Larry Parks

C'l artìcul chè 'l è scrit in Miranduléś

Samuel Klusman Lawrence Parks, cgnusû méj cuma Larry Parks (Olathe, 13 ad Dicémbar dal 1914 - Studio City, 13 'd Avrìl dal 1975, a s lèś [ˈlæri pɑːrks] in ingléś) 'l è stâ 'n atōr americàṅ, candidâ in dal 1947 a 'l Prèmi Òscar par la part dal cantànt e atōr Al Jolson in dal film Al Jolson, rōl ch'al farà incóra anc in dal 1949 girànd Non c'è passione più grande.

Biugrafìa

Uriginàri dal Kànsas, Larry 'l à tacâ a far i sò prim pas da atōr in dla cumpagnìa teatràla dl'Università d'l Illinòis in du 'l studiàva par dvintàr mèdag. In séguit 'l à pruâ a lauràr a Broadway, sénsa cavàr-'g-la. Dòp la mòrt ad sò pàdar al gh l'à dada sù, cuntintànd-as 'd un lavōr cuma ispetōr a la stasiòṅ sentràla 'd New York.

Cun 'l ajùt ad John Garfield e 'd Elia Kazan, cgnusû durànt i an a Broadway, Parks al gh'à abû l'ucaśiòṅ ad tintàr incóra la strada dal teàtar tulénd part a 'l drama Golden Boy ch'al gh'à avèrt al pòrti anc a 'l cìnema par via 'd un cuntràt firmâ cun la Columbia Pictures par far-ag far dal cumèdi brilànti e musical. In dal 1941 a 'l ém vist in dla cumèdia rumàntica Tu m'appartieni insém a la Barbara Stanwyck e a Henry Fonda.

Dòp na candidadùra a i Academy Award cuma atōr prutagunìsta p'r al biugràfic Al Jolson, la sò caréra l'à ciapâ 'l vōl. In dal 1947 'l à fat còpia cun la Rita Hayworth in dal musical Bellezze in cielo méntar 'l an dòp 'l è stâ prutagunìsta dal drama sentimentàł La favorita del maresciallo e in dal 1950 dla cumèdia I clienti di mia moglie in dla part 'd un migliardàri gelóś di pasiènt óm ad sò mujēr ch'la fava la dutōra. Dal 1952 'l è invéci Marito per forza, cumèdia dla Metro-Goldwyn-Mayer cun l'Elizabeth Taylor.

In chi an lè, a i tèmp dla guèra fréda, a muntàva sù 'n sentimènt anti-cumunìsta in dal paéś e 'l guèr'n al vliva cumbàt'r i militànt ad sinìstra o anc sōl la gint ch'la gh'iva dal simpatìi par lōr, in dal mónd dl'art e dal cìnema. Durànt i an dal macartìśum, dòp che Ronald Reagan 'l iva fat al sò nóm cuma simpatiśànt cumunìsta, la Cumisiòṅ par i atività anti-americàni (HUAC), misa sù da 'l guèran di Stat Unî, la 'l iva ciamâ a testimunìr. Al 21 ad mars dal 1951, dòp avēr cunfesâ 'd èsar stâ iscrìt a 'l partî cumunìsta da 'l 1941 a 'l 1945, 'l à dmandâ in làgarmi «Minga mét'r-um davànti a la sarnìda s'andàr in parśòṅ p'r ultràǵ a la cumisiòṅ o custrìnś'r-um a traśàr in dla śmalta par far la spia». In na sedùda a pòrti saràdi fata in séguit Larry 'l è stâ custrét a far di nóm. Finî in dla lista négra 'd Hollywood, i telèfun dal mónd dal cìnema i aṅ śmis a sunàr par lò, lasànd-al sénsa lavōr.

