Il bacio perverso
|
C'l artìcul chè 'l è scrit in
Miranduléś |
 The Naked Kiss | ||
| Il bacio perverso | ||
 La Towers e Michael Dante in na figùra dal film | ||
| Al baś parvèrs 1964 | ||
|---|---|---|
| Regìa: Samuel Fuller | ||
| Scritōr: Samuel Fuller | ||
| Atōr: Constance Towers • Anthony Eisley Michael Dante • Virginia Grey • Betty Bronson Patsy Kelly • Marie Devereux • Karen Conrad Barbara Perry • Linda Francis • Walter Mathews George Spell • Monte Mansfield • Patty Robinson | ||
| Müsica: Paul Dunlap | ||
| Léngua: Ingléś | ||
| Dürä dal film: 90 minüt | ||
| Nasiōṅ: Stat Unî | ||
Il bacio perverso (Al baś parvèrs), cgnusû in Itàglia anc cuma Il bacio nudo, 'l è 'n film dramàtic americàṅ dal 1964 scrit, dirèt e prudót par Samuel Fuller.
'L è stâ girâ c'n budget ad duśènt-mila dòlar.
Sunt
Stufa 'd far la sòcla p'r al sò prutetōr Farlunde (Monte Mansfield), 'n óm catìṿ ch'al gh'iva tajâ via tut i cavìi faghénd-la 'rmàgnar plada e cun na pirùca in cô, na sira la Kelly (Constance Towers) la s arvòlta sèg dang-ag di cōlp cun la burséta, méntar lò 'l éra imbariàg, par pò scapàr via tulénd-'g i bèsi ch'i gh spétavan.
Avénd paùra che lò al s psis vendicàr sèg, la dóna la và a star in dla sitadìna 'd Grantville par lugàr-as. Dòp na nòt pasàda a far sès par déś dòlar c'n un pulisiòt péna cgnusû, al capitàṅ Griff (Anthony Eisley), chi lò al là śbulógna subìt dòp vèrs al caśèṅ dla sò amìga Candy (Virginia Grey) ch'la pésca sèmpar dal ragàsi nóvi p'r i sò cliènt. La Kelly la capìs però che qvéla lè la n è minga la vita ch'la fà par lē dònca la decìd ad cambiàr mistēr dvintànd n'infarméra in un sèntar par putèṅ daśgrasiâ ch'i n èṅ minga bòṅ ad giràr. In cal méntar l'à tòlt in afìt na cambra in dla cà dla sgnōra Josephine (Betty Bronson), na sarta puta ch'l'iva pardû al sò muróś in guèra.
La Kelly la s cata bèṅ lè parchè la pōl jutàr di putèṅ cuma Kip (Jean-Michel Michenaud) e Tim (George Spell) esénd anc ch'la n in pōl minga avēr di suo. In d'l istitùt la lavóra insém a la Mac (Patsy Kelly), la capa-sala, la Dusty (Karen Conrad) e la Buff (Marie Devereux), fiōla 'd un suldâ mòrt in guèra amìg ad Griff. Chi lē l'è stufa 'd prestàr servìsi lè e l'è prónta a 'ndàr a lauràr da la Candy ch'la gh'à bèla dâ 'n antìsip. Saénd ch'acsè la s ruinarà la vita, esénd-ag bèla pasàda, la Kelly la và da la Candy par dir-'g ad vansàr, pò la gh cùcia in bóca i vint-sinc dòlar ch'l'iva śibî a la Buff.
Durànt na fèsta la cgnós Grant (Michael Dante), un śōvan fiōl dna famìja bèṅ dal pòst e amìg da sèmp'r ad Griff. Chi lò al sà 'l fat suo, al dascór bèṅ, al gh'à na cultùra anc in fat ad lìbar e a gh piàś giràr p'r al mónd 'd in dua al pòrta sèmp'r a cà di rigài par tut. I dū i s inamóran e 'l óm al gh dà la ciàṿ dla sò vila cuma sìmbul dal fat ch'al fà dabòṅ. La dóna la s lasa andàr, la vōl èsar libra 'd sugnàr anca lē, ad tacàr finalmènt na stòria 'd amōr cum a ś dév dòp tut cgl'aventùri 'd sès sénsa afèt e interès da part ad chi óm. Quànd però Grant al gh dà 'l prim baś, la Kelly la sènt ch'a gh'è quèl ch'a traśa, a gh pâr un baś parvèrs, in tut al manéra la lasa pèrd'r al sò istìnt par cuntinùar la stòria sèg. La dóna in séguit la gh cunfèsa che na vòlta la fava la putàna ma a Grant a n gh in 'nterèsa minga tant ch'al gh dmanda ad spuśàr-al. La dóna la gh diś ad sè.
In cal méntar, par jutàr la Buff ch'l'éra armàśa insìnta sénsa èsar spuśàda, la Kelly la gh ślunga di bèsi abû da Grant par far-ag tgnir al putèṅ.
La Kelly un dè la decìd ad far na surpréśa a 'l sò muróś par far-ag véd'r al vistî ad nòsi ch'l'iva sarnî. Rivàda là la 'l bèca a far di śuglèṅ malnét cun na putìna che pò la sarév anc sò anvōda, la Bunny (Betty Robinson). La Kelly l'è sóta shock méntar la baghéta la scapa via. Grant al gh davśìna dgénd che lē la capirà incòsa séns àtar parchè i èṅ tut dū di parvèrs, lò pedòfil e lē na putàna, dònca na còpia parfèta. La Kelly la véd tut i sò sógn sćiancàr-'s a 'l impruvìś e la s sènt tradìda davànti a 'n brut fat dal gèrar. La ciàpa la curnéta dal telèfun e 'l al culpìs in ghigna cupànd-al.
Quànd la vîṅ interugàda da Griff tut 'l è cónt'r ad lē. La n sà minga arcgnósar la putìna, Farlunde e la Candy i gh testimònian cóntar, anc invintànd-as di fat parchè i vōlan far-'g-la pagàr, e anc la Buff che lē l'à jutâ dimóndi, la n gh'à minga 'l curàǵ ad dir-ag 'd avēr abû di bèsi da lē parchè la n vōl minga ch'a s sava in gir che lē la s éra misa a far la scaja armagnénd insìnta.
Griff al pénsa che la Kelly la pòsa avēr masâ al sò amìg parchè lò al n vliva piò spuśàr-la, al fat che lē na vòlta la fus na dunàsa ad sicûr al n è minga un quèl ch'a vaga da la sò banda.