Impulse - I sensi dell'inganno
|
C'l artìcul chè 'l è scrit in
Miranduléś |
 Impulse
| ||
| Impulse - I sensi dell'inganno | ||
 Macfadyen e la Ford in na figùra dal film | ||
| Impûls - I sèns d'l ingàn 2008 | ||
|---|---|---|
| Regìa: Charles T. Kanganis | ||
| Scritōr: Charles T. Kanganis • Eric Belgau | ||
| Atōr: Angus Macfadyen • Willa Ford • Laura Soltis Robert Moloney • Ron Selmour • Marco Soriano | ||
| Müsica: Stu Goldberg | ||
| Léngua: Ingléś | ||
| Dürä dal film: 101 minüt | ||
| Nasiōṅ: Stat Unî | ||
Impulse - I sensi dell'inganno (Impûls - I sèns d'l ingàn) 'l è 'n thriller americàṅ dal 2008 ad Charles T. Kanganis, girâ in Cànada e vgnû fóra diretamènt p'r al marcâ d'l home video.
Sunt
La Claire (Willa Ford), mànager dn'impurtànta agensìa 'd reclàm, l'è śōvna, bèla e pîna 'd bèsi ma la gh'à di prubléma quànd a s trata 'd far sès cun sò marè, al psicòlug Jonathan Dennison (Angus Macfadyen), ch'l è piutòst ingiangulâ sóta i linsōi. Chi lò, quànd l'è óra 'd gusàr, al pénsa sèmp'r a di àtar quèi cuma la pignàta lasàda in sal fōg o a 'l fat ch'l è gelóś esénd ch'i culéga 'd sò mujēr i èṅ tut bèi e pîṅ 'd mùscui anc se lē la gh giùra ch'i èṅ tut fnòć par na mità méntar chi àtar i n sànan briśa 'd ès'r-al.
La Claire, ch'la vōl anc armàgnar gravda, la strulga da tut par psēr far sès cun sò marè. Par śuntàr dal pēv'r a la sò relasiòṅ, la dóna la próa a druàr dla fantaśìa, faghénd finta che sò marè al sia 'n purcùs e pervertî itagliàṅ ciamâ Roberto, e miténd-as di vistidèṅ pruvucànt da rója adòs e dand-ag di apuntamènt par mail. Al ròbi i pàran funsiunàr ma a 'n sèrt punt la Claire la s rénd cònt che 'l óm ch'al và a lèt sèg al n è minga sò marè ma sōl un tisi ch'a gh sumìlia dimóndi, Simon Phillips (Angus Macfadyen). Dòp avēr capî 'l sò śbali, la dóna la 'l dascàrga in quàt'r e quàt'r òt ma chi lò al n è mia tant d'l avìś. Dòp avēr-la piciàda e viulentàda, al s sustituìs a Jonathan faghénd andàr in manicòmi al psicòlug a 'l sò pòst.