In ostaggio
|
C'l artìcul chè 'l è scrit in
Miranduléś |
 The Clearing | ||
| In ostaggio | ||
 Nivola, la Mirren e la Sagemiller in na figùra dal film | ||
| In ustàǵ 2004 | ||
|---|---|---|
| Regìa: Pieter Jan Brugge | ||
| Scritōr: Pieter Jan Brugge • Justin Haythe | ||
| Atōr: Robert Redford • Willem Dafoe Helen Mirren • Alessandro Nivola • Matt Craven Melissa Sagemiller • Wendy Crewson • Larry Pine Diana Scarwid • Elizabeth Ruscio • Gwen McGee | ||
| Müsica: Craig Armstrong | ||
| Léngua: Ingléś | ||
| Dürä dal film: 95 minüt | ||
| Nasiōṅ: Stat Unî • Régn Unî • Germàgna | ||
In ostaggio (In ustàǵ) 'l è 'n thriller dramàtic americàṅ, britànig e tedésc dal 2004 ad Pieter Jan Brugge trat da 'n fat sucès dabòṅ in Ulànda in dal 1987, al rapimènt d'l óm 'd afâr Gerrit Jan Heijn.
La pelìcula, giràda a Asheville e a Pittsburgh, l'à fat sù dódas migliòṅ e mèś ad dòlar.
Sunt
[mudéfica la surzéia]Wayne Hayes (Robert Redford) 'l è 'n manager ad sucès pîṅ 'd bèsi, al gh'à na vila cun pisìna darènt a Pittsburgh, na mujēr ch'la gh vōl bèṅ, lʼEileen (Helen Mirren), e dū fiōi dvintâ di śuvnòt, Tim (Alessandro Nivola), ch'al s è spuśâ e 'l gh'à 'n putèṅ ch'al gh'à da cómpiar dū an, e la Jill (Melissa Sagemiller).
Na sira, quànd i Hayes i ìvan prugramâ na séna cun di vśèṅ 'd cà, Tom (Larry Pine) e lʼEva (Diana Scarwid), a sucéd che Wayne al sparìs dòp ès'r andâ a lauràr la matìna. Sò mujēr la s mét in pinsēr e la ciàma in ufìsi, ma ninsòṅ a sà gnint ad lò, pò la próa anc a ciamàr sò marè ma 'l telefunèṅ a sòna a vōd. Quànd la dóna la ciàma la pulisìa, a riva 'l agìnt d'l FBI Ray Fuller (Matt Craven) ch'al taca 'l sò indàśin. Al pulisiòt al dmanda a lʼEileen s'la saìva ch'al manager al gh'iva n'amànta ch'la lauràva da lò, la Louise Miller (Wendy Crewson). La dóna la gh diś ad sè, la s éra anc misa 'd acòrd sèg par far-la licensiàr, ma Fuller al gh fà savēr ch'i dū i s éran vist anc dòp.
La famìja la ricév pò un pactèṅ in dua a gh vîṅ dit che Wayne 'l è stâ rapî ma ch'a n gh'è stâ fat gnint, a gh'è anc na registrasiòṅ ad lò in du 'l óm al diś ch'al stà bèṅ. A salta fóra anc la sò màchina, catàda vōda in un garàǵ pùblic.
A rapìr 'l óm 'l è stâ 'n sò vèć dipendènt, Arnold Mack (Willem Dafoe), che pò 'l è stâ lasâ a cà. Dòp un viàś in màchina vèrs al muntàggni dla Pennsylvania, Wayne al vîṅ fat śmuntàr śò par far-ag far un gir in salìda lung un sintēr in di bòsc c'n al maṅ ligàdi. Arnold, ch'al gh'à na pistòla, al gh diś 'd èsar pagâ da na banda ch'la gh'à intensiòṅ ad dmandàr un riscat a la sò famìja e che 'l sò incàrag 'l è sōl qvél ad cunsgnàr-al.
Wayne al taca a far dal dmandi a 'l sò rapitōr ma 'n quèl ch'l al mét dimóndi in pinsēr 'l è 'l fat che lò al s sia fat véd'r in dla ghigna. Al manager al gh la cava a scrìv'r un bijét 'd amōr par sò mujēr, dmandànd a Arnold ad mandàr-al par pòsta na vòlta ch'al 'l arà pasâ a la banda di delinquènt.