La carica dei cento e uno
|
C'l artìcol chè 'l è scrit in
Carpśàn |
 One Hundred and One Dalmatians | ||
| La carica dei cento e uno | ||
 La Crudèglia De Mòni e Pongo | ||
| La carica di sèint e ùn 1961 | ||
|---|---|---|
| Scritōr: Dodie Smith | ||
| Regìa: Wolfgang Reitherman Hamilton Luske • Clyde Geronimi | ||
| Senegiadùra: Bill Peet | ||
| Personâǵ: Pongo • Peggy • Crudèglia De Mòni Rudy Radcliffe • Anita • Gàsper • Oràsi | ||
| Mùśica: George Bruns | ||
| Durèda dal cartòun: 79 minût | ||
| Lengua: Ingléś | ||
| Nasiòun/Paēś: Stêt Unî | ||
La carica dei cento e uno (a dìr "La carica di sèint e ùn", One Hundred and One Dalmatians in ingléś) 'l è 'n cartòun animê dal 1961 disgnê e prodòt da l'americàna Walt Disney Productions, gnû pò fóra col tradusiòun anca in dal rest dal mond.
'L è 'l 17śim edla séri di Clàsic Disney. 'L à tolt ispirasiòun da 'l umònim romàṅś ed Dodie Smith dal 1956.
In di tèinp dòp la Disney l'à fat 'n arfacimènt live-action in dal 1996 da 'l tìtol La carica dei 101 - Questa volta la magia è vera e anca 'n séguit animê in dal 2003 ciamê La carica dei 101 II - Macchia, un eroe a Londra.
Sunt edla fóla
[mudéfica la surzéia]In na Londra di an Essànta a ghe stà 'n śóven muśicìsta put, Rudy Radcliffe, col só can dàlmata Pongo, put anca lò. Conbinasiòun la vōl che padròun e can i vaghen in dal parco lè deśvèin a fèr el pasegèdi e Pongo, ch'al gh'à gli idèi bèin cèri sul dafères, al bùta 'l òć su na cagnèta dàlmata anca lē, lè p'r al pasegèdi cun la só padrunsèina Anita ch'la gh'prèv piaśér, a bèin vèder, anc a Rudy. Dài incō e dài edmàn, Pongo al gh'la chèva ed purtèr a cà al só intèint: cun na mòsa da mìster, al gròpa i du umàṅ lighê 'l ganbi col guinsài, chilōr i finìsen ganbi a l'ària in dl'àqua dla funtàna e lò al strìca dl'òć ala cagnulèina Peggy. Vō-'t che i du umàn i n'finìsen per piaśéres anca lōr?! I s piaśaràn sè, i se spuśaràn e i du dàlmata, anca lōr afesionê 'l ùn a cl'ètra fin da 'l inìsi, i staràn insèm in cà ség, che Pongo 'l gh'ìva vist giust.
Minga dimòndi tèinp dòp, la Peggy e Pongo i 'spèten na cuciolèda 'd cagnulèin. In cal mèinter, a vin lè a fèr vìśita in dla cà di spōś n'amìga di vèć tèinp edl'Anita, na serta Crudèglia De Mòni che, tra 'l èter, la và sèinp'r in sérca 'd pèli 'd bésti da cuśìregh dal pelìci. Chilē l'armàgn dimòndi interesèda ala prospetìva che présti a nasarà na cuciolèda 'd cagnulèin dàlmata.
Quand è l'óra dal pèrt, i nasen bèin quìndeś cùciol, minga sèinsa dificoltê, che ùn ed chi cichìn lè al ne s mōv minga e 'l vin rianimê da Rudy cun di masagìn in sim'a 'l cōr in fuga in fuga... 'N idìli per tuta la cà, s'a n'fùs che la Crudèglia la torna a fères viva per dmandèr i cùciol da cunprèr p'r al só pelìci. A n's in ciacàra gnanc, a gh'rispònd Rudy, ch'a n'gh'è dùbi che nuèter a vindèma i noster cagnulèin per fèregh dal pelìci! Fóra da cla cà chè! al gh'siga drē sēg.
La Crudèglia però la dróva anc dal manéri minga convensionèli, e dòunca la dà 'l incàreg ai du cunpèr ladrùncol Gàsper e Oràsi, 'd andèr in dla cà di spōś e purtèr vìa ind un sac la presióśa cuciolèda. I du laśaròun i gh'la chèven ed purtèr vìa i cagnulèin cun dla prepotèinsa anc countra la governànta, ch'la tintèva 'd protéger la cà. I du scagnòs i sparìsen cun la refurtìva e più gnint a s sà di cagnulèin. Gnanc la guèrdia dla Scotland Yard la n'gh'la chèva brìśa 'd catèri. Pongo e la Peggy però i dróven al só canèl 'd indàgin fàt ed pasa-paròla e 'd amìg bésti ch'i s preòcupen anca lōr ed catèr la cuciolèda.
Colegamèint estéren
[mudéfica la surzéia]- (IT) La schéda dal film in sìm'a 'l IMDb.
- (IT) La schéda dal film in sìm'a 'l FilmTv.