I peccatori di Peyton
|
C'l artìcul chè 'l è scrit in
Miranduléś |
 Peyton Place | ||
| I peccatori di Peyton | ||
 La Terry Moore e Barry Coe in na figùra dal film | ||
| I pcadōr ad Peyton 1957 | ||
|---|---|---|
| Regìa: Mark Robson | ||
| Scritōr: John Michael Hayes • Grace Metalious | ||
| Atōr: Lana Turner • Hope Lange • Lee Philips Lloyd Nolan • Arthur Kennedy • Russ Tamblyn Terry Moore • Diane Varsi • David Nelson Barry Coe • Betty Field • Mildred Dunnock | ||
| Müsica: Franz Waxman | ||
| Léngua: Ingléś | ||
| Dürä dal film: 157 minüt | ||
| Nasiōṅ: Stat Unî | ||
I peccatori di Peyton (I pcadōr ad Peyton) 'l è 'n film dramàtic americàṅ dal 1957 ad Mark Robson, candidâ a nóṿ Prèmi Òscar e a dū Golden Globe. Al gh'à abû 'n séguit in dal 1961 c'n i stés persunàǵ ma c'n un cast dal tut difarènt, Ritorno a Peyton Place.
Girâ c'n un budget fra 'l migliòṅ e òt e i dū migliòṅ e dū, al film al 'n à pò fat sù da piò ad vint-sinc.
Sunt
[mudéfica la surzéia]
In dla sitadìna 'd Peyton Place, in dal New England, la Nellie (Betty Field) la tira avànti faghénd i fat in dla cà dla Constance MacKenzie dita Connie (Lana Turner) ch'la gh'à na butéga ch'la vénd di vistî. Dòp avēr abû tri fiōi da 'l sò vèć marè, Paul (William Lundmark), la Selena (Hope Lange) e Joey (Scotty Morrow), la s è cumpagnàda cun Lucas Cross (Arthur Kennedy), 'n imbariagòs viulènt ch'al fà 'l bidèl in dla scóla dal paéś. Stuf dna vita 'd miśèria e dal védar sèmpar sò màdar ch'la li tōś, Paul al decìd 'd andàr via 'd cà.
La Selena, ch'l'à tacâ a lauràr part time in dal negòsi dla Connie, l'è l'amìga mijōra 'd sò fiōla, lʼAllison (Diane Varsi), na ragàsa cun la pasiòṅ par la scritùra ch'l'è dimóndi ligàda a la figùra 'd sò pàdar ch'la n à mai cgnusû, esénd mòrt quànd la gh'iva dū an. Chi lē la vrév èsar più libra ad far qvél ch'la vōl, litgànd-as dal vòlti cun sò màdar ch'l'è piutòst a l'antìga.
LʼAllison e la Selena i èṅ drē a diplumàr-'s a la Peyton Place High School, in du 'l è péna rivâ 'n insgnànt ad létri ciamâ Michael Rossi (Lee Philips), numinâ prèsid da 'l presidènt dal cunsìli dla scóla, Leslie Harrington (Leon Ames), a dscàpit dla mistra Elsie Thornton (Mildred Dunnock) ch'la gh cuntàva dimóndi. Michael al buta subìt 'l òć adòs a la Connie tacànd a far al muscòṅ sèg ma la dóna la gh'à 'n segrét ch'la n à mai cuntâ a ninsòṅ, gnanc a sò fiōla: chi lē la n è minga na védva a dir dabòṅ, ma na ragàsa màdar, fargàda da 'l pàdar dlʼAllison ch'al n gh'iva minga dit 'd èsar spuśâ quànd 'l à tacâ na relasiòṅ sèg, par pò lasàr-la. 'L è par cal mutìṿ chè che la Connie la n s è mai misa cun di àt'r óm.
I àtar ragàs dla cumpagìa i èṅ la Betty Anderson (Terry Moore), ch'la s cumpòrta cuma na malnéta, al sò muróś Rodney (Barry Coe), ch'al gh'à da far sèmpar qvél ch'a gh diś sò pàdar Leslie, al studióś Norman Page (Russ Tamblyn), un ragàs ch'al piàś a lʼAllison ma ch'l è piutòst tìmid e ch'al gh'à na màdar ch'la gh stà sèmp'r adòs, e Ted Carter (David Nelson), muróś dla Selena ch'al vrév studiàr da avucàt dòp al diplòma.
Soquànt dè dòp, méntar Lucas 'l è da par lò in cà cun la Selena, 'l óm al la viulénta e la ragàsa l'armàgn insìnta. Chi lē la n diś gnint a ninsòṅ a part al dutōr Matthew Swain (Lloyd Nolan) parchè la vrév aburtìr, un quèl cóntar la léǵ. Al mèdag al vîṅ a savēr da lē ch'al respunsàbil 'l è 'l sò padrìgn, dònca al decìd 'd andàr da lò a far-ag firmàr na carta in du lò al cunfèsa incòsa, cun 'l impégn 'd a n dir gnint a la pulisìa se lò al prumét ad lasàr Peyton Place. In cal méntar però la Nellie, turàda a cà, la sènt tut e la decìd ad tōr-as la vita p'r al dulōr.
Quànd i giapunéś i bumbàrdan Pearl Harbor e i Stat Unî i vìnan tirâ dènt'r a la secónda guèra mundiàla, i ragàs dal paéś i partìsan p'r al frònt. Rodney, ch'l iva spuśâ 'd nascòst la Betty, al mōr in batàja. Anc Lucas, ch'l éra sparî cuma prumìs lasànd la Selena e Joey da par lōr, 'l è partî par far al suldâ ma durànt na licènsa p'r al fèsti 'd Nadâł al tórna a Peyton Place par catàr la Selena. Durànt na discusiòṅ sèg, 'l óm al gh salta adòs incóra ma la ragàsa la gh la cava a ciapàr un bastòṅ e a cupàr-al par pò saplìr-'l in giardèṅ.
La Selena la cuntìnua 'l sò lavōr da la Connie ch'in cal méntar l'à decìś ad mét'r-as c'n al prèsid. La butgàra adès la viṿ da par lē esénd che lʼAllison l'è andàda a star a New York dòp n'atra quistiunàda sèg. Quànd la Selena la gh cònta 'd avēr masâ 'l sò padrìgn, la Connie l'è custréta a dir tut a la pulisìa. La ragàsa la finìs acsè a prucès e 'l ròbi i s métan mâł par lē. A gh sarév cla carta cun la cunfesiòṅ ad Lucas ch'al gh'à 'l dutōr Swain ma la Selena la n vōl minga ch'la salta fóra parchè la gh'à paùra dal scàndal.