Vai al contenuto

Janet Ågren

Da Wikipedia.

C'l artìcul chè 'l è scrit in Miranduléś Emiliàn

La Janet Ågren tòlta śò in dal 1975


La Lena Janet Yvonne Ågren, cgnusùda méj cuma Janet Ågren (Landskrona, 6 'd Avrìl dal 1949), l'è n'atōra e mudèla śvedéśa. Da 'l 1992 l'è andàda a star a Miami dand un taj a 'l sò vèć lavōr par dvintàr n'architéta 'd intèran e designer 'd tesû.

Biugrafìa

La Ågren la taca a lauràr in dal mónd dal spetàcul, ch'l'éra incóra na ragasōla, par via dna sò sîna ch'la l'iscrìv a 'n cuncōrs ad belésa a Cupenàghen ch'l'à pò vins. A darsèt an la taca a far la mudèla, finénd su 'l cupertìni dal rivìsti internasiunàli e laurànd, fra i àtar, par Christian Dior.

Vèrs la fiṅ di an Ssanta la riva in Itàglia par giràr di film, al prim insém a Franco Franchi e Ciccio Ingrassia da 'l tìtul I due crociati (1968) e pò Donne... botte e bersaglieri ad Ruggero Deodato (1968). In dal 1969 la tōś part a Colpo di stato ad Luciano Salce e a Il giovane normale ad Dino Risi, ispirâ a 'n rumànś 'd Umberto Simonetta. In dal 1969 la gira 'l śal ad Lucio Fulci Una sull'altra insém a Jean Sorel, a la Marisa Mell e a l'Elsa Martinelli.

La Janet la firma pò cun la Vides ad Franco Cristaldi ch'al gh fà far la prutagunìsta dóna in di film Io non spezzo... rompo ad Bruno Corbucci (1971) e Io non vedo, tu non parli, lui non sente ad Mario Camerini (1971), qvést chè insém a Enrico Montesano e a Alighiero Noschese. Dòp avēr tacâ a far dal cabaret in di ambînt rumàṅ, in dal 1972 la rècita a Ìschia par Billy Wilder in Che cosa è successo tra mio padre e tua madre?, cumèdia cun Jack Lemmon e Pippo Franco. Sèmp'r in c'l an lè la lavóra cun Ettore Scola in La più bella serata della mia vita, film trat da 'n racònt ad Friedrich Dürrenmatt e interpretâ p'r Alberto Sordi.

In cal perìud lè i vìnan fóra anc soquànti sò pelìculi ispiràdi a 'l filòṅ “decameròtic” cuma Racconti proibiti... di niente vestiti (1972) e Fiorina la vacca (1973). Su 'l set dal prim film, in dua i rècitan anc la Barbara Bouchet e la Magali Noël, la cgnós al prudutōr Carlo Maietto ch'al dvintarà sò marè.

In di an Utànta la gira dal cumèdi insém a di còmig itagliàṅ cuma Teo Teocoli in L'onorevole con l'amante sotto il letto ad Mariano Laurenti (1981), Lino Banfi in Ricchi, ricchissimi... praticamente in mutande ad Sergio Martino (1982), Paolo Villaggio in Sogni mostruosamente proibiti ad Neri Parenti (1982), Renato Pozzetto in Questo e quello ad Bruno Corbucci (1983), Johnny Dorelli in Vediamoci chiaro ad Luciano Salce (1984) e Bud Spencer in Superfantagenio ad Bruno Corbucci (1986).

Sèmp'r in chi an lè la tōś part a soquànti pelìculi ad scarésa cuma Mangiati vivi!, Paura nella città dei morti viventi e Quella villa in fondo al parco.

Filmugrafìa

Mè a n sćiànc briśa... a śbrag (1971)
Racònt pruibî... ad gnint vistî (1972)
Tècnica d'n amōr (1973)
Al sasèṅ 'l à tgnû da part nóṿ pultròni (1974)
Magnâ viṿ! (1980)

Culegamènt estéran

Àtar prugèt

Estratto da "https://eml.wikipedia.org/w/index.php?title=Janet_Ågren&oldid=160144"