Il potere dei soldi
|
C'l artìcul chè 'l è scrit in
Miranduléś |
 Paranoia | ||
| Il potere dei soldi | ||
 Gary Oldman e la Davidtz in na figùra dal film | ||
| Al putēr di bèsi 2013 | ||
|---|---|---|
| Regìa: Robert Luketic | ||
| Scritōr: Joseph Finder Jason Hall • Barry L. Levy | ||
| Atōr: Liam Hemsworth • Harrison Ford Gary Oldman • Amber Heard • Embeth Davidtz Lucas Till • Julian McMahon • Josh Holloway Richard Dreyfuss • Angela Sarafyan • Will Peltz | ||
| Müsica: Junkie XL | ||
| Léngua: Ingléś | ||
| Dürä dal film: 106 minüt | ||
| Nasiōṅ: Stat Unî • Ìndia • Frància | ||
Il potere dei soldi (Al putēr di bèsi) 'l è 'n thriller americàṅ, indiàṅ e francéś dal 2013 ad Robert Luketic.
Custâ trénta-sinc migliòṅ ad dòlar, al film al 'n à fat pò sù sōl darsèt e òṅ.
Sunt
[mudéfica la surzéia]Adam Cassidy (Liam Hemsworth) al gh'à vint-sèt an e 'l lavóra par la Wyatt Corporation, na cumpagnìa tecnulògica 'd New York ad Nicolas Wyatt (Gary Oldman), una dal più impurtànti a 'l mónd. Al tîṅ anc adrē a sò pàdar Frank (Richard Dreyfuss) ch'al gh'à di prubléma 'd salùt e ch'al fà fadìga a pagàr al spéśi p'r al sò curi. Dòp na preśentasiòṅ a 'l sò cap 'd un mudèl nóṿ ad telefunèṅ ch'l à pinsâ insém a i sò culaburadōr, Kevin (Lucas Till) e lʼAllison (Angela Sarafyan), al vîṅ licensiâ parchè al sò prugèt, a dita 'd Wyatt, al fava schiva.
Cla nòt lè i tri ragàs i decìdan 'd andàr in na discutéca par VIP druànd la carta 'd crédit aśiendàla che Adam al gh'iva incóra in bisàca. Lè al śōvan al cgnós na ragàsa (Amber Heard) ch'la 'l invìda in dal sò apartamènt par na nòt ad sès ma la matìna dòp chi lē la 'l manda via. Quànd Wyatt al fà a mènt ch'al sò èx dipendènt 'l à spéś na furtùna in discutéca, 'l al fà ciamàr in ufìsi in dua a gh'è anc al sò culaburadōr Miles Meechum (Julian McMahon) e l'espèrta in psiculugìa di cumpurtamènt, la dutōra Judith Bolton (Embeth Davidtz). Wyatt, par srar 'n òć, al gh śibìs di bèsi par far-al lauràr p'r un sò cuncurènt ed èx sòci Jock Goddard (Harrison Ford) ch'l è drē a lauràr a 'l prugèt “Occura”, un telefunèṅ rivulusiunàri ch'al prév spasàr-al via da 'l marcâ, in manéra 'd far spiunàǵ industriàł par lò.
Adam al gh diś ad sè, anc se malvluntéra, parchè al gh'à biśógn ad bèsi. Dasfrutànd i cunsìli dla Judith, al śōvan al gh la cava a catàr un pòst impurtànt in dla cumpagnìa 'd Goddard in dua, fra 'l àtar, a gh lavóra cuma diretōra dal marketing anc la ragàsa cgnusùda in discutéca, lʼEmma Jennings.
Soquànt dè dòp, andànd a catàr sò pàdar, Adam al ricév la vìśita d'n agìnt d'l FBI, Gamble (Josh Holloway), ch'al gh fà savēr che soquànt sò culéga ch'i lavuràvan par la Wyatt Corporation, i èṅ pò stâ catâ mòrt dòp èsar pasâ a la cumpagnìa ad Goddard.