Il ritorno delle aquile

Da Wikipedia.

C'l artìcul chè 'l è scrit in Miranduléś Emiliàn

The Holcroft Covenant
Il ritorno delle aquile

Caine e la Victoria Tennant in na figùra dal film
Al ritóran dgl'àquili
1985
Regìa: John Frankenheimer
Scritōr: Robert Ludlum • John Hopkins
George Axelrod • Edward Anhalt
Atōr: Michael CaineAnthony AndrewsCarl Rigg
Victoria TennantLilli PalmerMichael Lonsdale
Mario AdorfBernard HeptonAndy Bradford
Müsica: Stanislas Syrewicz
Léngua: IngléśTedéscSèrb
Dürä dal film: 112 minüt
Nasiōṅ: Régn Unî


«
Na sfilaràda 'd tragatèṅ la i mét insém tut.»
(Tagline dal film)


Il ritorno delle aquile (Al ritóran dgl'àquili) 'l è 'n thriller 'd asiòṅ dal 1985 ad John Frankenheimer trat da 'n rumànś Il patto ad Robert Ludlum.

A 'l inìsi al prutagunìsta dal film al gh'iva da èsar James Caan che però, dòp 'l inìsi dal ripréśi tacàdi al 2 ad Luj dal 1984 a Berlîṅ, 'l à mulâ baràca e buratèṅ parchè al n andàva briśa 'd acòrd c'n i prudutōr. In séguit al regìsta al 'l à ringrasiâ p'r avēr-ag fat al rigàl più bèl dla sò caréra, qvél 'd avēr psû lauràr cun Michael Caine.

Sunt

Noel Holcroft (Michael Caine) 'l è 'n americàṅ ch'al fà 'l architét a New York. Sò màdar Althene (Lilli Palmer) la gh'à 'n negòsi 'd lìbar e l'è la védva 'd un generàł naśìsta mòrt in dal 1945.

Un dè Noel al vîṅ ciamâ a Ginévra da 'l banchēr śvìsar Ernst Manfredi (Michael Lonsdale) ch'al gh'à da dar-ag dal nutìsi su sò pàdar. Prima 'd tōr-as la vita vèrs la fîṅ dla secónda guèra mundiàla, durànt i bumbardamènt a Berlîṅ, chi lò 'l iva bandunâ gl'idéi 'd Adolf Hitler, insém a dū sò culaburadōr, e 'l iva fargâ dimóndi bèsi a 'l guèran naśìsta dasfrutànd la sò puśisiòṅ a 'l intéran dal regìm. Par far-as pardunàr di sò śbali 'l iva scrit na létra in du al dmandàva a sò fiōl, e a qvéi di sò culaburadōr ch'i s éran masâ insém a lò, ch'i druìs'n i quàtar migliàrd e mèś ad dòlar lugâ in dal banchi śvisri par dar vita a na fundasiòṅ ch'la faghìs dal bèṅ. Noel, ch'al s éra sèmpar vargugnâ 'd sò pàdar, al decìd ad star-'g e 'l partìs par Lóndra par cgnósar Johann von Tiebolt (Anthony Andrews), giurnalìsta dal The Guardian e àtar mémbar numinâ, e sò surèla Helden (Victoria Tennant). L'atra parsòna ch'la gh'à da far part dal grup 'l è Erich Kessler (Mario Adorf) ch'al fà 'l diretōr 'd urchèstra in Germàgna.

I servìsi segrét britànic dal cmandànt Leighton (Bernard Hepton) i vōl'n èsar sicûr che Holcroft al n vój minga druàr tut chi bèsi lè par di prugèt ligâ a dar fòrsa a 'l ritóran 'd un partî neo-naśìsta. E 'l perìcul al gh'è dabòṅ parchè in gir a gh'è di fanàtig ch'i vrévan ch'a nasìs un Quàrt Reich ma, par far andàr avànti 'l sò piàṅ, i gh'aṅ biśógn che Noel al méta la firma su 'l prugèt dla fundasiòṅ acsè da śblucàr i fónd.

Culegamènt estéran