La taverna della Giamaica
|
C'l artìcul chè 'l è scrit in
Miranduléś |
 Jamaica Inn | ||
| La taverna della Giamaica | ||
 Laughton e la O'Hara in na figùra dal film | ||
| L'ustarìa dla Giamàica 1939 | ||
|---|---|---|
| Regìa: Alfred Hitchcock | ||
| Scritōr: Daphne Du Maurier • Joan Harrison Sidney Gilliat • J.B. Priestley | ||
| Atōr: Charles Laughton • Maureen O'Hara Leslie Banks • Robert Newton • Marie Ney Horace Hodges • Hay Petrie • Emlyn Williams | ||
| Müsica: Eric Fenby dirèta par Frederick Lewis | ||
| Léngua: Ingléś | ||
| Dürä dal film: 108 minüt | ||
| Nasiōṅ: Régn Unî | ||
La taverna della Giamaica (L'ustarìa dla Giamàica) 'l è 'n film aventuróś in custùm dal 1939 'd Alfred Hitchcock, girâ in biànc e négar. Ùltim film britànig dal “mìstar dal śgriśōr”, 'l è trat da 'n rumànś dla Daphne Du Maurier.
Sunt
A 'l inìsi dal XIX sécul in Curnuvàglia un grup ad delinquènt al lavóra ad nòt par far naufragàr al barchi lung al còsti maśagnósi, impisànd dal luś cuma di arciàm sicûr, par pò rapinàr-li. Chi lōr i s càtan sèmp'r in un lucàl ciamâ “Ustarìa dla Giamàica” ad pruprietà 'd un sèrt Joss Merlyn (Leslie Banks), mémbar dla banda, e 'd sò mujēr Patience (Marie Ney).
Na sira da l'Irlànda a riva lè n'anvōda dla Patience armàśa òrfna, la Mary Yellen (Maureen O'Hara), sénsa savēr di tràfic ad sò sîṅ. A cumpagnàr-la lè a cavàl a gh pénsa 'l giùdas sir Humphrey Pengallan (Charles Laughton) dòp avēr-ag butâ gl'òć adòs. Chi lò in ségret 'l è 'l infurmadōr e la mènt dal grup.
Da la sò cambra da lèt la ragàsa la véd i óm dla banda tintàr 'd impicàr òṅ ad lōr, James Trehearne dit Jem (Robert Newton) parchè suspetâ 'd avēr fargâ di bèsi. La Mary, cun dimóndi curàǵ, la gh la cava a tajàr la còrda par pò scapàr via sèg. 'L óm a dir dabòṅ 'l è 'n ufisiàł dla marìna ingléśa, mandâ lè par far luś su i naufràgi e 'l rubarìi e, par far-al, 'l éra dvintâ 'n mémbar dla banda.
La Mary la pésca ajùt da 'l giùdas Pengallan, sénsa savēr chi 'l è dabòṅ, pò la dmanda a sò sîna ad mulàr cal lestufànt ad sò marè.