Juan Diego

C'l artìcul chè 'l è scrit in Miranduléś

Juan Diego Ruíz Montero, cgnusû méj cuma Juan Diego (Bormujos, 14 ad Dicémbar dal 1942 - Madrìd, 28 'd Avrìl dal 2022, a s lèś [ˈxwan ˈdjeɣo] in spagnōl) 'l è stâ 'n atōr spagnōl, vinsidōr ad tri Prèmi Goya: in dal 1991 par la cumèdia Il re stupito, cun Gabino Diego in di pagn ad Filìp IV ad Spaggna, in dal 1999 par la cumèdia París Tombuctú, cun prutagunìsta Michel Piccoli, e in dal 2006 par la cumèdia dramàtica Vete de mí in dla part dal prutagunìsta Santiago, atōr a teàtar.

In dla sò caréra, tacàda a gl'inìsi di an Ssanta, 'l à tòlt part a dagnóra sènt-sinquànta prudusiòṅ fra film e telefìlm, laurànd anc in Itàglia in cumèdi dramàtichi cuma Dramma della gelosia (tutti i particolari in cronaca) (1979), insém a Marcello Mastroianni, la Monica Vitti e a Giancarlo Giannini, o Come sono buoni i bianchi! (1988), a fiànc ad Michele Placido.

A 'l arcurdém anc p'r al stòrig Colpo di stato. Spagna 18 luglio 1936 (1986), in du 'l à fat al ditadōr Francisco Franco, p'r al drama Il viaggio in nessun luogo (1986), in dla part 'd un còmig ad strada, par La noche oscura (1989), in di pagn dal sant Śvan dla Crōś, p'r al drama eròtic Prosciutto prosciutto (1992), in dua 'l à recitâ insém a la Penélope Cruz, Javier Bardem, Jordi Mollà, l'Anna Galiena e la Stefania Sandrelli, sò mujēr in dal film, p'r al thriller eròtic Tra le gambe (1999), cun la còpia Victoria Abril/Javier Bardem, e p'r al drama La vita che ti aspetti (2004), c'n al rōl d'n alevadōr ad bóv cantabréś respunsàbil dla mòrt 'd un sò vśèṅ dòp na litgàda p'r un vdèl.

Culegamènt estéran

(IT) Filmugrafìa in s'l IMDb

Àtar prugèt

Wikimedia Commons contiene file multimediali su Juan Diego