Il villaggio delle streghe

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg From a Whisper to a Scream
Il villaggio delle streghe
Villaggio delle streghe.png
La Miriam Byrd-Nethery in na figùra dal film
Al vilàǵ dal strii
1987
Regìa: Jeff Burr
Scritōr: C. Courtney Joyner • Jeff Burr
Darin Scott • Mike Malone
Atōr: Vincent PriceClu GulagerHarry Caesar
Terry KiserRosalind CashCameron Mitchell
Megan McFarlandMartine BeswickRon Brooks
Miriam Byrd-NetheryDidi LanierSusan Tyrrell
Müsica: Jim Manzie
Léngua: Ingléś
Dürä dal film: 99 minüt
Nasiōṅ: Stat Unî


«
S'at pas da cal bandi lè, un cunsìli: MINGA FARMÀR-AT!»
(Tagline dal film)


Il villaggio delle streghe (Al vilàǵ dal strii) 'l è 'n film ad scarésa americàṅ a epiśòdi dal 1987 ad Jeff Burr. In di Stat Unî la pelìcula l'è cgnusùda cun dū nóm: From a Whisper to a Scream e The Offspring.

Sunt

La Katherine White (Martine Beswick), masadōra seriàla 'd Oldfield, un paiśèṅ dal Tennessee, la vîṅ giustisiàda davànti a na giurnalìsta ciamàda Beth Chandler (Susan Tyrrell). Subìt dòp chi lē la và a catàr sò nunòṅ Julian (Vincent Price) par dir-ag che sò anvōda l'è mòrta. Al vèć al gh diś che anc s'la sò parènta la n gh'è piò, a n cambiarà gnint in paéś, ch'i masamènt i cuntinuaràṅ listés parchè l'è l'ària 'd Oldfield ch'la pòrta la gint a cupàr. Par cunvìnsar la giurnalìsta, 'l óm al gh cònta quàt'r epiśòdi sucès in dal pasâ.

Stanley Burnside (Clu Gulager) 'l è 'n put in là c'n i an ch'al viṿ insém a sò surèla Eileen (Miriam Byrd-Nethery), na dóna ch'l'è custréta a far di bagn in dal giàs parchè la gh'à da spés la févra. 'L óm e 'l sò amìg Burt (Terence Knox) i èṅ inamurâ dla stésa dóna, na culéga ciamàda Grace Scott (Megan McFarland). Na sira Stanley al gh la cava a 'ndàr a séna sèg ma pò, quànd al capìs che lē la n in vōl savēr gnint ad lò, al la cópa strusànd-la. Durànt al funeràł, quànd a n gh'è ninsòṅ in dla cambra murtuària, Stanley al n s cuntróla briśa e al la gusa in dla casa da mòrt. Nóṿ méś dòp chi lò al masa anc sò surèla, ch'al n s cumpatìs piò, ma pò al la paga dabòṅ quànd un putèṅ móstar, al fiōl nâ da la ciulàda cun la mòrta, al và a catàr-'l a cà sua.

In di an Sinquànta al delinquènt Jesse Hardwick (Terry Kiser) 'l è tradî da sò mujēr Mary (Katherine Kaden) che, prima 'd mulàr-al, la 'l cunségna a dū sò nemìg, i fradèi Jack (Gene Witham) e Lester McCoy (Tommy Burcher). Chi lōr dū i gh cùr'n adrē e i gh spàran in dla schina, lasànd pò al sò còrp in un padól. Par 'l óm al destîṅ 'l è sgnâ ma a 'l ùltim minùt al vîṅ salvâ da 'n óm ad culōr ch'l al pòrta a cà sua, Felder Evans (Harry Caesar). Par soquànt dè Jesse al pōl punsàr in paś p'r armét'r-as dal tut e, méntar Felder 'l è via, al lèś ad nascòst al sò diàri in du a gh'è scrit ch'al sò salvadōr 'l éra 'n séruv africàṅ ch'al sarvìva i sò padròṅ a Dixie duśènt an prima. S'l è incóra a 'l mónd 'l è parchè al cgnós un rituàł ch'al fà tut al siri, pargànd davànti a dal candéli e a 'n pentagràm, par scampàr in etéran. Jesse al decìd ch'al vōl fargàr-'g al segrét e dònca al strulga 'n piàṅ p'r andgàr-al. Felder però al tórna cun la vója 'd vindicàr-'s ad lò.

In dal 1933 la śōvna Amarrillis Caulfield (Didi Lanier) la và tut al siri a véd'r al spetàcul a 'l luna park 'd un ragàs ch'a gh piàś dimóndi, Steven Arden (Ron Brooks), ch'l è bòṅ ad magnàr al fèr, al vēd'r e 'l laméti sénsa ch'i gh fàgan gnint. La relasiòṅ fra i dū la vîṅ cuntàda a la sò padròna, la dóna sarpènt (Rosalind Cash), da 'n àtar mémbar dal grup, Leonard (Gordon Paddison), un patégul ch'al gh'à 'n tèrs òć in dal pèt. Quànd Steven al mòla la cumpagnìa p'r andàr via cun la sò muróśa e arfàr-as na vita sèg, la dóna sarpènt la dróa la striarìa dla bàmbula vudù par masàr-al. L’Amarrillis l'è pò custréta a tōr al sò pòst in cartlòṅ tacànd a far la puntagùci umàna.

Finìda la guèra 'd secesiòṅ americàna, al sergînt yankee Gallen (Cameron Mitchell) al masa tri suldâ cunfederài (Tony Wright, Mark Hannah e George Davies) ch'i vlìv'n arénd'r-as, pò al spara in dla schina a 'l sò culéga Pike (C. Jay Cox) ch'al vliva turnàr a cà. Insém a àtar dū suldâ al vîṅ pèrò ciapâ da 'n grup ad baghét sudìsta 'd Oldfield cmandâ par Andrew (Thomas Nowell), un masćèṅ ch'al vōl vindicàr-as dal mâł ch'i aṅ fat.

Culegamènt estéran