Kevin Kline

C'l artìcul chè 'l è scrit in Miranduléś

Kevin Delaney Kline (Saint Louis, 24 'd Utóbar dal 1947, a s lèś [ˈkevɪn kla.ɪn] in ingléś) 'l è 'n atōr americàṅ, vinsidōr in dal 1989 'd un Prèmi Òscar par la cumèdia Un pesce di nome Wanda. Al gh'à na stéla in dla Hollywood Walk of Fame.

Biugrafìa

Uriginàri dal Missouri, Kevin al taca a lauràr cuma atōr a Broadway a 'l inìsi di an Stanta purtànd a teàtar di lavōr ad William Shakespeare, ad Molière e 'd Anton Čechov. 'L à pò fat al sò debùt a 'l cìnema in dal 1982 tulénd part a 'l drama La scelta di Sophie in còpia cun la Meryl Streep. 'L an dòp al s è vist in 'n àtar film da piànśar, Il grande freddo, insém a Tom Berenger, la Glenn Close, Jeff Goldblum, William Hurt e la Meg Tilly. Su 'l set ad cla pelìcula chè al cgnós l'atōra Phoebe Cates ch'al spuśarà in dal 1989 e ch'la gh darà dū fiōi. In dal 1985 'l à recitâ in dal western Silverado cun Scott Glenn, la Rosanna Arquette e Kevin Costner.

In dal 1987 'l à fat al prutagunìsta dal drama biugràfic Grido di libertà, cun Denzel Washington in di pagn d'l ativìsta sudafricàṅ Stephen Biko. Dòp avēr vins 'l Òscar par la part 'd Otto West in Un pesce di nome Wanda, cun lò ch'in dal film ad dróa dal fraśi in itagliàṅ par cunquistàr la Jamie Lee Curtis anc s'in dal dupiàǵ par l'Itàglia al paròli i èṅ in spagnōl, 'l à tòlt part a 'l thriller Un detective... particolare, faghénd al fradèl detective 'd Harvey Keitel, e pò a la cumèdia négra Ti amerò... fino ad ammazzarti c'n i śōvan River Phoenix e Keanu Reeves.

In di an Nuànta a 'l arcurdém p'r al thriller Giochi d'adulti (1992), cun la Mary Elizabeth Mastrantonio e Kevin Spacey, p'r al biugràfic Charlot (1992), cun Robert Downey Jr. in di pagn ad Charlie Chaplin, par la cumèdia sentimentàla French Kiss (1995), in còpia cun la Meg Ryan, par la cumèdia Creature selvagge (1997), incóra a fiànc ad John Cleese e dla Jamie Lee Curtis a vint an da Un pesce di nome Wanda, p'r al drama Tempesta di ghiaccio (1997), in dla part d'n óm in criśi cun sò mujēr ch'al taca na stòria cun la Sigourney Weaver, par la cumèdia campiòna 'd incàs In & Out (1997), in dla part 'd un prufesōr gay, par Sogno di una notte di mezza estate (1999), trat da n'òvra 'd William Shakespeare, e Wild Wild West (1999), girâ insém a Will Smith e a la Salma Hayek.

In séguit 'l à fat la part 'd un prufesōr dl'università 'd Stanford in dla cumèdia Orange County (2002), dal cumpiśidōr Cole Porter in De-Lovely - Così facile da amare (2004), ad Charles Dreyfus in La Pantera Rosa, in còpia cun Steve Martin in dla part ch'l'éra stada 'd Peter Sellers, e dal detective Guy Noir in Radio America, film ad Robert Altman cun Woody Harrelson, Tommy Lee Jones, la Virginia Madsen e la Meryl Streep.

Fra i sò ùltim lavōr a 'rcurdém la cumèdia sentimentàla Amici, amanti e... (2011), cun la còpia Ashton Kutcher/Natalie Portman, al drama muśicàł Dove eravamo rimasti (2015), in dal rōl d'l èx marè dla Meryl Streep, al fantàstic La bella e la bestia (2017), in dua 'l à fat al pàdar dla Bèla (Emma Watson), e la cumèdia dramàtica The Good House (2022) in còpia cun la Sigourney Weaver.

