Vai al contenuto

Jon Voight

Da Wikipedia.

C'l artìcul chè 'l è scrit in Miranduléś Emiliàn

Jon Voight tòlt śò in dal 1988


Jonathan Vincent Voight, cgnusû méj cuma Jon Voight (Yonkers, 29 ad Setémbar dal 1938, a s lèś [dʒɑːn vɔɪt] in ingléś), 'l è 'n atōr americàṅ.

In dla sò caréra, tacàda a 'l inìsi di an Ssanta, 'l è stâ bòṅ ad vìns'r al Prèmi Òscar in dal 1979 par la part 'd un suldâ custrét a vìv'r in carusìna dòp avēr cumbatû in guèra in dal film Tornando a casa, pelìcula ch'la gh'à purtâ anc al Prix d'interprétation masculine a 'l 31śum Fèstival ad Cannes. 'L è stâ inóltar candidâ atri tré vòlti a i Academy Award, in dal 1970 p'r al drama Un uomo da marciapiede, par la part 'd un gigolò par sgnōri ch'al s fà amìg dal làdar sòp Dustin Hoffman, in dal 1986 p'r al film 'd asiòṅ A 30 secondi dalla fine, c'n al rōl 'd un delinquènt ch'al próa a scapàr via da na parśòṅ in Alàska, e in dal 2002 p'r al biugràfic Alì, cun Will Smith in di pagn ad Muhammad Alì.

Fra i sò àtar prèmi a psém nutàr quàtar Golden Globe (su ùndas candidadùri) ma anc, in negatìṿ, dū Razzie Awards, al più vèć atōr a far-al.

I film ch'a s arcurdém da piò ad lò, a part qvéi chè 'd sōvar, i èṅ stâ Comma 22 (1970), film ad guèra cun Alan Arkin e Martin Balsam, Un tranquillo weekend di paura (1972), in dla part 'd un turìsta ch'insém a i sò amìg Burt Reynolds e Ned Beatty al gh'à da far i cònt c'n un grup ad muntanàr “hillbilly”, al pulisiésc Heat - La sfida (1995), a fiànc 'd Al Pacino, Robert De Niro e Val Kilmer, al film ad spiunàǵ Mission: Impossible (1996), cun prutagunìsta Tom Cruise, la pelìcula da scarésa Anaconda (1997), in còpia cun la Jennifer Lopez, al thriller U Turn - Inversione di marcia (1997), cun Sean Penn, al drama L'uomo della pioggia - The Rainmaker (1997), in dla part d'n avucàt ch'al difénd na cumapgnìa 'd asicurasiòṅ curóta, la cumèdia spurtìva Varsity Blues (1999), c'n al rōl dal coach Bud Kilmer, al film ad guèra Pearl Harbor (2001), in di pagn dal presidènt Franklin Delano Roosevelt, e Zoolander (2001), cumèdia scrita, dirèta e interpretàda par Ben Stiller.

Fra i sò ùltim lavōr a mitém al fantasientìfig Megalopolis (2024), insém a Adam Driver e a Shia LaBeouf, e 'l biugràfic Reagan - Un presidente sotto i riflettori (2024), cun Dennis Quaid in dla part dal presidènt Ronald Reagan.

Lò premiâ da 'l presidènt Trump
Un tranquìl fiṅ 'd stmana 'd paùra (1972)

Voight da śōvan al gh'iva dal puśisiòṅ liberal esénd un sustenidōr ad John F. Kennedy e 'd George McGovern ma in dal 2008 'l è pasâ dal tut da la part di republicàṅ, dgénd che la candidadùra 'd Barack Obama a la presidénsa la fus 'n prim pas par scanślàr la muràł pùblica par dar vita a n'Amèrica “sucialìsta”. In séguit 'l è sèmpar stâ da la banda 'd Donald Trump, a sò dita «al presidènt più grand da i tèmp 'd Abraham Lincoln», e quànd chi lò 'l à pardû cóntar Joe Biden in di elesiòṅ presidensiàli americàni dal 2020, sicûr ch'i gh fùsan stâ di bròj, al vliva ch'al culéǵ eleturàł al n certifichìs briśa 'l vōt, in nóm dla «batàja dl'unestà cóntar Sàtana». In dal nuvémbar dal 2003 al s è dit a favōr 'd Iśraēl in dla guèra 'd Gaza, miténd-as cóntar sò fiōla, l'Angelina Jolie.

Filmugrafìa

[mudéfica la surzéia]

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Jon_Voight&oldid=168571"