Il ladro di orchidee (film)
|
C'l artìcul chè 'l è scrit in
Miranduléś |
 Adaptation. | ||
| Il ladro di orchidee | ||
.png) La Meryl Streep in na figùra dal film | ||
| Al làdar 'd urchidèi 2002 | ||
|---|---|---|
| Regìa: Spike Jonze | ||
| Scritōr: Susan Orlean • Charlie Kaufman | ||
| Atōr: Nicolas Cage • Meryl Streep • Chris Cooper Tilda Swinton • Roger Willie • Cara Seymour Litefoot • Jay Tavare • Jim Beaver • Doug Jones Brian Cox • Gary Farmer • Curtis Hanson | ||
| Müsica: Carter Burwell | ||
| Léngua: Ingléś • Latìn | ||
| Dürä dal film: 115 minüt | ||
| Nasiōṅ: Stat Unî | ||
Il ladro di orchidee (Al làdar 'd urchidèi) l'è na cumèdia dramàtica americàna dal 2002 ad Spike Jonze, candidàda a quàtar Prèmi Òscar par la senegiadùra minga uriginàla e par l'interpretasiòṅ ad Nicolas Cage, dla Meryl Streep e 'd Chris Cooper ch'l à vins la statṿa cuma atōr minga prutagunìsta.
La pelìcula, ch'la misćia insém rumànś, cupiòṅ e film acsè cuma vita reàla e finsiòṅ, l'à fat sù dagnóra trénta-tri migliòṅ ad dòlar a frònt 'd un cóst ad daśnóṿ.
Sunt
[mudéfica la surzéia]La Susan Orlean (Meryl Streep), giurnalìsta dal New Yorker, l'à péna scrit al lìbar Il ladro di orchidee ch'al cònta la vita dal redneck John Laroche (Chris Cooper), un butànig armàś séns i dènt davànti dòp un ciòc in màchina ch'l è custâ la vita ad sò màdar (Sandra Lee Gimpel). Chi lò 'l à dedicâ tuta la sò vita a pascàr in gir p'r i padói dla Flòrida dgl'urchidèi râri, cuma l'urchidèa fantàśma.
La prudutōra Valerie Thomas (Tilda Swinton), ch'l'à cumprâ i dirìt dal lìbar, la dà 'l incàr'g a 'l scritōr Charlie Kaufman (Nicolas Cage) ad butàr śò na senegiadùra par la pelìcula, dòp al sò lavōr bèla fat p'r Essere John Malkovich cun prutagunìsta al persunàǵ ad John Malkovich (John Malkovich). Charlie, ch'l è dimóndi tìmid ad caràtar, al s mét a lauràr a 'l adatamènt p'r al cìnema dal saǵ dlʼOrlean ma 'l è subìt in criśi parchè al n sà minga 'd in du tacàr esénd ch'a n è minga fàcil cuntàr na stòria c'n al sèntar di fiōr.
A cà sua 'l è rivâ da pôc sò fradèl śmèl Donald (Nicolas Cage) ch'l è 'n senegiadōr anc lò e ch'al gh'à 'n caràtar più sćèt e dirèt dal suo. Méntar Charlie al gh'à 'l blòc dla paśna biànca, Donald invéci 'l è bòṅ 'd andàr avànti c'n al sò scrit ciamâ I Tri destinâ a dvintàr un thriller.
Charlie al próa a 'ndàr a New York par dascórar cun lʼOrlean ma a 'l ùltim al n gh'à minga 'l curàǵ ad vèrar bèc. Dòp avēr tòlt part a 'n seminàri 'd senegiadùra ad Robert McKee (Brian Cox), Charlie al decìd ad ficàr dèntar la sò figùra in dla senegiadùra, qvéla 'd un scritōr ch'al n è minga bòṅ ad scrìvar 'n adatamènt p'r al film Il ladro di orchidee.