Hollywood Walk of Fame

C'l artìcul chè 'l è scrit in Miranduléś

La Hollywood Walk of Fame (a s lèś [ˈhɒlɪwʊd wɔːk əv feɪm] in Ingléś, literalmènt: Paséǵ dla fama 'd Hollywood) 'l è parscōrs al dū marciapē bèi lung ch'i cùran lung quìndas iśulâ (blocks) dla Hollywood Boulevard e a tri iśulâ dla Vine Street su la culìna 'd Hollywood a Los Angeles (Stat Unî). 'L ènt ch'al gh tîṅ adrē l'è la Cambra 'd Cumèrs 'd Hollywood, da n'idéa vgnuda in di an Sinquànta e misa in òvra da i an Ssanta in avànti.

Lung chi marciapē chè i s càtan dimóndi stéli dedicàdi a di persunàǵ famóś dal mónd dal spetàcul ch'i s èṅ fat unōr in dla sò vita in di camp dal spòrt (śuntâ in dal 2023), dal cìnema (ch'al mùcia insém al 47% di premiâ), dla mùśica, dla ràddio, dal teàtar (śuntâ in dal 1984) e dla televiśiòṅ.

In dal stéli, misi lè p'r arcurdàr-i par sèmpar a 'l intéran 'd matunèli quadràdi fati 'd teràs a la venesiàna e utòṅ, a gh'è 'l nóm d'l artìsta e 'n sìmbul ch'al figùra al sò camp artìstic.

'D in alóra a vgnir a 'l 2025 al stéli misi in dla Walk of Fame i èṅ stadi da piò ad dumìla-e-utsènt, miténd insém atōr, regìsta, muśicìsta, invintōr e óm 'd afâr, ma anc persunàǵ ad fantasìa, cuma Batman e la rana Kermit, di cartòṅ animâ, cuma The Simpsons, o bèsti, cuma Rin Tin Tin o Lassie.

A gh'è di artìsta ch'i gh'aṅ anc dó stéli, una cuma mémbar 'd un grup muśicàł e una da par lōr (cuma John Lennon ch'al cumparìs anc in di Beatles) ma anc di persunàǵ ch'i aṅ fat strada in più camp cuma Frank Sinatra (mùśica e cìnema).

Fra i persunàǵ dal nòstri bandi, al gh'à na stéla 'l tenōr mudnéś Luciano Pavarotti ma in dal Luj dal 2025 i aṅ decìś ad dar-'n una anc a 'l fraréś Carlo Rambaldi, respunsàbil di efèt speciài p'r al cìnema cuma in di film Alien e E.T. l'extra-terrestre in du 'l à anc vins un Prèmi Òscar.

Tut i an i èṅ déś migliòṅ a 'l incìrca i turìsta ch'i la vàn'n a védar.