L'uomo sul treno - The Commuter
|
C'l artìcul chè 'l è scrit in
Miranduléś |
 The Commuter | ||
| L'uomo sul treno - The Commuter | ||
 Nyman, Møller e Neeson in na figùra dal film | ||
| 'L óm su 'l trêṅ - Al pendulàr 2018 | ||
|---|---|---|
| Regìa: Jaume Collet-Serra | ||
| Scritōr: Byron Willinger Philip de Blasi • Ryan Engle | ||
| Atōr: Liam Neeson • Vera Farmiga • Sam Neill Patrick Wilson • Jonathan Banks • Shazad Latif Elizabeth McGovern • Killian Scott • Clara Lago Andy Nyman • Roland Møller • Ella-Rae Smith Kobna Holdbrook-Smith • Dean-Charles Chapman Adam Nagaitis • Damson Idris • Andy Lucas Florence Pugh • Nila Aalia • Ben Caplan | ||
| Müsica: Roque Baños | ||
| Léngua: Ingléś • Spagnōl | ||
| Dürä dal film: 104 minüt | ||
| Nasiōṅ: Stat Unî • Régn Unî • Frància Cina • Cànada • Spaggna | ||
L'uomo sul treno - The Commuter ('L óm su 'l trêṅ - Al pendulàr) 'l è 'n thriller dal 2018 ad Jaume Collet-Serra girâ in Inghiltèra, a Sacramènt e a New York.
Custâ trénta migliòṅ ad dòlar, al film al 'n à pò muciâ sù sènt-vint.
Sunt
Michael MacCauley (Liam Neeson) 'l è 'n agìnt ad ssant'an ch'al lavóra par na cumpagnìa 'd asicurasiòṅ ad Manhattan. Tut i dè al và in ufìsi ciapànd al trêṅ dòp avēr fat clasiòṅ cun sò mujēr Karen (Elizabeth McGovern) e sò fiōl Danny (Dean-Charles Chapman) ch'al gh'à da tacàr l'università. Un dè al mónd al gh cróda adòs quànd al sò cap Frank (Ben Caplan) 'l al licénsia dòp déś an ad servìsi, sénsa dar-ag na spiegasiòṅ.
Michael 'l è in di guàj parchè 'l è vèć par tacàr un mistēr nóṿ e pò al gh'à 'n mutṿo pēś da pagàr e anc al spéśi par la scóla 'd sò fiōl. Prima 'd turnàr a cà, al s véd par sfugàr-'s in un bar c'n al sò amìg Alex Murphy (Patrick Wilson) che na vòlta al lauràva sèg in dla pulisìa ad New York sóta 'l cmand dal capitàṅ Hawthorne (Sam Neill) quànd Michael al fava 'l pulisiòt. In dal méntar ch'i bévan na bira, a 'l telegiurnàł a s sènt la nutìsia dal suicìdi 'd un funsiunàri dal dipartimènt par la pianificasiòṅ urbanìstica dla sità, Enrique Mendez (Jaime Menéndez), ch'al s è masâ butànd-as śò da 'l palàs in du 'l lauràva.
Michael al mónta sù su 'l trêṅ par turnàr a cà. Dòp un pôc na dóna ch'la diś ad ciamàr-as Joanna (Vera Farmiga) la s sènta darènt a lò tacànd butòṅ e śibénd-'g un lavursèṅ da far. In cambi ad sènt-mila dòlar in cuntànt, vintsìnc-mila subìt lugâ in un cèso e stantasìnc-mila dòp, lò al gh'arév da catàr un pasegēr, nóm in còdas “Prynne”, ch'al s cata lè insìma p'r andàr a Cold Spring purtànd sèg un bursòṅ cun dèntar 'n ugèt rubâ. Al sò còmpit 'l é qvél ad mét'r un lucaliśadōr GPS atàc a 'l bagàj. Dòp avēr-ag dit ch'al gh'à pôc tèmp par pinsàr-ag, la dóna la śmònta śò a la farmàda sucesìva.
'L óm al pénsa ch'a sia 'n schèrs ma pò al và a véd'r in dal cèso e i bèsi i gh'èṅ dabòṅ. Michael al i tōś anc s'al n gh'à minga intensiòṅ ad pascàr cal “Prynne” là. Quànd però al próa a lasàr al trêṅ, a riva na ragàsa ch'la gh dà na busta cun dèntar 'l anèl ad nòsi ad sò mujēr, faghénd-'g inténdar ch'adès 'l è custrét a rispetàr 'l acòrd o sinò la sò famìja la pasarà di brut guàj e sicuramènt da na quàlc banda lè a gh'è qualchidòṅ ch'al lavóra par la Joanna.
Michael al próa a scrìv'r un mesàǵ 'd ajùt su 'l giurnàł 'd un sò amìg pendulàr ch'l è rivâ a destinasiòṅ, Walt (Jonathan Banks), ma subìt dòp però chi lò al vîṅ cuciâ sóta 'n bus par cupàr-al. Michael al capìs 'd èsar-'g dènt'r in fîṅ a 'l còl e, dòp avēr ciamâ Alex cuntànd-ag la situasiòṅ, al taca a pascàr “Prynne”, lasànd pèrd'r i pendulàr sòlit, cuma Tony (Andy Nyman), e faghénd a mènt invéci a 'l faci nóvi ch'i gh'aṅ da śmuntàr śò a Cold Spring, dand 'n òć a i bijét lasâ in vista p'r al cuntrulōr Jimmy (Adam Nagaitis).
Al pasegēr misterōś al prév ès'r al chitarìsta Oliver (Kobna Holdbrook-Smith), na śuvnòta ch'la scólta dla mùśica ciamàda Sofia (Ella-Rae Smith), 'n óm ch'al śōga a poker cun Tony, Jackson (Roland Møller), al broker pîṅ 'd caca Vince (Shazad Latif), la studènta arvèrsa Gwen (Florence Pugh), 'l agìnt segrét d'l FBI Dylan Foster (Killian Scott), e l'infarméra Eva (Clara Lago) ch'a pâr ch'l'àppia quèl da lugàr. Cal sugèt lè 'l è stâ testimòni dal masamènt d'l urbanìsta che dònca al n s è minga tòlt la vita ma 'l è stâ cuciâ śò da dū pulisiòt.