Vai al contenuto

John Turturro

Da Wikipedia.

C'l artìcul chè 'l è scrit in Miranduléś Emiliàn

John Turturro tòlt śò in dal 2007


John Michael Turturro (New York, 28 ad Favràr dal 1957, a s lèś [dʒɑn tərˈtʊəroʊ] in ingléś) 'l è 'n atōr, senegiadōr, regìsta e ardupiadōr americàṅ cun sitadinànsa itagliàna da 'l 2011, esénd lò uriginàri dna famìja 'd Brooklyn ch'la daśvgnìva da la Basitàglia.

In dla sò caréra 'l è stâ candidâ par dó vòlti a i Golden Globe, in dal 1995 p'r al drama Quiz Show, girâ cun Ralph Fiennes, e in dal 2017 par la minisérie televiśìva The Night Of - Cos'è successo quella notte?. 'L è inóltar stâ numinâ par tré vòlti a i Emmy Award, vinsénd in dal 2004 cuma atōr òspit in dla série Detective Monk.

Carsû in dal quartēr dal Queens, John da śōv'n al stùddia a la Yale School of Drama par pò far la cumpàrsa in dal film Toro scatenato cun Robert De Niro in di pagn dal pùgil Jake LaMotta. In dal 1985 'l incróśa la Madonna in dla cumèdia Cercasi Susan disperatamente e 'l tōś part a 'l noir Vivere e morire a Los Angeles a fiànc ad William Petersen e 'd Willem Dafoe. 'L an dòp al lavóra insém a Paul Newman e a Tom Cruise in dal drama Il colore dei soldi e anc cun Woody Allen in dla cumèdia sentimentàla Hannah e le sue sorelle, pelìcula cun la Mia Farrow e Michael Caine.

A la fiṅ di an Utànta al rècita in dal thriller Dentro la grande mela, cun la Jodie Foster e Tim Robbins, in dal pulisiésc Il siciliano, in di pagn dal delinquènt Gaspare Pisciotta, in dla cumèdia Fa' la cosa giusta, insém a Spike Lee e Danny Aiello, e in dal thriller Ore contate cun prutagunìsta Dennis Hopper e la Jodie Foster. In dal 1988 al tōś part a la minisérie televiśìva Mamma Lucia con la Sophia Loren.

Turturro in dal 2009

In dal 1991 par Spike Lee al tōś part insém a Wesley Snipes, a Samuel L. Jackson e a l'Annabella Sciorra a 'l drama Jungle Fever pò al gira 'l sò prim film 'l an dòp da 'l tìtul Mac. In dal 1994 al rècita in dal drama Fearless - Senza paura a fiànc ad Jeff Bridges e dl'Isabella Rossellini e anc in òṅ di sò lavōr più impurtànt, Quiz Show, in dla part dal prutagunìsta Herb Stempel.

In dal 1996 al culàbura incóra cun Spike Lee in dla cumèdia dramàtica Girl 6 - Sesso in linea méntar dū an dòp al firma la regìa dal drama Illuminata ciamànd a lauràr sèg la Susan Sarandon, Christopher Walken e la Beverly D'Angelo. Sèmp'r in dal 1998 al cata spasi in dla cumèdia di fradèi Joel e Ethan Coen Il grande Lebowski cun prutagunìsta Jeff Bridges, acsè cuma pur in dal 2000 par Fratello, dove sei? in còpia cun George Clooney.

In di an Dumìla a 'l ém vist in dla cumèdia dramàtica Lei mi odia (2004), cun la Monica Bellucci, in dal śal Secret Window (2004), insém a Johnny Depp e a Timothy Hutton, in Romance & Cigarettes (2005), àtar film da lò dirèt, in dla pelìcula 'd asiòṅ Transformers (2007), a fiànc ad Shia LaBeouf e dla Megan Fox, e in dal thriller Pelham 123 - Ostaggi in metropolitana (2009), insém a Denzel Washington e a John Travolta.

Fra i sò ùltim lavōr a 'l cìnema a 'rcurdém la cumèdia Gigolò per caso (2013), a fiànc ad Woody Allen, dla Vanessa Paradis e dla Sharon Stone, 'l èpic Exodus - Dei e re (2014), cun Christian Bale in dla part ad Muśè, al drama Mia madre (2015) ad Nanni Moretti, al fantàstic The Batman (2022), in di pagn dal mafióś Carmine Falcone, e 'l drama La stanza accanto (2024), cun la Tilda Swinton, la Julianne Moore e Alessandro Nivola.

Filmugrafìa

[mudéfica la surzéia]
Iluminàda (2006)

cuma regìsta

[mudéfica la surzéia]

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=John_Turturro&oldid=165574"