Kirsten Dunst

C'l artìcul chè 'l è scrit in Miranduléś

La Kirsten Caroline Dunst (Point Pleasant, 30 'd Avrìl dal 1982, a s lèś [ˈkɪərstən dʌnst] in ingléś) l'è n'atōra e èx mudèla americàna naturaliśàda tedésca par via 'd sò pàdar Klaus, mèdag uriginàri 'd Ambûrg.

In dla sò caréra l'è stada candidàda a i Prèmi Òscar in dal 2022 p'r al western Il potere del cane, in dla part dna védva ch'la spóśa Jesse Plemons paténd pò al cativèri ad sò cugnâ Benedict Cumberbatch, e anc par quàtar vòlti a i Golden Globe, armagnénd però sèmp'r a bèc sut.

Biugrafìa

Uriginària dal New Jersey, a tri an l'à tacâ a lauràr cuma mudèla par vistidèṅ par putèṅ, girànd anc un quàlc spot televiśìṿ. L'à fat al sò debùt a 'l cìnema da pìcula, laurànd cun Woody Allen in New York Stories dal 1989 e cun Brian De Palma in Il falò delle vanità dal 1990, in dla part dla fiōla 'd Tom Hanks. In dal 1994 a dód'ś an l'è stada candidàda a i Golden Globe par la part dla Claudia, na putìna trasfurmàda in vampîra, in dal film ad scarésa Intervista col vampiro a fiànc ad Tom Cruise, Brad Pitt e a Christian Slater. In chi an lè la lavóra anc in soquànti série televiśìvi cuma Star Trek: The Next Generation, in dla part dlʼHedril, e E.R. - Medici in prima linea, in di pagn dna putàna putìna ciamàda Charlie Chiemingo.

In dal 1995 la rècita in Jumanji, a fiànc ad Robin Williams, mént'r in dal 1997 la tōś part a la cumèdia satìrica Sesso & potere insém a Dustin Hoffman e a Robert De Niro. In dal 1999, dòp avēr rifiutâ al film American Beauty, a l'ém vista in dal drama Il giardino delle vergini suicide, cun prutagunìsta James Woods e la Kathleen Turner, e in dla cumèdia Bella da morire cun l'Ellen Barkin e la Denise Richards. Dū an dòp al regìsta John Stockwell al la sarnìs par la part dla Nicole Oakley in dal drama sentimentàł Crazy/Beautiful.

In dal 2002 l'à fat la part dla Mary Jane Watson, muróśa 'd Tobey Maguire in di pagn d'l Óm Ragn, in dal film Spider-Man e in di sò dū séguit, Spider-Man 2 e Spider-Man 3. Sèmp'r in di an Dumìla a l'arcurdém p'r al cumèdi Mona Lisa Smile, in còpia cun la Julia Roberts, Se mi lasci ti cancello, cun Jim Carrey e la Kate Winslet, Wimbledon, in di pagn dna tenìsta ch'la s inamóra dal sò culéga più vèć Paul Bettany, e Elizabethtown, pelìcula cun Orlando Bloom, la Susan Sarandon e Alec Baldwin. Dal 2006 'l è invéci al drama biugràfic Marie Antoinette in dua lē l'iva fat la part dna regìna 'd Frància Marìa Antuniéta.

In dal 2010, insém a Ryan Gosling, l'à girâ 'l thriller Love & Secrets méntar 'l an dòp l'à fat la part dla deprèsa Justine Tautou in dal film catastròfic ad Lars von Trier Melancholia, rōl ch'al gh fruta al Prix d'interprétation féminine a 'l 64^śum Fèstival ad Cannes.

Fra i sò ùltim lavōr a psém nutàr al thriller 'd asiòṅ I due volti di gennaio (2014), in còpia cun Viggo Mortensen, al biugràfic Il diritto di contare (2016) e 'l stòrig Civil War su la guèra 'd secesiòṅ americàna.

La Kirsten la s è spuśàda in dal 2022 c'n al sò culéga Jesse Plemons dòp sinc an ad fidansamènt. Insém i gh'aṅ dū fiōi. In dal 2007 in n'intervìsta l'à dit ad fumàr da spés la marijuana e 'd avēr anc pruâ dal dròghi pruibìdi méntar 'l an dòp l'à pasâ tri méś in clìnica par curàr la depresiòṅ.

