La calda notte dell'ispettore Tibbs
|
C'l artìcul chè 'l è scrit in
Miranduléś |
 In the Heat of the Night | ||
| La calda notte dell'ispettore Tibbs | ||
 Sidney Poitier e Rod Steiger in na figùra dal film | ||
| La calda nòt d'l ispetōr Tibbs 1967 | ||
|---|---|---|
| Regìa: Norman Jewison | ||
| Scritōr: Stirling Silliphant • John Ball | ||
| Atōr: Sidney Poitier • Rod Steiger • Lee Grant Warren Oates • Larry Gates • James Patterson William Schallert • Beah Richards • Matt Clark | ||
| Müsica: Quincy Jones | ||
| Léngua: Ingléś | ||
| Dürä dal film: 110 minüt | ||
| Nasiōṅ: Stat Unî | ||
La calda notte dell'ispettore Tibbs (La calda nòt d'l ispetōr Tibbs) 'l è 'n film pulisiésc americàṅ dal 1967 ad Norman Jewison trat da 'l rumànś umònim ad John Ball dal 1965. 'L à vins sinc Prèmi Òscar (film, atōr prutagunìsta a Rod Steiger, senegiadùra minga uriginàla, muntàǵ e sunôr) e tri Golden Globe. Al gh'à abû dū séguit, Omicidio al neon per l'ispettore Tibbs (1970) e L'organizzazione sfida l'ispettore Tibbs (1971).
In dal 2002 'l è stâ sarnî p'r èsar tgnû dacàt in dal National Film Registry dla Bibliutéca dal Cungrès di Stat Unî. In dal 2007 'l American Film Institute al 'l à mis a 'l 75śum pòst in dla lista di sènt film americàṅ mijōr ad tut i tèmp. Custâ dū migliòṅ ad dòlar, al film al 'n à fat pò sù da piò ad vint-quàtar.
In dla culòna sunóra, firmàda da Quincy Jones, Ray Charles al canta 'l braṅ In the Heat of the Night.
'L atōr négar Sidney Poitier 'l è andâ dimóndi adrē par via ch'al film al fus fat in dal Nòrd dal paéś invéci ch'a Dixie par via d'n incidènt sucès a lò e a Harry Belafonte ch'i èṅ andâ a risć 'd èsar masâ da di mémbar dal Ku Klux Klan durànt na scapàda in Missisìpi. 'L è par cal mutìṿ chè ch'la pelìcula l'è stada giràda a Sparta (Illinòis) invéci ch'a Sparta (Missisìpi). Al séni ambintàdi in di camp ad cutòṅ i èṅ stadi fati in Tennessee parchè in Illinòis di sit dal gènar i n gh'èṅ briśa. Poitier 'l à pò durmî cun na pistòla sóta 'l cusèṅ par via di spauràs ch'i gh'ìvan fat soquànt grup rasìsta dal pòst.
Sunt
[mudéfica la surzéia]In dla sitadìna 'd Sparta (Missisìpi) 'l agìnt Sam Wood (Warren Oates), durànt un gir ad perlustrasiòṅ ad nòt, al cata 'l cadàvar d'l industriàł Philip Colbert (Jack Teter) che da Chicago 'l éra vgnû lè par vèrar na fàbrica. Al cap dla pulisìa dal pòst, Bill Gillespie (Rod Steiger), al dmanda a i sò óm ad catàr in gir di tisi suspèt.
Sèmpar cla nòt lè pròpria Wood al pòrta in cumisariâ 'n óm ad culōr bcâ in stasiòṅ cun di bèsi, un quèl ch'a traśa a sò dita, ma a s trata 'd un bûś in dl'àqua parchè chi lò 'l è 'l ispetōr Virgil Tibbs (Sidney Poitier) dla squàdra umisìdi 'd Filadèlfia. Chi lò, tratâ mâł sōl parchè négar, al vrév turnàr in Pennsylvania a la śvélta ma 'l sò cap al gh admànda 'd armàgnar lè a jutàr i sò culéga minga tant espèrt in dgl'indàśin.
Tibbs al dà subìt n'uciàda a 'l cadàvar méntar chi àtar pulisiòt i pòrtan dènt'r un suspetâ, un sèrt Harvey Oberst (Scott Wilson), bcâ c'n al pòrtafój ad Colbert. Al śōv'n al próa a difénd'r-as dgénd ch'al n è minga al sasèṅ, 'l à sōl fargâ di bèsi incruśànd al cadàvar par strada. Gillespie 'l è sicûr ch'al culpévul al sia lò ma Tibbs al salta sù dgénd ch'l è impusìbil parchè Oberst 'l è mansèṅ a 'l cuntràri dal sasèṅ ch'l à masâ druànd la maṅ dèstra. Inóltar chi lò al gh'à 'n àlibi.
I pulisiòt ad Sparta i n èṅ minga tant cuntènt ad ciapàr dal lesiòṅ da 'n óm ad culōr rivâ da 'l nòrd ma 'l sìndig Schubert (William Schallert) al diś a Gillespie ad lasàr-al far parchè s'al bèca al sasèṅ pò al mèrit al sarà suo in tut al manéri, esénd ch'in Missisìpi al n gh cmanda minga lò, méntar s'al falìs la cólpa la sarà tuta sua. Inólt'r a gh'è da far i cònt cun la védva d'l industriàł (Lee Grant) ch'la n s fida minga tant ad chi pulisiòt lè acsè rasìsta e la fà inténdar ch'la scanślarà 'l prugèt dla fàbrica lè se Tibbs al sarà mandâ via.
Tibbs, cun Gillespie sèg, al và a far dal dmandi a 'n latifundìsta dimóndi putènt e pîṅ 'd bèsi dal pòst, Eric Endicott (Larry Gates), parchè in dla màchina in dua Colbert 'l è stâ cupâ 'l ispetōr 'l à catâ 'n arbùst ch'al prév vgnir da òṅ di sò sit. Inóltar lò al dasfrùta dimóndi p'r i sò camp ad cutòṅ al lavōr dla gint ad culōr, ch'l'arév psû licensiàr-as p'r andàr invéci a lauràr in fàbrica, lasànd-al dònca in di guàj.
In cal méntar la gint dal pòst la s urganìśa par mandàr via al négar.