Le idi di marzo (film)
|
C'l artìcul chè 'l è scrit in
Miranduléś |
 The Ides of March | ||
| Le idi di marzo | ||
.png) Paul Giamatti in na figùra dal film | ||
| Gl'idi 'd mars 2011 | ||
|---|---|---|
| Regìa: George Clooney | ||
| Scritōr: Beau Willimon • George Clooney Grant Heslov • Beau Willimon | ||
| Atōr: Ryan Gosling • Philip Seymour Hoffman George Clooney • Paul Giamatti • Marisa Tomei Evan Rachel Wood • Gregory Itzin • Jennifer Ehle Max Minghella • Jeffrey Wright • Yuriy Sardarov Maya Sayre • Rachel Maddow • Michael Mantell | ||
| Müsica: Alexandre Desplat | ||
| Léngua: Ingléś | ||
| Dürä dal film: 101 minüt | ||
| Nasiōṅ: Stat Unî | ||
Le idi di marzo (Gl'idi 'd mars) 'l è 'n film dramàtic americàṅ dal 2011 ad George Clooney trat da n'òvra teatràla 'd Beau Willimon.
La pelìcula, preśentàda a 'l 68śum Fèstival ad Venèsia, l'è stada candidata a i Prèmi Òscar par la senegiadùra minga uriginàla, ólt'r a èsar stada numinàda a quàtar Golden Globe. In tut l'à muciâ sù da piò ad stanta-siē migliòṅ ad dòlar a frònt 'd un cóst ad dód'ś e mèś.
Sunt
[mudéfica la surzéia]Stephen Meyers (Ryan Gosling) 'l è 'n śōvan dimóndi brâṿ ch'al lavóra cuma adét a la stampa par la campàggna presidensiàla dal guvernadōr dla Pennsylvania Mike Morris (George Clooney) in cumpetisiòṅ in dal primàri dal partî demucràtic c'n al senadōr d'l Arkànsas Ted Pullman (Michael Mantell). I dū i èṅ praticamènt para e a sarév dimóndi impurtànt vìns'r in Ohio ma in tut al manéri a gh'è sèmpar da śugàr la carta dal senadōr dla Carulìna dal Nòrd Franklin Thompson (Jeffrey Wright) ch'al gh'à 'n pachét ad vōt deciśìṿ par la cursa finàla.
Fra gl'eletōr demucràtic, i sundàǵ dal stat dal midwest i dànan Morris avànti ma, esénd cal primàri lè avèrti, a gh'è 'l perìcul che dimóndi republicàṅ i pòs'n andàr a vutàr par Pullman ch'in dla cursa presidensiàla cónt'r i cunservadōr 'l è più débul, specialmènt fra gl'indipendènt.
Dòp un dibàtit, Meyers al vîṅ cuntatâ da 'l cap dla campàggna 'd Pullman, Tom Duffy (Paul Giamatti), par 'n incóntar segrét. Prima 'd andàr-ag, Stephen al vrév èsar ciamâ a 'l telèfun da 'l respunsàbil dla campàggna 'd Morris, Paul Zara (Philip Seymour Hoffman), par dir-'g-al ma pò al gh và listés. Duffy, ch'al cgnós la bravitù ad Meyers, al gh admànda 'd pasàr a lauràr par lōr, anc par psēr cgnósar la strategìa dal rivàł, ma 'l śōv'n al gh diś ad nò, che lò al gh'à di prinsìpi e ch'l è da la banda 'd Morris, e pò al n vōl minga far dal traplàdi cum i èṅ sòlit far i republicàṅ, che lò 'l è difarènt. Duffy al gh rispónd ch'al sò utimìśum al n durarà minga, e che lò 'l è prònt a śugàr spòrc, ch'l à bèla vist dimóndi demucràtic armàgn'r a 'l pâł vlénd cumbàtar c'n i guànt ad vlud stand a 'l règhli. Quànd pò Zara 'l al ciàma par savēr cuśa 'l vlis, Meyers al fà finta 'd gnint, dgénd ch'l iva bèla risòlt.
Durànt la campàggna, Meyers al taca na relasiòṅ cun la stagìsta Molly Stearns (Evan Rachel Wood), fiōla dal presidènt dal cumitâ nasiunàł demucràtic Jack Stearns (Gregory Itzin). Na nòt, mént'r i èṅ a lèt insém, al rispónd par śbali a 'l telefunèṅ ad lē, vgnénd a savēr ch'a ciamàr-la 'l éra Morris in parsòna, e ch'i dū i ìvan fat sès insém durànt na tapa in Iowa soquànti stmani prima. Cuma s'a n fus minga abàsta, la ragàsa l'è anc insìnta 'd lò, un quèl che, s'al saltìs fóra, al prév bruśàr la campàggna dal guvernadōr, e ch'la n pōl minga vudàr al sac cun sò pàdar parchè 'l è cristiàṅ e al n la turév minga bèṅ. Meyers al cata i bèsi par far-la aburtìr ad nascòst ma pò al gh admànda 'd a n far-as più védar, ch'l'è 'n perìcul par la campàggna.
In séguit Meyers, p'r ès'r unèst e sćèt, al cònta a Zara ch'al s éra vist cun Duffy e che lò 'l è prònt a śibìr a 'l senadōr Thompson la puśisiòṅ ad segretàri 'd Stat che tant al vōl, garanténd-'s acsè la nomination a presidènt p'r i demucràtic.
Al ròbi i s fànan pēśi quànd la giurnalìsta dal New York Times Ida Horowicz (Marisa Tomei) l'al ciàma par dir-ag ch'la sà tut dal sò incóntar cun Duffy, qualchidòṅ al gh 'l à dit ad nascòst, e l'è prònta a far-'g un pès se lò al n è mia dispòst a dar-ag dgl'infurmasiòṅ su qvél ch'i s èṅ dit Zara cun Thompson, esénd che anc Morris al vōl rivàr a 'n acòrd sèg. Meyers al próa a dascórar ad cal fat chè cun Zara che però al gh diś ch'l è stâ lò a infurmàr la giurnalìsta parchè 'l è prònt a licensiàr-al, esénd-as dimustrâ minga leàł cun la campàggna andànd a dascórar cun Duffy sénsa dir-ag gnint.
Adès ch'la sò caréra in dal mónd dla pulìtica l'è ruinàda, Meyers al próa a śibìr-'s a Duffy, ma chi lò al gh diś ad nò, ch'al gh'iva da pinsàr-ag prima parchè al n vōl mia di scart. Quàl lè 'l éra un sò piàṅ strulgâ bèṅ p'r avēr-al da la sò banda o sinò par bruśàr-al. Quànd la Molly la s tōś la vita, par paùra dal scàndal su la sò relasiòṅ, Meyers al taca a ricatàr Morris, dgénd-ag ch'al vōl tōr al pòst ad Zara in dla campàggna o sinò lò al cuntarà al sò segrét. Cun 'l ajùt ad Thompson, che però al vōl dvintàr al vice-presidènt, al pōl incóra far-'g-la, ma a 'l sò cundisiòṅ.