Ho sposato una strega
|
C'l artìcul chè 'l è scrit in
Miranduléś |
 I Married a Witch | ||
| Ho sposato una strega | ||
 La Lake e Fredric March in na figùra dal film | ||
| A-j-ò spuśâ na stria 1942 | ||
|---|---|---|
| Regìa: René Clair | ||
| Scritōr: Robert Pirosh • Marc Connelly Thorne Smith • Norman Matson • René Clair André Rigaud • Dalton Trumbo | ||
| Atōr: Fredric March • Veronica Lake • Nora Cecil Robert Benchley • Susan Hayward • Eily Malyon Cecil Kellaway • Elizabeth Patterson • Mary Field Robert Greig • Robert Warwick • Viola Moore | ||
| Müsica: Roy Webb | ||
| Léngua: Ingléś | ||
| Dürä dal film: 77 minüt | ||
| Nasiōṅ: Stat Unî | ||
Ho sposato una strega (A-j-ò spuśâ na stria) l'è na cumèdia americàna in biànc e négar dal 1942 ad René Clair, numinàda a i Prèmi Òscar par la culòna sunóra ad Roy Webb. La pelìcula, ch'l'à ispirâ la série televiśìva Vita da strega e i film Vita da strega (2005) cun la Nicole Kidman e, anc se minga ufisialmènt, la cumèdia Mia moglie è una strega (1980) cun l'Eleonora Giorgi e Renato Pozzetto, l'è stada prudóta par la Paramount Pictures e pò distribuìda par la United Artists.
Su 'l set la tensiòṅ fra i artìsta l'è stada bèla élta: al senegiadōr Dalton Trumbo 'l à lasâ 'l film a mità dòp ès'r-as litgâ c'n al prudutōr Preston Sturges ch'a sò vòlta 'l à mulâ baràca e buratèṅ parchè al n andàva briśa 'd acòrd c'n al regìsta francéś René Clair. Al prutagunìsta dal film al gh'iva da èsar Joel McCrea ma chi lò al s è tirâ indrē a 'l ùltim parchè al n vliva minga lauràr a fiànc dla Veronica Lake ch'l'éra stada la sò partner in I dimenticati d'l an prima. Anc cun 'l atōr nóṿ Fredric March la Lake la gh'à abû di prubléma, cun lē ch'la gh fava di dispèt méntar lò al dascurìva mâł ad lē.
In dla versiòṅ itagliàna dal film soquànt nóm di prutagunìsta i èṅ stâ itaglianiśâ, esénd i an dal fasìśum, cuma la Jennifer ch'l'è diventàda Irene, Daniel ch'l è svintâ Daniele, lʼEstelle ch'l'è dvintàda Stella e la Margaret ch'l'è dvintàda Valeria.
Sunt
In dal 1672 a Salem (Massachusetts), lʼIrene (Veronica Lake) e Daniele (Cecil Kellaway), na stria e sò pàdar striòṅ, i èṅ bruśâ viṿ da 'l giùdas Wolley (Fredric March) ch'al vîṅ maladî da lōr insém a tuta la sò rasa ch'la vgnarà. Al séndri i èṅ saplìdi a i pē 'd un róvar in manéra ch'i dū spìrit i pòs'n armàgnar lè insaplâ fra 'l lunghi raìś par sèmpar.
Duśènt-stant'an dòp, a séguit dna silta ch'la culpìs i ram dal róvar, i spìrit in fum dlʼIrene e 'd Daniele i èṅ finalmènt lìbar e i pōlan turàr a vìvar rincarnànd-as cun 'l ajùt dal vampi ch'i gh'aṅ tòlt la vita in alóra ma ch'adès i pōlan dar-'g-la indrē. LʼIrene la vîṅ salvàda da 'l fōg da Wallace Wolley (Fredric March), anvōd a la luntàna dal giùdas ch'al l'iva cundanàda. Chi lò adès 'l è candidâ a dvintàr al guvernadōr dal stat cun 'l apòǵ d'l editōr J.B. Masterson (Robert Warwick), pàdar dla sò muróśa Stella (Susan Hayward) ch'al gh'à da spuśàr al dè prima dgl'elesiòṅ anc s'la n è minga tant gustóśa a dir dabòṅ.
LʼIrene e Daniele i decìd'n ad far-'g-la pagàr e la dóna la prepàra na brudàja paciûg par striàr-al e far-'l inamuràr ad lē. Ma pò a finìs ch'al bicēr la 'l bév lē e dònca 'l efèt 'l è 'l eśàt cuntràri. La dóna la próa a tiràr-al da la sò banda ma 'l dè dal matrimòni 'l è bèla rivâ. E pò a gh'è sò pàdar ch'al n véd minga bèṅ 'l amōr fra sò fiōla e Wolley.