Jean-Claude Van Damme

C'l artìcul chè 'l è scrit in Miranduléś

Jean-Claude Camille François van Varenberg, cgnusû méj cuma Jean-Claude Van Damme (Berchem-Sainte-Agathe, 18 'd Utóbar dal 1960, a s lèś [ʒɑ̃ klod vɑ̃ dam] in francéś e [vɑn ˈdɑmə] in fiamìng) 'l è 'n artìsta marsiàl, atōr, regìsta, senegiadōr, prudutōr ad film e èx culturìsta bèlg.

Da baghét al s è pasiunâ dimóndi a gl'art marsiàli, che lò 'l iva studiâ da quànd al gh'iva déś an ispirànd-'s a Bruce Lee, miténd sù di mùscui e dvintànd 'n as ad brìscula in karate, kickboxing e taekwondo.

In dal 1982 'l è andâ a star a Los Angeles, vindénd la sò palèstra, par tacàr na caréra 'd atōr in di Stat Unî e finalmènt in dal 1986 al gh la cava a far la part dl'antagunìsta rus Ivan Kraschinsky in dal film 'd asiòṅ Kickboxers - Vendetta personale. In séguit 'l à fat la part ad Frank Dux in Senza esclusione di colpi (1988), pelìcula ch'l'è stada bòna 'd muciàr sù sinquànta migliòṅ ad dòlar dòp ès'r-an custàda sōl dū a 'l incìrca. Al pòrti 'd Hollywood i s vèran par Van Damme che acsè al gh'à la manéra 'd èsar prutagunìsta in pelìculi cuma Cyborg, Kickboxer - Il nuovo guerriero, Lionheart - Scommessa vincente e Double Impact - Vendetta finale, in di pagn di śmèi Chad e Alex Wagner.

In dal 1993 Jean-Claude al gira 'l film dramàtic Accerchiato in dua 'l difénd, dvintànd-'n anc 'l amànt, la Rosanna Arquette da 'n speculadōr edilìsi interpretâ par Joss Ackland. I sò film i piàś'n a 'l pùblic e i frùtan dimóndi ma la crìtica la ténd a dar-ag cóntar tant che lò al vîṅ candidâ par dó vòlti a i Razzie Award, vinsénd insém a Dennis Rodman al tìtul par la còpia più lòfi in Double Team - Gioco di squadra (1998).

Dòp un camèo in dal film Last Action Hero - L'ultimo grande eroe cun prutagunìsta Arnold Schwarzenegger, Van Damme al gira al fantasientìfig Timecop - Indagine dal futuro, àtar campiòṅ 'd incàs trat da 'n fumét dla Dark Horse Comics, e pò al fantàstic Street Fighter - Sfida finale a fiànc ad Raúl Juliá e dla Kylie Minogue. In dal 1996 al fà 'l sò debùt da regìsta girànd al drama 'd asiòṅ La prova, in dua 'l rècita a fiànc ad Roger Moore, méntar dū an dòp al tōś part a Hong Kong colpo su colpo, insém a Rob Schneider e a Paul Sorvino, e a 'l drama The Legionary - Fuga all'inferno in du 'l fà 'n suldâ dla legiòṅ furastéra.

In di an Dumìla a 'l arcurdém par Hell - Esplode la furia (2003), in dua 'l fà 'n inśgnēr americàṅ finî in na parśòṅ rusa, e p'r al drama JCVD - Nessuna giustizia (2008) in di pagn d'n atōr bèlg, stuf e in criśi, ch'al tórna in dal sò paéś par pò finìr vitma dna rapìna in 'n ufìsi pustàł dvintànd ustàǵ.

