśòdi: Libera
La Libera (Iaia Forte) e sò marè Tanino (Manrico Gammarota) i gh'aṅ n'edìcula in dal quartēr pòvar ad Secondigliano a Nàpuli. Méntar però la dóna la s dà da far dimóndi par purtàr avànti la baràca, sò marè 'l è 'n bòṅdagnìnt patintâ ch'al s dà malâ da spés par gratàr-'s al cûl méj e par far i còran a sò mujér méntar lē l'è via. Un dè la Libera la decìd ad piasàr na caméra in dla cambra da lèt par tōr śò qvél ch'al fà cal purcùs ad Tanino durànt al dè e acsè la véd quànt lò al gh dà dèntar cun cal dóni. A sucéd pò che par śbali la vénd la caséta c'n i filmâ ad sò marè a 'n pugnetàr che quànd al la véd 'l armàgn dimóndi cuntènt e al gh in dmanda da gl'atri cumpàgni. La Libera la taca acsè a muciàr sù dimóndi bèsi vindénd i filmâ pòran ad Tanino sénsa che lò al sàppia gnint.