L'uomo senza sonno
|
C'l artìcul chè 'l è scrit in
Miranduléś |
 The Machinist | ||
| L'uomo senza sonno | ||
 Christian Bale in na figùra dal film | ||
| 'L óm sénsa són 2004 | ||
|---|---|---|
| Regìa: Brad Anderson | ||
| Scritōr: Scott Kosar | ||
| Atōr: Christian Bale • Jennifer Jason Leigh Aitana Sánchez-Gijón • Michael Ironside John Sharian • Reg E. Cathey • Jeremy Xido Lawrence Gilliard Jr. • Nancy Crane • Buffy Davis | ||
| Müsica: Roque Baños | ||
| Léngua: Ingléś | ||
| Dürä dal film: 101 minüt | ||
| Nasiōṅ: Stat Unî • Régn Unî • Spaggna • Frància | ||
L'uomo senza sonno (ʼL óm sénsa són) 'l è 'n film dramàtic dal 2004 ad Brad Anderson. Custâ sinc migliòṅ ad dòlar, al film al 'n à pò muciâ sù òt e dū.
Par giràr cla pelìcula chè al prutagunìsta Christian Bale 'l è stâ custrét a pèrdar pēś rivànd a pśar sōl sinquànta-quàtar chilo.
Sunt
[mudéfica la surzéia]Trevor Reznik (Christian Bale) al fà 'l machinìsta in na fàbrica metalmecàniga e 'l è put. Da soquànt méś al n gh la cava piò a ciapàr són, in cal méntar 'l è anc śmagrî dimóndi e adès 'l è tut pèla e òs. Al n gh'à minga di amìg, anc i sò culéga i al tràtan mâł, inólt'r al gh'à di alucinasiòṅ. Da 'n quànc dè 'l incróśa da spés anc un sèrt Ivan (John Sharian) ch'al gh diś 'd ès'r un sò culéga ma che ninsòṅ a cgnós.
Un dè, par cólpa sua, 'l uperàj Miller (Michael Ironside) al pèrd un bras finî in un machinàri. A séguit di sò atàc paranòic su 'l lavōr al vîṅ anc licensiâ.
Trevor al pasa 'l sò tèmp andànd a lèt cun na putàna ciamàda Stevie (Jennifer Jason Leigh), ch'la stà in 'n apartamènt darènt a 'l suo, e dascurénd cun na camaréra 'd un bar, la Marie (Aitana Sánchez-Gijón), mént'r al tōś al cafè tut i dè. Chi lē la l'invìda a 'l luna park a pasàr na giurnàda sèg e c'n al sò baghét pìcul, Nicholas (Matthew Romero Moore).
Un dè, vdénd incóra Ivan, al s ségna la targa dla sò màchina in manéra 'd denunsiàr-'l a la pulisìa par capìr chi al sia dabòṅ, specialmènt parchè 'l à tacâ a cumparìr da spés in dla sò vita, acsè a 'l impruvìś. 'L ispetōr Rogers (Colin Stinton) al gh diś però ch'la targa dla màchina l'è la sua e che lò, 'l an prima, 'l iva denunsiâ la sò demulisiòṅ a séguit d'n incidènt.