Il letto racconta
|
C'l artìcul chè 'l è scrit in
Miranduléś |
 Pillow Talk | ||
| Il letto racconta | ||
 La Doris Day e Rock Hudson in na figùra dal film | ||
| Al lèt al cònta 1959 | ||
|---|---|---|
| Regìa: Michael Gordon | ||
| Scritōr: Russell Rouse • Clarence Greene Stanley Shapiro • Maurice Richlin | ||
| Atōr: Doris Day • Rock Hudson • Tony Randall Thelma Ritter • Nick Adams • Allen Jenkins Julia Meade • Marcel Dalio • Mary McCarty Lee Patrick • Hayden Rorke • Valerie Allen Perry Blackwell • Jacqueline Beer • Alex Gerry | ||
| Müsica: Frank De Vol | ||
| Léngua: Ingléś • Francéś | ||
| Dürä dal film: 102 minüt | ||
| Nasiōṅ: Stat Unî | ||
Il letto racconta (Al lèt al cònta) l'è na cumèdia americàna dal 1959 ad Michael Gordon ambintàda a New York, vinsidōra dal Prèmi Òscar in dal 1960 par la senegiadùra uriginàla, ólt'r a atri quàtar candidadùri par la Doris Day e la Thelma Ritter, atōra prutagunìsta e minga prutagunìsta, Frank De Vol (culòna sunóra) e culōr.
In dal 2009 cla pelìcula chè l'è stada sarnìda p'r èsar tgnuda dacàt in dal National Film Registry dla bibliutéca dal Cungrès di Stat Unî.
Sunt
[mudéfica la surzéia]La Jan Morrow (Doris Day) l'è n'architéta 'd intèran ch'la viṿ da par lē in 'n apartamènt ad New York, jutàda a far i fat in cà da la sgnōra Alma (Thelma Ritter), da spés cun la ciùca. La dóna la spartìs la lìnea dal telèfun c'n un put femnàr ch'al fà 'l cumpuśidōr, Brad Allen (Rock Hudson), e l'è custréta a catàr sèmp'r ucupâ e a sintìr i dascōrs ch'al fà cun tut al sò dóni, tuti inamuràdi mati 'd lò ch'al l'intórta par bèṅ. Chi lò 'l à anc fat mét'r in dal sò salòt dū butòṅ, òṅ ch'al mét sù 'n disc in dal méntar ch'al sèra la pòrta a ciàṿ e òṅ ch'l arbàlta in autumàtic al divàṅ faghénd-al dvintàr un lèt, ch'i gh fànan còmad quànd al s pòrta a cà na quàlc amànta.
La Jan e Brad i gh'aṅ sénsa savēr-al n'amìg in cumùn, Jonathan Forbes (Tony Randall), ch'l è inamurâ dla Jan che però la n in vōl minga savēr. Durànt na scapàda 'd Jonathan a cà 'd Brad, chi lò al taca a suspetàr ch'la dóna che 'l sò amìg al vrév spuśàr l'è pròpria la dóna ch'la gh l'à sèg par via dal telèfun mai dispunìbil par lē. Al dubi al dvènta 'n quèl sicûr quànd 'l óm, fóra a séna cun na sò amànta nóva, la Marie (Julia Meade), al sènt al sò nóm vdénd la Jan insém Tony (Nick Adams), un ragàs fiōl dna sò cliènta ch'al l'iva da scarusàr a cà.
Brad 'l armàgn culpî da la Jan e 'l taca 'l butòṅ sèg sprand ad vèrar finalmènt na stòria sèria. Par far-al sénsa far-as cgnósar, al càmbia 'l tòṅ dla vōś dgénd-'g ad ciamàr-as Rex Stetson e 'd ès'r un texàṅ cun na manéra 'd far da na vòlta. Frequentànd-as la Jan la s inamóra dabòṅ ad lò ma 'l óm al gh'à da far i cònt cun Jonathan ch'l à magnâ la fója e ch'al n è mia dispòst a mulàr acsè facilmènt, specialmènt parchè Brad 'l è pagâ da lò par scrìv'r-ag dal canti nóvi.