Filmugrafìa

1982 - La scelta di Sophie (Sophie's Choice), regìa 'd Alan J. Pakula
1983 - I pirati di Penzance (The Pirates of Penzance), regìa ad Wilford Leach
1983 - Il grande freddo (The Big Chill), regìa ad Lawrence Kasdan
1985 - Silverado, regìa ad Lawrence Kasdan
1986 - Le violette sono blu (Violets Are Blue), regìa ad Jack Fisk
1987 - Grido di libertà (Cry Freedom), regìa ad Richard Attenborough
1988 - Un pesce di nome Wanda (A Fish Called Wanda), regìa ad Charles Crichton
1989 - Un detective... particolare (The January Man), regìa ad Pat O'Connor
1990 - Ti amerò... fino ad ammazzarti (I Love You to Death), regìa ad Lawrence Kasdan
1991 - Bolle di sapone (Soapdish), regìa ad Michael Hoffman
1991 - Grand Canyon - Il cuore della città (Grand Canyon), regìa ad Lawrence Kasdan
1992 - Giochi d'adulti (Consenting Adults), regìa 'd Alan J. Pakula
1992 - Charlot (Chaplin), regìa ad Richard Attenborough
1993 - Dave - Presidente per un giorno (Dave), regìa 'd Ivan Reitman
1994 - La principessa degli intrighi (Princess Caraboo), regìa ad Michael Austin
1995 - French Kiss, regìa ad Lawrence Kasdan
1996 - Riccardo III - Un uomo, un re (Looking for Richard), regìa 'd Al Pacino
1997 - Creature selvagge (Fierce Creatures), regìa ad Robert Young
1997 - Tempesta di ghiaccio (The Ice Storm), regìa 'd Ang Lee
1997 - In & Out, regìa ad Frank Oz
1999 - Sogno di una notte di mezza estate (A Midsummer Night's Dream), regìa ad Michael Hoffman
1999 - Wild Wild West, regìa ad Barry Sonnenfeld
2001 - Anniversary Party (The Anniversary Party), regìa 'd Alan Cumming e dla Jennifer Jason Leigh
2001 - L'ultimo sogno (Life as a House), regìa 'd Irwin Winkler
2002 - Orange County, regìa ad Jake Kasdan
2002 - Il club degli imperatori (The Emperor's Club), regìa ad Michael Hoffman
2004 - Jiminy Glick in Lalawood, regìa ad Vadim Jean
2005 - De-Lovely - Così facile da amare (De-Lovely), regìa 'd Irwin Winkler
2006 - La Pantera Rosa (The Pink Panther), regìa ad Shawn Levy
2006 - Radio America (A Prairie Home Companion), regìa ad Robert Altman
2006 - As You Like It - Come vi piace (As You Like It), regìa ad Kenneth Branagh
2007 - Trade, regìa ad Marco Kreuzpaintner
2008 - Cyrano de Bergerac, regìa ad David Leveaux - Film TV
2008 - Certamente, forse (Definitely, Maybe), regìa 'd Adam Brooks
2009 - Joueuse, regìa dla Caroline Bottaro
2010 - Un perfetto gentiluomo (The Extra Man), regìa dla Shari Springer Berman e Robert Pulcini
2010 - The Conspirator, regìa ad Robert Redford
2011 - Amici, amanti e... (No Strings Attached), regìa 'd Ivan Reitman
2012 - Darling Companion, regìa ad Lawrence Kasdan
2013 - The Last of Robin Hood, regìa ad Richard Glatzer e 'd Wash Westmoreland
2013 - Last Vegas, regìa ad Jon Turteltaub
2014 - My Old Lady, regìa 'd Israel Horovitz
2015 - Dove eravamo rimasti (Ricki and the Flash), regìa ad Jonathan Demme
2016 - Dean, regìa ad Demetri Martin
2017 - La bella e la bestia (Beauty and the Beast), regìa ad Bill Condon
2021 - Il nido dello storno (The Starling), regìa ad Theodore Melfi
2022 - The Good House, regìa dla Maya Forbes e 'd Wally Wolodarsky
2025 - A Big Bold Beautiful Journey - Un viaggio straordinario (A Big Bold Beautiful Journey), regìa ad Kogonada

Culegamènt estéran

Àtar prugèt

Wikimedia Commons contiene file multimediali su Kevin Kline