John Dall

C'l artìcul chè 'l è scrit in Miranduléś

John Jenner Thompson, cgnusû méj cuma John Dall (New York, 26 ad Maǵ dal 1920 - Hollywood, 15 ad Śnar dal 1971, a s lèś [dʒɑːn dɔːl] in ingléś) 'l è stâ 'n atōr americàṅ.

Dòp èsar-'s fat i òs a teàtar, 'l à fat al sò debùt a 'l cìnema in dal 1945 in dal drama Il grano è verde faghénd la part 'd un studènt cun dimóndi vója 'd studiàr da la sò mistra Bette Davis in un vilàǵ dal Gàles dal XIX sécul, rōl ch'al g'à frutâ na candidadùra a i Prèmi Òscar. Dū an dòp a 'l ém vist in dal musical Scritto sul vento 'd Irving Pichel a fiànc dla Deanna Durbin mént'r in dal 1948 'l è stâ in dal cast 'd Un'altra parte della foresta ad Michael Gordon. In dal stés an Alfred Hitchcock al 'l à sarnî par far-ag far la part ad Brandon Shaw in dal sò prim film a culōr Nodo alla gola, cun prutagunìsta James Stewart, ch'al tōś spunt da 'l caś dal masamènt Leopold e Loeb, dū śuvnòt ric e inteligènt ch'i ìvan cupâ 'n ragàs ad quatórd'ś an sōl p'r al gust ad far-la franca.

In dal 1950 al rècita in dal noir La sanguinaria in dla part d'n èx militàr c'n un pasâ in rifurmatòri e cun la pasiòṅ par gl'armi da fōg ch'al s mét cun la Peggy Cummins faghénd na bruta fîṅ. Dòp al pulisiésc L'uomo che ingannò se stesso, al taca a lauràr in televiśiòṅ tulénd part a soquànt telefìlm cuma Lights Out e Perry Mason.

I sò ùltim dū film i èṅ di an Ssanta: Spartacus ad Stanley Kubrick (1960), in dla part ad Gaio Claudio Glabro, e Atlantide, il continente perduto (1961), faghénd al catìṿ Zaren.

Dall 'l è mòrt a sinquànt'an par 'n infàrt.

Filmugrafìa

1945 - Il grano è verde (The Corn Is Green), regìa 'd Irving Rapper
1947 - Scritto sul vento (Something in the Wind), regìa 'd Irving Pichel
1948 - Un'altra parte della foresta (Another Part of the Forest), regìa ad Michael Gordon
1948 - Nodo alla gola (Rope), regìa 'd Alfred Hitchcock
1950 - La sanguinaria (Deadly is the Female), regìa ad Joseph H. Lewis
1950 - L'uomo che ingannò se stesso (The Man Who Cheated Himself), regìa ad Joseph H. Lewis
1960 - Spartacus, regìa ad Stanley Kubrick
1961 - Atlantide, il continente perduto (Atlantis, the Lost Continent), regìa ad George Pal

Culegamènt estéran

(IT) Filmugrafìa in s'l IMDb

Àtar prugèt

Wikiquote contiene citazioni di o su John Dall
Wikimedia Commons contiene file multimediali su John Dall