Hanno fatto di me un criminale
|
C'l artìcul chè 'l è scrit in
Miranduléś |
 They Made Me a Criminal | ||
| Hanno fatto di me un criminale | ||
 Rains, la Dickson e Garfield in na figùra dal film | ||
| I aṅ fat ad mè 'n criminàł 1938 | ||
|---|---|---|
| Regìa: Busby Berkeley | ||
| Scritōr: Bertram Millhauser Sig Herzig • Beulah Marie Dix | ||
| Atōr: John Garfield • Claude Rains • Ann Sheridan Gloria Dickson • May Robson • Bobby Jordan Billy Halop • Leo Gorcey • Bernard Punsly Gabriel Dell • Huntz Hall • Barbara Pepper John Ridgely • William B. Davidson • Ward Bond | ||
| Müsica: Max Steiner | ||
| Léngua: Ingléś | ||
| Dürä dal film: 92 minüt | ||
| Nasiōṅ: Stat Unî | ||
Hanno fatto di me un criminale (I aṅ fat ad mè 'n criminàł) 'l è 'n film dramàtic americàṅ dal 1938 ad Busby Berkeley, girâ in biànc e négar.
A s trata d'n arfacimènt dna pelìcula dal 1933 da 'l tìtul La seconda aurora cun la Loretta Young.
Sunt
[mudéfica la surzéia]Johnnie Bradfield (John Garfield) 'l è 'n campiòṅ ad pugilâ ad New York ch'al s fà pasàr a 'l sò pùblic cuma 'n brâṿ ragàs, dimóndi ligâ a sò màdar e sénsa visi, ma invéci al ròbi i n stànan minga acsè parchè sò màdar l'è mòrta da di an e a lò a gh piàś dimóndi alvàr al gòmat. Durànt na fèsta c'n al sò manager Lenihan (Ward Bond), cun la sò muróśa ciamàda Goldie West (Ann Sheridan), e dū amìg ad chi lē, la Budgie Massey (Barbara Pepper) e Charlie Magee (John Ridgely), a Bradfield a gh scapa dit da imbariàg la véra. Purtròp par lò Charlie ad mistēr al fà 'l giurnalìsta e 'l gh'à intensiòṅ ad far 'n artìcul su 'l bali ch'l à sèmpar cuntâ. Lenihan al s quistióna sèg, tirànd-ag na śbutiliàda in cô, masànd-al sénsa vlēr.
P'r a n finìr a prucès, al manager al scapa via cun la Goldie ch'la pasa da la sò banda. Lenihan prima ad lasàr 'l apartamènt al pòrta via di bèsi e 'l arlói a Bradfield cun lò ch'al n pōl far gnint parchè 'l è ciùc su 'l divàṅ, tintànd acsè ad dar-ag la cólpa dal masamènt, ma durànt 'n inseguimènt cun di vìgii, parchè i dū i andàvan fòrt cun la màchina, i fànan 'n incidènt, murénd bruśâ viṿ.
Méntar Johnnie al próa a cambiàr vita druànd al nóm fals ad Jack Dorney, scapànd in Ariśòna p'r a n èsar minga ciapâ, la pulisìa l'è sicûra ch'al còrp carbuniśâ al sia pròpria 'l suo parchè su 'l pōls ad Lenihan i aṅ catâ 'l sò arlói. Sōl al detective Monty Phelan (Claude Rains) al sènt pusa 'd bruśâ e 'l è cuntràri a saràr al caś.
Johnnie al finìs sénsa fòrsi in dal ranch di Rafferty e piàn piàṅ al s fà amìg dla Peggy (Gloria Dickson), 'd sò fradèl śōvan Tommy (Billy Halop) e 'd sò nunóna (May Robson). La famìja la gh'à in afidamènt soquànt ragasōi cun di prubléma cun la giustìsia: Angel (Bobby Jordan), Spit (Leo Gorcey), Dippy (Huntz Hall), T.B. (Gabriel Dell) e Milty (Bernard Punsly) ch'in dla faturìa i pōlan riscatàr-as laurànd sòdi in di camp ad dàtui. Al sógn ad Tommy, ch'al stravéd par Johnnie, 'l è qvél ad cumpràr na pómpa 'd benśìna ma a pâr un quèl impusìbil parchè la sò famìja l'è in buléta.