Ira von Fürstenberg

C'l artìcul chè 'l è scrit in Miranduléś

La Virginia Carolina Theresa Pancrazia Galdina zu Fürstenberg, cgnusùda méj cuma Ira von Fürstenberg (Róma, 17 'd Avrìl dal 1940 - Róma, 19 ad Favràr dal 2024), l'è stada n'atōra e designer itagliàna, fiōla dal prìnsip Tassilo Fürstenberg e dla Clara Agnelli, surèla 'd Gianni Agnelli, presidènt dla FIAT da 'l 1966 a 'l 2003.

L'à pasâ la sò giuinésa fra Itàglia e Àustria, frequentànd al jet set internasiunàł e faghénd la socialite e la diśegnadōra 'd biśù e presióś. A quìnd'ś an l'à spuśâ 'l nòbil spagnōl Alfonso 'd Hohenlohe-Langenburg, imprendidōr in dal camp dal turìśum dimóndi impgnâ a Marbella. Dòp avēr abû dū fiōi insém, Christoph e Hubertus, la còpia l'à pò divursiâ in dal 1960. In séguit la s è spuśàda cun 'l imprendidōr itagliàṅ Francesco Pignatari dit “Baby” ma pò la s è divìśa sèg soquànt an dòp.

In di an Ssanta l'à tacâ na caréra a 'l cìnema, tulénd part a pelìculi cuma Capriccio all'italiana (1968), insém a la Silvana Mangano, a l'Adriana Asti e a Totò, Matchless (1967), film ad spiunàǵ cun Patrick O'Neal e Donald Pleasence, La battaglia di El Alamein (1969), cun Enrico Maria Salerno, e la cumèdia Il prof. dott. Guido Tersilli primario della clinica Villa Celeste convenzionata con le mutue (1969) cun prutagunìsta Alberto Sordi.

In dal 1970 a l'ém vista in dal śal 5 bambole per la luna d'agosto, a fiànc dl'Edwige Fenech e 'd Howard Ross, in dla cumèdia La prima notte del dottor Danieli, industriale, col complesso del... giocattolo, cun prutagunìsta Lando Buzzanca e la Françoise Prévost, e in Due ragazzi da marciapiede, cun Jean Sorel.

'L an dòp l'à recitâ in dal thriller Giornata nera per l'ariete, insém a Franco Nero e a la Rossella Falk, in dla cumèdia eròtica Homo Eroticus, in dla part dla mujēr ad Bernard Blier, in Le calde notti di Don Giovanni, in dua l'à catâ tré sex symbol cuma l'Edwige Fenech, l'Annabella Incontrera e la Barbara Bouchet, e in La strana legge del dott. Menga, a fiànc dla Sylva Koscina e 'd Aldo Giuffré.

Fra i sò ùltim lavōr a 'rcurdém la pelìcula I baroni (1975), in du la fà la màdar milanéśa 'd Jacques Weber ch'la viṿ in Sicìglia, e Plus beau que moi, tu meurs (1982), film francéś cun Aldo Maccione e Raymond Pellegrin.

In dal 1970 l'à preśentâ al Fèstival 'd Sanremo insém a Nuccio Costa e a Enrico Maria Salerno.