Vai al contenuto

John Hurt

Da Wikipedia.

C'l artìcul chè 'l è scrit in Miranduléś Emiliàn

John Hurt tòlt śò in dal 2009


Sir John Vincent Hurt (Chesterfield, 22 ad Śnar dal 1940 - Cromer, 25 ad Śnar dal 2017, a s lèś [ˈd͡ʒɒn hɜːt] in ingléś) 'l è stâ 'n atōr e ardupiadōr ingléś, numinâ Cumendadōr d'l Órdan d'l Impēr Britànic.

In dla sò caréra, lunga ssant'an in dua 'l à laurâ in duśènt e pasa òvri e pò anc da spés a teàtar, 'l è stâ candidâ par dó vòlti a i Prèmi Òscar, in dal 1979 par la part 'd un drugâ e traficànt ingléś in na parśòṅ turca dimóndi dûra insém a Brad Davis, e in dal 1981 par qvéla ad John Merrick, 'n óm armàś uféś da 'n brut mâł ch'al gh'à dasfurmâ la ghigna, la neurofibrumatóśi, in The Elephant Man. Cal film chè, in dua 'l è curâ da Anthony Hopkins, un dutōr gentìl sèg, al gh'à purtâ 'n Golden Globe. 'L à vins anc quàtar BAFTA su sèt candidadùri.

'L à fat al sò debùt da atōr a 'l inìsi di an Ssanta tulénd part a soquànt telefìlm cuma Z Cars e L'ispettore Gideon par pò catàr un rōl impurtànt, qvél d' un śōv'n ambisióś ch'al tradìs Paul Scofield, in dal drama stòrig Un uomo per tutte le stagioni (1966). In dal 1969 'l à fat al prutagunìsta d'l aventuróś La forca può attendere.

In di an Stanta a 'l ém vist in di thriller L'assassino di Rillington Place n. 10 (1971), cun Richard Attenborough in di pagn dal masadōr seriàł John Reginald Christie, e ...unico indizio, un anello di fumo (1977), a fiànc ad Donald Sutherland, dla Francine Racette e 'd David Hemmings, par pò giràr dū di sò film più impurtànt, al drama biugràfic Fuga di mezzanotte (1978), insém a Brad Davis e a Randy Quaid, e Alien (1979), in dla part d'l ufisiàł eśecutìṿ Thomas Kane, prima vitma d'l aglièṅ che pò al salta fóra da la sò pansa.

Lò cun la Cynthia Nixon e la Swoosie Kurtz
'L atōr in dal 2011

Al vèra i an Utànta c'n al drama The Elephant Man, in dua 'l è custrét a mét'r-as in ghigna dimóndi truc frut ad soquànti óri 'd lavōr par far la part d'l “Óm Elefànt”, e 'l western I cancelli del cielo, flòp clamuróś ad Michael Cimino ch'l à fat falìr la United Artists. In séguit a 'l ém vist in dal pulisiésc Lui è mio (1982), a fiànc dal pulisiòt Ryan O'Neal ch'al gh'à da far luś su di masamènt in di ambînt omosesuài ad Los Angeles, in dal fantasientìfig Orwell 1984 (1984), in di pagn dal persunàǵ ad Winston Smith prutagunìsta dal rumànś 1984 ad George Orwell, in dal drama 'd Bob Clark Colpo di scena (1987), in còpia cun Judd Nelson, in dal satìric Balle spaziali (1987), parudìa ad Guerre stellari, Star Trek, Alien e Il pianeta delle scimmie, e in dal drama Scandal - Il caso Profumo (1989), in di pagn dal mèdag culaburadōr di servìsi segrét britànig Stephen Ward.

In di an Nuànta 'l à recitâ in dal film ad scarésa Frankenstein oltre le frontiere del tempo (1990), faghénd al dutōr Joe Buchanan, in dla pelìcula dasfurtunàda Cowgirl - Il nuovo sesso (1993), in di pagn ad La Cuntésa, in dal film ad guèra Rob Roy (1995), cun lò ch'l à fat la part dal marchéś ad Montrose, in dal drama Amore e morte a Long Island (1997), in dua al s inamóra 'd Jason Priestley, e in dal fantasientìfig Contact (1997), a fiànc dla Jodie Foster e 'd Matthew McConaughey.

In séguit 'l à catâ spasi in dal film ad scarésa Lost Souls - La profezia (2000), a fiànc dla Winona Ryder e 'd Ben Chaplin, in dal film ad guèra Il mandolino del capitano Corelli (2001), cun la còpia Nicolas Cage/Penélope Cruz, in dal fantàstic Hellboy (2004) ad Guillermo del Toro, in dal film 'd asiòṅ V per Vendetta (2005), insém a Hugo Weaving e a la Natalie Portman, in dal śal Oxford Murders - Teorema di un delitto (2008), in dla part 'd un prufesōr ad lògica ch'al juta al studènt americàṅ Elijah Wood a far luś su di masamènt, e in d'l aventuróś Indiana Jones e il regno del teschio di cristallo (2008) in dua 'l à incruśâ Harrison Ford, la Cate Blanchett, la Karen Allen e Shia LaBeouf.

A 'l arcurdém anc p'r avēr fat la part dal fabricànt ad barchèṅ màgic Garrick Ollivander in di film aventuróś 'd Harry Potter Harry Potter e la pietra filosofale (2001), Harry Potter e i Doni della Morte - Parte 1 (2010), e Harry Potter e i Doni della Morte - Parte 2 (2011).

In di sò film 'l è stâ òṅ di atōr ch'l è mòrt più da spés, trénta-nóṿ vòlti.

Hurt, ch'in dla sò vita al s è spuśâ quàtar vòlti cun dū fiōi, 'l à laurâ in fîṅ a 'l ùltim quànd 'l éra bèla malâ 'd un cànc'r a 'l pàncreas, murénd in dla sò cà in dla cuntèa 'd Norfolk dòp avēr cumpiû da tri dè stanta-sèt an.

Filmugrafìa

[mudéfica la surzéia]
’L óm elefànt (1980)

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=John_Hurt&oldid=168337"