In Darkness - Nell'oscurità
|
C'l artìcul chè 'l è scrit in
Miranduléś |
 In Darkness
| ||
| In Darkness - Nell'oscurità | ||
 La Dormer e la Richardson in na figùra dal film | ||
| In Darkness - In dal scûr 2018 | ||
|---|---|---|
| Regìa: Anthony Byrne | ||
| Scritōr: Anthony Byrne • Natalie Dormer | ||
| Atōr: Natalie Dormer • Ed Skrein • Neil Maskell Joely Richardson • James Cosmo • Simon Harvey Jan Bijvoet • Emily Ratajkowski • Amber Anderson | ||
| Müsica: Niall Byrne | ||
| Léngua: Ingléś • Sèrb-Cruàt • Rus | ||
| Dürä dal film: 100 minüt | ||
| Nasiōṅ: Régn Unî • Stat Unî | ||
In Darkness - Nell'oscurità (In Darkness - In dal scûr) 'l è 'n thriller americàṅ e britànic dal 2018 'd Anthony Byrne, ch'al 'l à scrit insém a l'atōra prutagunìsta Natalie Dormer, in alóra la sò muróśa.
Sunt
La Sofia McKendrick (Natalie Dormer) la fà la pianìsta e l'è òrba. La viṿ in 'n apartamènt a Lóndra da siē méś, sóta qvél dna ragàsa sèrba ciamàda Veronique (Emily Ratajkowski). Na sira la l'incróśa in asinsōr e la sò vśina 'd cà, spavintàda da 'n óm ch'al gh tîṅ adrē, la gh admànda ad tgnir in cà sua na sò siàrpa e ch'al parfùm ch'la s mét lē, ch'a la Sofia a gh piàś dimóndi, al s ciàma „òr lìquid“. Méntar la pianìsta la sòna quèl in cà sua, a s sènt un stus a 'l impruvìś: la Veronique l'è vulàda śò da 'l sò balcòṅ murénd su 'l cōlp.
A riva 'l ispetōr Oscar Mills (Neil Maskell) a far-ag dal dmandi parchè al vōl capìr s'la ragàsa la s è tòlta la vita, s'l è stâ 'n incidènt o se qualchidòṅ al l'à cuciàda śò. A s vîṅ a savēr che la śōvna, gravda da soquànti stmani, l'éra la fiōla ad Zoran Radić (Jan Bijvoet), un paramilitàr pîṅ ad bèsi ch'l iva cumbatû in dla guèra in Bòśgna-Erśegòvina e che subìt dòp 'l éra andâ a star in dla capitàł ingléśa par paràr-'s al cûł. Dimóndi buśniàg i gh 'l ànan sèg e anc i rapòrt cun sò fiōla i n éran minga tant bèi anc se pò chi lē, prima 'd murìr, l'iva dmandâ a la Sofia 'd andàr a sunàr al piàṅ durànt na fèsta in dla vila 'd sò pàdar.
Na nòt, turnànd a cà, la Sofia la sènt ch'a gh'è qualchidòṅ dèntar e la và in bagn urbigànd par métar-'s a 'l sicûr. A s trata 'd Marc (Ed Skrein), 'l óm ch'al pascàva la Veronique la nòt dla sò mòrt, ch'l è lè parchè al vōl catàr na ciàṿ USB dla ragàsa. Dòp avēr ravanâ dapartùt in dl'apartamènt dla Radić, chi lò 'l iva pinsâ bèṅ 'd andàr a véd'r in cà dla sò vśina, esénd anc ch'l i à visti dascórar in asinsōr. A n catànd gnint, Marc al s in và ma la ciàṿ l'éra lugàda in dla siàrpa.
Durànt 'l evènt in vila, méntar la Sofia la sòna 'l piàṅ, a s véd Marc dascórar cun sò surèla Alexandra (Joely Richardson), respunsàbila di servìsi 'd sicurésa ad Radić. Al fiōl dla Veronica 'l éra suo, i dū i ìvan tacâ na relasiòṅ. In cal méntar Zoran 'l invìda la pianìsta a bévar quèl insém. 'L è lè ch'la Sofia la próa a métar dal vlèṅ in dal sò bicér ma la n gh la cava minga.
In séguit la śōvna la s véd in un parc cun sò pàd'r adutìṿ Niall (James Cosmo) e la gh dà la ciàṿ USB da lèśar dgénd-ag che la password 'l è fàcil ch'la sia òr lìquid. A s vîṅ a savēr anc al segrét dla Sofia: chi lē da pìcula in Bòśgna-Erśegòvina l'iva vist sò màdar viulentàda e masàda, acsè cuma sò surèla Balma, da i óm ad Radić. Lē l'éra scampàda par miràcul e adès la vōl sōl vindicàr-'s ad lò.