Vai al contenuto

John Travolta

Da Wikipedia.

C'l artìcul chè 'l è scrit in Miranduléś Emiliàn

John Travolta tòlt śò in dal 1983


John Joseph Travolta (Englewood, 18 ad Favràr dal 1954, a s lèś [d͡ʒɑn tɹəˈvoʊltə] in ingléś) 'l è 'n atōr e cantànt americàṅ, candidâ dó vòlti a i Prèmi Òscar, in dal 1978 p'r al film muśicàł La febbre del sabato sera, in dla part dal balarèṅ Tony Manero, e in dal 1995 par Pulp Fiction in di pagn dal sicàri Vincent Vega. Al gh'à na stéla in dla Hollywood Walk of Fame.

Fra i prèmi ch'l à vins in dla sò caréra a gh'è anc un Golden Globe purtâ a cà in dal 1996 par la cumèdia gangster Get Shorty, giràda cun Gene Hackman e Danny DeVito.

Uriginàri dal New Jersey, 'l è 'l ùltim ad siē fiōi. Sò pàdar al vindìva dal gumi e 'l gh'iva dal raìś itagliàni dla Sicìglia méntar sò màdar l'insgnàva ingléś e art dramàtica a scōla. A 'l inìsi di an Stanta al taca a recitàr a Broadway pò in dal 1975 al fà 'l sò debùt a Hollywood in dal film ad scarésa Il maligno a fiànc dl'Ida Lupino. In séguit al tōś part a 'l telefìlm I ragazzi del sabato sera faghénd Vinnie Barbarino, un studènt itagliàṅ ch'al s divertìs a ufénd'r in rima chi àtar.

In dal 1976 al fà la part d'n amìg catìṿ dla Sissy Spacek in dal film ad scarésa Carrie - Lo sguardo di Satana trat da 'n rumànś ad Stephen King. 'L an dòp al cata 'l sucès balànd la disco music insém a la Karen Lynn Gorney in dal film La febbre del sabato sera, cun dal canti di Bee Gees cuma Stayin' Alive, How Deep Is Your Love, Night Fever e You Should Be Dancing. 'L an dòp al gh'à 'n àtar sucès clamuróś c'n al musical Grease (Brillantina) fat in còpia cun l'Olivia Newton-John. Al braṅ You're the One That I Want, un duét fra chi lōr dū, al vénd da piò ad sèt migliòṅ ad còpi.

John in na fóto dal 1997

In di an Utànta al próa a cambiàr gènar laurànd cun la Debra Winger e Scott Glenn in dal western Urban Cowboy, in du 'l fà 'l cowboy Bud Davis. 'L an dòp al fà 'l tècnig dal sòṅ ch'al gh'à da catàr un sasèṅ insém a la Nancy Allen in dal thriller Blow Out ad Brian De Palma. In dal 1983 al tórna a far la part ad Tony Manero in Staying Alive ad Sylvester Stallone e pò l'incróśa incóra la Newton-John in dla cumèdia Due come noi. In dal 1985 al gira al drama sentimentàł Perfect in còpia cun la Jamie Lee Curtis ma purtròp tut chi film chè però i n vànan minga tant bèṅ.

Dimóndi ma dimóndi méj a và la cumèdia Senti chi parla (1989) e anc al sò séguit Senti chi parla 2 (1990) in du 'l fà 'n tasìsta ch'al fà da baby sitter a 'l putèṅ dla Kirstie Alley, finénd p'r inamuràr-'s ad lē. A vîṅ fóra anc un tèrs capìtul, Senti chi parla adesso!, mo 'l è 'n flop. Travolta al s tira sù faghénd al prutagunìsta 'd Pulp Fiction (1994), filmòṅ ad Quentin Tarantino cun Samuel L. Jackson, Bruce Willis, Tim Roth, Eric Stoltz, la Rosanna Arquette, Christopher Walken e Harvey Keitel. A s 'l arcurdém tut balàr al twist cun l'Uma Thurman su 'l nòti ad You Never Can Tell ad Chuck Berry.

In dal 1996 John Woo 'l al ciàma par far la part dal magiōr Vic Deakins in dal film 'd asiòṅ Nome in codice: Broken Arrow. In dal stés an al gira Phenomenon insém a Robert Duvall ch'al fà un gran incàs a 'l cìnema. Travolta al tórna a èsar òṅ di atōr più impurtànt a Hollywood e in di an Nuànta al gh'à la manéra 'd giràr di àtar film impurtànt cuma Mad City - Assalto alla notizia (1997) insém a Dustin Hoffman, Face/Off - Due facce di un assassino (1997), in còpia cun Nicolas Cage, La figlia del generale (1998), sucès anc par la crìtica, e A Civil Action (1998), drama cun William H. Macy e la Kathy Bates.

In di an Dumìla al vins dū Razzie Awards par 'l atōr più trist p'r i film Battaglia per la Terra e Magic Numbers - Numeri magici, un brut strabùc par lò. In dal 2001 al tórna a 'l thriller cun Unico testimone, girâ insém a Vince Vaughn, ma la pelìcula la và in rós c'n i cònt. In dal 2004 al tōś part a 'l film The Punisher faghénd la part d'l antagunìsta ad Frank Castle, persunàǵ trat da i fumét dla Marvel Comics.

In dal 2007 al rècita in dal musical Hairspray - Grasso è bello in dla part dla ciciòna Edna Turnblad ch'la gh fruta na candidadùra a i Golden Globe, un quèl ch'a gh sucéd anc in dal 2017 par la série televiśìva American Crime Story.

John al s è spuśâ in dal 1991 cun la culéga Kelly Preston, cgnusùda in dal 1989 su 'l set dal film Gli esperti americani. La dóna l'è mòrta in dal 2020 p'r un cànc'r a 'l téti. 'L atōr 'l à anc pardû òṅ di sò tri fiōi, Jett, mòrt a séd'ś an.

Filmugrafìa

[mudéfica la surzéia]
Paràr via (1981)
Rumànś da quàtar sòld (1994)

Discugrafìa

[mudéfica la surzéia]
John tòlt śò in dal 1975
  • 1974 - Over Here!
  • 1976 - John Travolta
  • 1977 - Can't Let You Go
  • 1978 - Travolta Fever
  • 1978 - Grease - culòna sunóra
  • 1986 - The Road to Freedom
  • 1996 - Let Her In: The Best of John Travolta
  • 2003 - The Collection
  • 2012 - This Christmas - insém a l'Olivia Newton-John
  • 1969 - You Set My Dreams To Music
  • 1969 - Goodnight Mr. Moon
  • 1969 - Rainbows
  • 1970 - Settle Down
  • 1971 - Moonlight Lady
  • 1972 - Right Time Of The Night
  • 1972 - Big Trouble
  • 1973 - What Would They Say
  • 1973 - Back Doors Crying
  • 1974 - Dream Drummin'
  • 1975 - Easy Evil
  • 1975 - Can't Let You Go
  • 1976 - Let Her In
  • 1976 - Slow Dancin'
  • 1976 - It Had To Be You
  • 1976 - I Don't Know What I Like About You Baby
  • 1976 - Let Her In
  • 1977 - Baby, I Could Be So Good At Lovin' You
  • 1977 - Razzamatazz
  • 1978 - Sandy
  • 1978 - Greased Lightnin'
  • 1980 - Never Gonna Fall In Love Again
  • 2008 - I Thought I Lost You - (ft. Miley Cyrus)

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=John_Travolta&oldid=164694"