Halle Berry

C'l artìcul chè 'l è scrit in Miranduléś

La Maria Halle Berry, cgnusùda méj sōl cuma Halle Berry (Cleveland, 14 'd Agóst dal 1966, a s lèś [ˈhæli ˈbɛɹi] in ingléś), l'è n'atōra e mudèla americàna, famóśa p'r avēr fat la part dla Timpèsta in soquànt film trat da i fumét dla Marvel Comics di X-Men.

In dla sò caréra l'è stada bòna 'd vìns'r un Prèmi Òscar e 'n Ōrs 'd Argìnt a 'l 52^śum Fèstival 'd Berlîṅ par la part da prutagunìsta in dal drama sentimentàł Monster's Ball - L'ombra della vita, a fiànc ad Billy Bob Thornton e 'd Heath Ledger. La gh'à anc na stéla in dla Hollywood Walk of Fame, ólt'r a 'n Golden Globe e 'n Emmy Award vins p'r al film TV Vi presento Dorothy Dandridge (1999).

Bigrafìa

Uriginària d'l Ohio, da pìcula l'à patî la separasiòṅ di sò genitōr, n'infarméra biànca e 'n autìsta nég'r ad bus, quànd la gh'iva quàt'r an. A vint an l'à vins al tìtul ad Miss Ohio USA e pò l'è rivàda sèsta a Miss Mónd. A la fîṅ di an Utànta l'è andàda a star a Chicago par far la mudèla e l'atōra, tacànd da 'l telefìlm Living Dolls in du lē la fava la part dlʼEmily Franklin. Al sò prim film a 'l cìnema 'l è stâ Jungle Fever (1991) cun prutagunìsta Wesley Snipes e l'Annabella Sciorra. In chi an lè a l'ém pò vista in dla cumèdia Il principe delle donne (1992), in còpia cun Eddie Murphy, in I Flintstones (1994), pelìcula trata da 'n cartòṅ animâ 'd Hanna & Barbera, e in dla cumèdia négra Bulworth - Il senatore (1998) in dla part dna ragàsa ch'la s fà amìga cun Warren Beatty, senadōr anti-cunfurmìsta.

In dal 2000 l'è prutagunìsta dal film fantàstic X-Men faghénd la mutànta Timpèsta, rōl ch'la farà incóra anc in X-Men 2 (2003), X-Men - Conflitto finale (2006) e X-Men - Giorni di un futuro passato (2014). Dòp 'l Òscar vins cun Monster's Ball - L'ombra della vita (2001), la gira 'l film ad spiunàǵ La morte può attendere, faghénd la “Bond Girl” Giacinta Johnson dita Jinx in còpia cun Pierce Brosnan, al thriller Gothika (2003), insém a Robert Downey Jr. e a la Penélope Cruz, e pò a fiànc dla Sharon Stone al flòp Catwoman tri an dòp, in di pagn dla Dóna Gat. Par cla part chè l'è andàda a lesiòṅ p'r imparàr a druàr la scùria, nuànta minùt a la stmana 'd alenamènt. In dal 2007 l'à recitâ in dal thriller Perfect Stranger, cun Bruce Willis e Giovanni Ribisi.

In séguit l'à tòlt part a la cumèdia sentimentàla Capodanno a New York (2011), in dla part dn'infarméra ch'la lavóra in repàrt insém a Robert De Niro, a Comic Movie (2013), film fat miténd insém sédas curtrumetràǵ ad regìsta difarènt, e a 'l drama Bruised - Lottare per vivere, pelìcula in du la fava anc la regìsta.

Da sèmp'r ad sinìstra, la Berry la s è spuśàda tré vòlti par pò divursiàr sèmpar. Da 'l sò ùltim marè, 'l atōr francéś Olivier Martinez, la gh'à abû na fiōla nada in dal 2008, la Nahla Aubry. Da 'l 2020 la stà c'n al cantànt Van Hunt.