Filmugrafìa

1989 - New York Stories, regìa ad Woody Allen
1990 - Il falò delle vanità (The Bonfire of the Vanities), regìa ad Brian De Palma
1991 - High Strung, regìa ad Roger Nygard
1993 - Darkness Before Dawn, regìa ad John Patterson – Film TV
1994 - Caro zio Joe (Greedy), regìa ad Jonathan Lynn
1994 - Intervista col vampiro (Interview with the Vampire: The Vampire Chronicles), regìa ad Neil Jordan
1994 - Piccole donne (Little Women), regìa ad Gillian Armstrong
1995 - Jumanji, regìa ad Joe Johnston
1996 - Confessione finale (Mother Night), regìa ad Keith Gordon
1996 - The Siege at Ruby Ridge, regìa ad Roger Young – Film TV
1997 - Sesso & potere (Wag the Dog), regìa ad Barry Levinson
1997 - Fantasmi da prima pagina (Tower of Terror), regìa ad D.J. MacHale
1997 - Il grande orso (True Heart), regìa dla Catherine Cyran
1998 - College femminile (Strike!), regìa dla Sarah Kernochan
1998 - Small Soldiers, regìa ad Joe Dante
1998 - Quindici anni e incinta (Fifteen and Pregnant), regìa ad Sam Pillsbury – Film TV
1999 - L'aritmetica del diavolo (L'aritmetica del diavolo), regìa dla Donna Deitch – Film TV
1999 - Il giardino delle vergini suicide (The Virgin Suicides), regìa dla Sofia Coppola
1999 - Bella da morire (Drop Dead Gorgeous), regìa ad Michael Patrick Jann
1999 - Le ragazze della Casa Bianca (Dick), regìa 'd Andrew Fleming
2000 - Il corvo 3 - Salvation (The Crow: Salvation), regìa ad Bharat Nalluri
2000 - Luckytown, regìa ad Paul Nicholas
2000 - Ragazze nel pallone (Bring It On), regìa ad Peyton Reed
2000 - Deeply, regìa dla Sheri Elwood
2000 - Lover's Prayer - L'amore negato, regìa ad Reverge Anselmo
2001 - Get Over It, regìa ad Tommy O'Haver
2001 - Crazy/Beautiful, regìa ad John Stockwell
2001 - Hollywood Confidential (The Cat's Meow), regìa ad Peter Bogdanovich
2002 - Spider-Man, regìa ad Sam Raimi
2003 - The Death and Life of Nancy Eaton, regìa ad Jerry Ciccoritti – Film TV
2003 - Levity, regìa 'd Ed Solomon
2003 - Mona Lisa Smile, regìa ad Mike Newell
2004 - Se mi lasci ti cancello (Eternal Sunshine of the Spotless Mind), regìa ad Michel Gondry
2004 - Spider-Man 2, regìa ad Sam Raimi
2004 - Wimbledon, regìa ad Richard Loncraine
2005 - Elizabethtown, regìa ad Cameron Crowe
2006 - Marie Antoinette, regìa dla Sofia Coppola
2007 - Spider-Man 3, regìa ad Sam Raimi
2008 - Star System - Se non ci sei non esisti (How to Lose Friends & Alienate People), regìa ad Robert B. Weide
2010 - Love & Secrets (All Good Things), regìa 'd Andrew Jarecki
2011 - Melancholia, regìa ad Lars von Trier
2012 - The Wedding Party (Bachelorette), regìa dla Leslye Headland
2012 - On the Road, regìa ad Walter Salles
2012 - Upside Down, regìa ad Juan Diego Solanas
2013 - Anchorman 2 - Fotti la notizia (Anchorman 2: The Legend Continues), regìa 'd Adam McKay
2013 - Bling Ring (The Bling Ring), regìa dla Sofia Coppola
2014 - I due volti di gennaio (The Two Faces of January), regìa 'd Hossein Amini
2016 - Midnight Special - Fuga nella notte (Midnight Special), regìa ad Jeff Nichols
2016 - Il diritto di contare (Hidden Figures), regìa ad Theodore Melfi
2017 - L'inganno (The Beguiled), regìa dla Sofia Coppola
2017 - Woodshock, regìa ad dla Kate e dla Laura Mulleavy
2021 - Il potere del cane (The Power of the Dog), regìa dla Jane Campion
2024 - Civil War, regìa 'd Alex Garland
2025 - Roofman, regìa ad Derek Cianfrance

Culegamènt estéran

Àtar prugèt

Wikimedia Commons contiene file multimediali su Kirsten Dunst