Jessica Lange

C'l artìcul chè 'l è scrit in Miranduléś

La Jessica Phyllis Lange (Cloquet, 20 'd Avrìl dal 1949, a s lèś [ˈdʒɛsɪkə læŋ] in ingléś), l'è n'atōra e èx mudèla americàna.

In dla sò caréra, in dua l'à laurâ a 'l cìnema, in televiśiòṅ e a teàtar, l'è stada bòna 'd vìnsar dū Prèmi Òscar su siē candidadùri, in dal 1983 cuma atōra minga prutagunìsta in Tootsie, esénd in cursa anc cuma prutagunìsta in Frances, e in dal 1995 cuma atōra prutagunìsta in Blue Sky. In dla sò bachéca la pōl cuntàr anc su tri Emmy Award e su sinc Golden Globe.

Biugrafìa

Uriginària dal Minneśòta, la Lange la s diplóma a la Cloquet High School pò in dal 1967 la gh la cava a vìnsar na bórsa 'd studi par tgnir adrē a i cōrs 'd art e futugrafìa a l'Università dal Minneśòta. Chè la cgnós al futógrafar spagnōl Paco Grande ch'al dvènta sò marè in dal 1971. Insém i tàc'n a giràr i Stat Unî e 'l Mèsic su 'n furgunsèṅ, faghénd na vita da bohémien, pò i vàn'n a star a Parì in dua lē la taca a far la mudèla par l'agensìa Wilhelmina Models.

Turnàda a New York in dal 1973 la taca a far la camaréra prima ch'al prudutōr Dino De Laurentiis al la sarìsa par la part dla prutagunìsta in King Kong (1976). In séguit la rècita in na part scrita par lē in All That Jazz - Lo spettacolo comincia (1979) dal mìstar Bob Fosse.

In di an Utànta la cata 'l sucès a Hollywood tulénd part a Il postino suona sempre due volte, pelìcula dal 1981 in dua la gh'à dal séni bujènti cun Jack Nicholson. In dal 1982 la tōś part insém a Dustin Hoffman e a la Geena Davis a 'l film ad Sydney Pollack Tootsie, ch'la gh fruta 'n Òscar, e a 'l film biugràfic Frances in dua la fà la part dl'atōra 'd Seattle Frances Farmer. In cal méntar la s mét insém a 'l regìsta e atōr Sam Shepard.

In dal 1985 la fà la cantànta Patsy Cline in Sweet Dreams, pò la gira Music Box - Prova d'accusa, dū film in dua la ricév na candidadùra a i Òscar.

In di an Nuànta la lavóra cun Martin Scorsese e Robert De Niro in dal thriller Cape Fear - Il promontorio della paura e cun Tony Richardson in Blue Sky, film in dua lē la fà na dóna ch'la denùnsia 'l cunseguénsi di esperimènt nucleàr darènt a di sènt'r abitâ durànt i an Sinquànta.

In dal 2003 la vîṅ sarnìda par Tim Burton par la sò pelìcula Big Fish - Le storie di una vita incredibile pò l'è in dal cast ad Non bussare alla mia porta ad Wim Wenders.

In dal 2011 la gh'à 'n sucès straurdinàri recitànd in dal telefìlm American Horror Story ch'la gh pòrta 'n Golden Globe.