La Pantera Rosa (film 1963)
|
C'l artìcul chè 'l è scrit in
Miranduléś |
 The Pink Panther
| ||
| La Pantera Rosa | ||
.png) La Fran Jeffries in na figùra dal film | ||
| La Pantéra Róśa 1963 | ||
|---|---|---|
| Regìa: Blake Edwards | ||
| Scritōr: Maurice Richlin • Blake Edwards | ||
| Atōr: David Niven • Peter Sellers • Capucine Robert Wagner • Brenda de Banzie • Fran Jeffries Claudia Cardinale • Meri Welles • Colin Gordon James Lanphier • Martin Miller • Guy Thomajan | ||
| Müsica: Henry Mancini • Don Grady | ||
| Léngua: Ingléś • Itagliàṅ • Grèc | ||
| Dürä dal film: 115 minüt | ||
| Nasiōṅ: Stat Unî | ||
La Pantera Rosa (La Pantéra Róśa) l'è na cumèdia americàna dal 1963 ad Blake Edwards, vinsidōra a i Prèmi Òscar p'r al mùśichi 'd Henry Mancini in dua la Fran Jeffries la canta 'l braṅ swing Meglio stasera. I vistî dla Capucine e dla Claudia Cardinale i èṅ dal stilìsta Yves Saint Laurent.
La gh'à abû sèt séguit: Uno sparo nel buio (1964), La Pantera Rosa colpisce ancora (1975), La Pantera Rosa sfida l'ispettore Clouseau (1976), La vendetta della Pantera Rosa (1978), Sulle orme della Pantera Rosa (1982), Pantera Rosa - Il mistero Clouseau (1983) e Il figlio della Pantera Rosa (1993), cun prutagunìsta Roberto Benigni. In di An Dumìla i aṅ fat dū arfacimènt cun Steve Martin in di pagn d'l ispetōr Clouseau: La Pantera Rosa (2006) e La Pantera Rosa 2 (2007). In dal 1968 l'è vgnuda fóra anc n'imitasoiòṅ apòcrifa: L'infallibile ispettore Clouseau? cun Alan Arkin.
P'r i tìtui ad tèsta dal film, girâ anc in Itàglia a Curtìna 'd Ampès e a Ròca 'd Papa, l'è stada invintàda la figùra a cartòṅ animâ dal persunàǵ dla Pantéra Róśa che pò l'è dvintàda prutagunìsta dna série 'd 124 curtumetràǵ prudót fra 'l 1964 e 'l 1980, dimóndi famóś in alóra.
In dal 2010 la pelìcula l'è stada sarnìda fra qvéli da tgnir dacàt in dal National Film Registry dla bibliutéca dal Cungrès di Stat Unî.
Sunt
La prinsipésa Dala (Claudia Cardinale), fiōla dal marajà in eśìli dòp un cōlp ad stat, l'è in vacànsa a Curtìna 'd Ampès. Sèg al gh'à al diamànt più grand dal mónd, cgnusû cuma la Pantéra Róśa, un rigàl ch'al gh'iva fat sò pàdar quànd lē l'éra pìcula.
In Itàglia la cgnós al playboy ingléś sir Charles Lytton (David Niven) sénsa savēr però che chi lò in segrét 'l è 'n làdar patintâ cgnusû cuma la Prìmula. 'L óm, ch'al gh'à in di garét a dar-ag la casa 'l ispetōr francéś un po' cajòṅ Jacques Clouseau (Peter Sellers), 'l è insém a 'l sò anvōd americàṅ George Lytton (Robert Wagner), sèmp'r in buléta. In vacànsa a gh'è anc la Simone (Capucine), mujēr ad Clouseau e amànta 'd Charles.
I Lytton i strùlgan di piàṅ par śgranfgnàr via al diamànt a la Dala durànt na fèsta in custùm a Róma sénsa savēr 'l òṅ ad c'l àtar.