Jayne Mansfield

C'l artìcul chè 'l è scrit in Miranduléś

La Vera Jayne Palmer, cgnusùda méj cuma Jayne Mansfield (Bryn Mawr, 19 'd Avrìl dal 1933 - Slidell, 29 ad Śugn dal 1967), l'è stada n'atōra e showgirl americàna, vinsidōra 'd un Golden Globe p'r al film Gangster cerca moglie.

Famóśa p'r i sò cavìi biónd plàtin e p'r al sò fìśic da sex symbol, l'à catâ 'l sucès da atōra durànt i an Sinquànta in dua l'à laurâ anc par Playboy. La sumiliàva dimóndi a la Marilyn Monroe, sò rivàla a 'l cìnema.

L'éra bòna 'd dascórar sinc léngui e 'd sunàr al viulèṅ e 'l piàṅ, inóltar la cgnusìva gl'òvri ad William Shakespeare.

Al sò prim rōl impurtànt a Hollywood 'l è stâ qvél fat in dla cumèdia muśicàla Gangster cerca moglie ad Frank Tashlin dal 1956, an in du la firma 'n cuntràt cun la 20th Century Fox. In séguit la rècita in La bionda esplosiva e in Baciala per me insém a Cary Grant.

In di an Ssanta l'à laurâ anc in Itàglia faghénd un sketch par Caruśèl insém a 'l sò secónd marè Mickey Hargitay e tulénd part a la cumèdia L'amore primitivo cun Franco Franchi e Ciccio Ingrassia. In dal 1962 l'à recitâ in 'n epiśòdi ad L'ora di Hitchcock.

L'è mòrta śōvna insém a i sò caṅ, a trénta-quàt'r an, a séguit d'n incidènt in màchina méntar l'éra drē a 'ndàr a lauràr a New Orleans. In dla sò vita la gh'à abû dimóndi amànt cuma 'l prudutōr Enrico Bomba, al pulìtic Robert Kennedy e gl'atōr Red Buttons, Stuart Whitman, Bobby Darin, Tony Curtis, Robert Wagner, John Wayne, Dean Martin, Tom Tryon, Burt Reynolds, Nicholas Ray, Jeffrey Hunter, Peter Lawford, Nelson Sardelli e àt'r incóra.

La gh'à na stéla in dla Hollywood Walk of Fame.

Umàǵ

Soquànt grup muśicài i gh'aṅ dedicâ di pès: i giapunéś The 5.6.7.8's i aṅ scrit I Walk Like Jayne Mansfield p'r al film Kill Bill: Volume 1 ad Quentin Tarantino, i Siouxsie and the Banshees i aṅ registrâ al sìngul Kiss Them for Me (tìtul 'd un sò film) par 'l àlbum Superstition, gl'L.A. Guns i gh'aṅ dedicâ The Ballad of Jayne mént'r i Sigue Sigue Sputnik i aṅ cantâ Hey Jane Mansfield Superstar p'r arcurdàr-la.

In dal film A Wong Foo, grazie di tutto! Julie Newmar dal 1995, la Vida Boheme (persunàǵ interpretâ par Patrick Swayze) la diś „A m sènt cuma la Jayne Mansfield in cla màchina chè“ in dal méntar ch'la próa na màchina par cumpràr-la. Òṅ di persunàǵ dal film Crash dal 1996 al pésca na mòrt cumpàgna a la sua, faghénd 'n incidènt vistî da dóna insém a 'l sò caṅ. In dal 1987 Freddie Mercury al fà riferimènt a lē in dal vìddeo ad The Great Pretender.

Filmugrafìa

1955 - Tempo di furore (Pete Kelly's Blues), regìa ad Jack Webb
1955 - Voi assassini (Illegal), regìa ad Lewis Allen
1955 - La baia dell'inferno (Hell on Frisco Bay), regìa ad Frank Tuttle
1956 - L'adescatrice (Female Jungle), regìa ad Bruno VeSota
1956 - Gangster cerca moglie (The Girl Can't Help It), regìa ad Frank Tashlin
1957 - Fermata per 12 ore (The Wayward Bus), regìa ad Victor Vicas
1957 - Lo scassinatore (The Burglar), regìa ad Paul Wendkos
1957 - La bionda esplosiva (Will Success Spoil Rock Hunter?), regìa ad Frank Tashlin
1957 - Baciala per me (Kiss Them for Me), regìa ad Stanley Donen
1958 - La bionda e lo sceriffo (The Sheriff of Fractured Jaw), regìa ad Raoul Walsh
1960 - Londra a mezzanotte (Too Hot to Handle), regìa ad Terence Young
1960 - Le rotaie della morte (The Challenge), regìa ad John Gilling
1960 - Gli amori di Ercole, regìa ad Carlo Ludovico Bragaglia
1961 - Testa o croce (The George Raft Story), regìa ad Joseph M. Newman
1962 - Accadde in Atene (It Happened in Athens), regìa 'd Andrew Marton
1963 - Promises! Promises!, regìa ad King Donovan
1963 - Heimweh nach St. Pauli, regìa ad Werner Jacobs
1964 - L'amore primitivo, regìa ad Luigi Scattini
1964 - Panic Button... Operazione fisco! (Panic Button), regìa ad George Sherman, Giuliano Carnimeo
1964 - La morte vestita di dollari (Einer Frisst den anderen), regìa ad Ray Nazarro e 'd Gustav Gavrin
1966 - The Las Vegas Hillbillys, regìa 'd Arthur C. Pierce
1966 - The Fat Spy, regìa ad Joseph Cates
1967 - Single Room Furnished, regìa ad Matt Cimber
1967 - Una guida per l'uomo sposato (A Guide for the Married Man), regìa ad Gene Kelly

Culegamènt estéran

(IT) La sò paśna su 'l IMDb

Àtar prugèt

Wikimedia Commons contiene file multimediali su Jayne Mansfield