Les Amants réguliers
|
C'l artìcul chè 'l è scrit in
Miranduléś |
 Les Amants réguliers | ||
 Louis Garrel in na figùra dal film | ||
| Gl'Amànt regulàr 2005 | ||
|---|---|---|
| Regìa: Philippe Garrel | ||
| Scritōr: Philippe Garrel Arlette Langmann • Marc Cholodenko | ||
| Atōr: Louis Garrel • Clotilde Hesme Julien Lucas • Mathieu Genet • Nicolas Bridet Eric Rulliat • Rebecca Convenant • Marc Barbé Maurice Garrel • Nicolas Maury • Brigitte Sy | ||
| Müsica: Jean-Claude Vannier | ||
| Léngua: Francéś | ||
| Dürä dal film: 183 minüt | ||
| Nasiōṅ: Frància | ||
Les Amants réguliers (Gl'Amànt regulàr) 'l è 'n film dramàtic francéś in biànc e négar dal 2005 scrit e dirèt par Philippe Garrel su la vita ad soquànt śōvan rivulusiunàri e bohémien a i tèmp dal Maǵ francéś, an dla cuntestasiòṅ dal '68. Al dura da piò ad tré óri e la versiòṅ distribuìda in Itàglia la gh'à i sótatìtui.
Preśentàda a la 62śma edisiòṅ dal Fèstival ad Venèsia, la pelìcula l'à vins al Lèòṅ 'd Argìnt par la regìa e 'l prèmi Osella 'd Òr par la futugrafìa ad William Lubtchansky.
Sunt
[mudéfica la surzéia]François Dervieux (Louis Garrel) 'l è 'n puéta śōvan pariśèṅ, cuntestatàri dla sucièta dal tèmp e dal putēr. Insém a 'n grup 'd amìg arvèrs cuma lò al tōś part a i muimènt dal Maǵ francéś dal 1968, tirànd dal bómbi molotov, faghénd dal baricàdi, bruśànd la bandéra francéśa e miténd-as cóntar la pulisìa. Esénd anc cuntràri a far al militàr, al finìs a prucès bcand-as siē méś ad parśòṅ.
Finî e śmursâ i fōg dla cuntestasiòṅ, cun la rivulusiòṅ ch'a n gh'è mai stada, François al taca a frequentàr la cà 'd Antoine (Julien Lucas), un ragàs ric ad famìja ch'al s pōl parmétar 'd a n lauràr minga, e 'd sò cuśèṅ śbiangśèṅ e pitōr Luc (Nicolas Bridet), insém a di àt'r amìg cuma Jean-Christophe (Eric Rulliat), Nicolas (Mathieu Genet) e Gauthier (Nicolas Maury). Insém i s pàs'n al tèmp dascurénd 'd art e 'd pulìtica pipànd hashish e ópi e tacànd dal relasiòṅ cun dal śōvni ch'i la pénsan cumpàgn a lōr. François al s mét cun la Lilie (Clotilde Hesme) ch'la gh'à di urìgini itagliàni e la pasiòṅ par la scultùra.
I dū i s vōlan bèṅ ma chi lē la vrév na quàlc vòlta andàr a lèt anc cun di àt'r óm e François al gh al parmét. Un dè la Lilie la cgnós 'n artìsta ciamâ Jean (Marc Barbé) ch'al gh śibìs ad lauràr cuma mudèla p'r i sò quàdar e pò 'd andàr via sèg a New York. Al grup a dir dabòṅ al n eśìst piò anc parchè Antoine al decìd 'd andàr a star in Maròc saénd ch'la pulisìa la i tîṅ 'd òć.
Armàś da par lò, cun la sò muróśa vulàda in di Stat Unî, François al tōś na madśìna e pò al mōr.