Filmugrafìa

cuma atōr

1979 - Donna tra cane e lupo (Een vrouw tussen hond en wolf), regìa 'd André Delvaux
1984 - Breakdance (Breakin), regìa ad Joel Silberg
1984 - Rombo di tuono (Missing in Action), regìa ad Joseph Zito
1984 - Monaco Forever, regìa ad William A. Levey
1986 - Kickboxers - Vendetta personale (No Retreat, No Surrender), regìa ad Corey Yuen e 'd David Worth
1988 - Senza esclusione di colpi (Bloodsport), regìa ad Newt Arnold
1988 - Aquila nera (Black Eagle), regìa 'd Eric Karson
1989 - Cyborg, regìa 'd Albert Pyun
1989 - Kickboxer - Il nuovo guerriero (Kickboxer), regìa ad Mark DiSalle e 'd David Worth
1990 - Lionheart - Scommessa vincente (Lionheart), regìa ad Sheldon Lettich
1990 - Colpi proibiti (Death Warrant), regìa ad Deran Sarafian
1991 - Double Impact - Vendetta finale (Double Impact), regìa ad Sheldon Lettich
1992 - I nuovi eroi (Universal Soldier), regìa ad Roland Emmerich
1993 - Accerchiato (Nowhere To Run), regìa ad Robert Harmon
1993 - Last Action Hero - L'ultimo grande eroe (Last Action Hero), regìa ad John McTiernan
1993 - Senza tregua (Hard Target), regìa ad John Woo
1994 - Timecop - Indagine dal futuro (Timecop), regìa ad Peter Hyams
1994 - Street Fighter - Sfida finale (Street Fighter), regìa ad Steven E. de Souza
1995 - A rischio della vita (Sudden Death), regìa ad Peter Hyams
1996 - La prova (The Quest), regìa ad Jean-Claude Van Damme
1996 - Maximum Risk, regìa ad Ringo Lam
1997 - Double Team - Gioco di squadra (Double Team), regìa ad Tsui Hark
1998 - Hong Kong colpo su colpo (Knock Off), regìa ad Tsui Hark
1998 - The Legionary - Fuga all'inferno (Legionnaire), regìa ad Peter MacDonald
1999 - Universal Soldier: The Return, regìa ad Mic Rodgers
1999 - Fino all'inferno (Inferno), regìa ad John G. Avildsen
2001 - The Replicant (Replicant), regìa ad Ringo Lam
2001 - The Order, regìa ad Sheldon Lettich
2002 - Derailed - Punto d'impatto (Derailed), regìa ad Bob Misiorowski
2003 - Hell - Esplode la furia (In Hell), regìa ad Ringo Lam
2004 - Narco, regìa ad Tristan Aurouet e 'd Gilles Lellouche
2004 - Wake of Death - Scia di morte (Wake of Death), regìa ad Philippe Martinez
2006 - The Hard Corps, regìa ad Sheldon Lettich
2006 - The Commander (Second in Command), regìa ad Simon Fellows
2006 - Sinav, regìa 'd Ömer Faruk Sorak
2007 - Until Death - Fino alla morte (Until Death), regìa ad Simon Fellows
2008 - The Shepherd - Pattuglia di confine (The Shepherd: Border Patrol), regìa 'd Isaac Florentine
2008 - JCVD - Nessuna giustizia (JCVD), regìa ad Mabrouk El Mechri
2009 - Universal Soldier: Regeneration, regìa ad John Hyams
2010 - Frenchy (The Eagle Path), regìa ad Jean-Claude Van Damme
2011 - Assassination Games - Giochi di morte (Assassination Games), regìa 'd Ernie Barbarash
2011 - Beur sur la ville, regìa ad Djamel Bensalah
2012 - Rzhevskiy protiv Napoleona, regìa ad Marius Vaysberg
2012 - Gli occhi del dragone (Dragon Eyes), regìa ad John Hyams
2012 - I mercenari 2 - The Expendables (The Expendables 2), regìa ad Simon West
2012 - Universal Soldier - Il giorno del giudizio (Universal Soldier: Day of Reckoning), regìa ad John Hyams
2012 - 6 Bullets (Six Bullets), regìa 'd Ernie Barbarash
2012 - U.F.O., regìa ad Dominic Burns
2013 - Benvenuti nella giungla (Welcome to the Jungle), regìa ad Rob Meltzer
2013 - Enemies Closer - Nemici giurati (Enemies Closer), regìa ad Peter Hyams
2014 - Vendetta e redenzione (Swelter), regìa ad Keith Parmer
2015 - Pound of Flesh, regìa 'd Ernie Barbarash
2015 - Jian bing xia, regìa ad Da Peng
2016 - Kickboxer - La vendetta del guerriero (Kickboxer: Vengeance), regìa ad John Stockwell
2017 - Kill 'em All - Uccidili tutti (Kill 'em All), regìa ad Peter Malota
2018 - Kickboxer: Retaliation, regìa ad Dimitri Logothetis
2018 - Black Water, regìa ad Pasha Patriki
2018 - The Bouncer - L'infiltrato (Lukas), regìa ad Julien Leclercq
2019 - We Die Young, regìa ad Lior Geller
2021 - L'ultimo mercenario (Le Dernier Mercenaire), regìa ad David Charhon
2021 - Haters, regìa ad Stéphane Marelli
2024 - Darkness of Man, regìa ad James Cullen Bressack
2024 - Kill Em All 2 (Kill'em All 2), regìa ad Valeri Milev
2025 - The Gardener, regìa ad David Charhon

cuma regìsta

1996 - La prova (The Quest)
2010 - Frenchy (The Eagle Path)

Culegamènt estéran

Àtar prugèt

Wikimedia Commons contiene file multimediali su Jean-Claude Van Damme