Custrét a 'ndàr in Európa par cuntinuàr al sò mistēr, Parks 'l à tòlt part a 'l pulisiésc britànig La grande rapina di Long Island (1955). Al sò ùltim film 'l è stâ Freud - Passioni segrete cun Montgomery Clift in di pagn ad Sigmund Freud. In séguit al s è mis a far 'l agînt imubiliàr, murénd par 'n atàc ad cōr a ssant'an.

Filmugrafìa

1941 - Mystery Ship, regìa ad Lew Landers
1941 - Harmon of Michigan, regìa ad Charles Barton
1941 - Tu m'appartieni (You Belong to Me), regìa ad Wesley Ruggles
1941 - Three Girls About Town, regìa ad Leigh Jason
1941 - Sing for Your Supper, regìa ad Charles Barton
1941 - Honolulu Lu, regìa ad Charles Barton
1941 - Harvard, Here I Come!, regìa ad Lew Landers
1942 - Blondie Goes to College, regìa ad Frank R. Strayer
1942 - Canal Zone, regìa ad Lew Landers
1942 - North of the Rockies, regìa ad Lambert Hillyer
1942 - Alias Boston Blackie, regìa ad Lew Landers
1942 - Hello, Annapolis, regìa ad Charles Barton
1942 - Submarine Raider, regìa ad Lew Landers e 'd Budd Boetticher
1942 - Tutti baciarono la sposa (They All Kissed the Bride), regìa 'd Alexander Hall
1942 - Flight Lieutenant, regìa ad Sidney Salkow
1942 - Atlantic Convoy, regìa ad Lew Landers
1942 - A Man's World, regìa ad Charles Barton
1942 - The Boogie Man Will Get You, regìa ad Lew Landers
1942 - Non sei mai stata così bella (You Were Never Lovelier), regìa ad William A. Seiter
1943 - Power of the Press, regìa ad Lew Landers
1943 - Reveille with Beverly, regìa ad Charles Barton
1943 - Rita la rossa (Redhead from Manhattan), regìa ad Lew Landers
1943 - Sacrificio supremo (First Comes Courage), regìa dla Dorothy Arzner
1943 - Ombre sul mare (Destroyer), regìa ad William A. Seiter e 'd Ray Enright
1943 - Is Everybody Happy?, regìa ad Charles Barton
1943 - The Deerslayer, regìa ad Lew Landers
1944 - The Racket Man, regìa ad D. Ross Lederman
1944 - Hey, Rookie, regìa ad Charles Barton
1944 - Jam Session, regìa ad Charles Barton
1944 - The Black Parachute, regìa ad Lew Landers
1944 - Stars on Parade, regìa ad Lew Landers
1944 - Sergeant Mike, regìa 'd Henry Levin
1944 - She's a Sweetheart, regìa ad Del Lord
1945 - Contrattacco (Counter-Attack), regìa ad Zoltán Korda
1946 - I rinnegati (Renegades), regìa ad George Sherman
1946 - Al Jolson (The Jolson Story), regìa 'd Alfred E. Green
1947 - Giù sulla terra (Down to Earth), regìa 'd Alexander Hall
1947 - Gli affari di suo marito (Her Husband's Affairs), regìa ad S. Sylvan Simon
1947 - Bellezze in cielo (Down to Earth), regìa 'd Alexander Hall
1948 - Spade insanguinate (The Swordsman), regìa ad Joseph H. Lewis
1948 - La favorita del maresciallo (The Gallant Blade), regìa 'd Henry Levin
1949 - Non c'è passione più grande (Jolson Sings Again), regìa 'd Henry Levin
1950 - I clienti di mia moglie (Emergency Wedding), regìa 'd Edward Buzzell
1952 - Marito per forza (Love Is Better Than Ever), regìa ad Stanley Donen
1955 - La grande rapina di Long Island (Tiger by the Tail), regìa ad John Gilling
1962 - Freud, passioni segrete (Freud), regìa ad John Huston

Culegamènt estéran

(IT) Filmugrafìa in s'l IMDb

Àtar prugèt

Wikimedia Commons contiene file multimediali su Larry Parks