Grace Kelly
|
C'l artìcul chè 'l è scrit in
Miranduléś |
La Grace Kelly (Filadèlfia, 12 ad Nuvémbar dal 1929 - principâ 'd Mònag, 14 ad Setémbar dal 1982) l'è stada na mudèla e atōra americàna, pò dvintàda la Prinsipésa Grace ad Mònag dòp al sò matrimòni cun Rainēr III ad Mònag ch'a gh'è stâ al 19 'd Avrìl dal 1956. Insém i gh'aṅ abû tri fiōi: la Carulìna 'd Mònag, Albèrt II ad Mònag, pò dvintâ prìnsip dòp la mòrt ad sò pàdar, e la Stéphanie 'd Mònag.
Prima in di an Sinquànta la Grace l'éra na stéla a Hollywood. L'éra stada bòna 'd vìns'r al Prèmi Òscar dal 1955 p'r al film La ragazza di campagna dòp n'atra canduidadùra par Mogambo, recitâ insém a Clark Gable. L'è arcurdàda specialmènt p'r avēr laurâ in tri film 'd Alfred Hitchcock ch'al la ciamàva „giàs bujènt“: Il delitto perfetto, La finestra sul cortile e Caccia al ladro, pelìcula ambintàda pròpria in dal principâ 'd Mònag, pòst in dua lē l'à cgnusû al prìnsip Grimaldi.
L'è mòrta a sinquànta-dū an dòp avēr abû 'n incidènt in màchina ch'la guidàva lē. Sò fiōla Stéphanie, ch'l'éra sèg, la s è invéci salvàda.
Filmugrafìa
- 1951 - 14ª ora (Fourteen Hours), regìa 'd Henry Hathaway
- 1952 - Mezzogiorno di fuoco (High Noon), regìa ad Fred Zinnemann
- 1953 - Mogambo, regìa ad John Ford
- 1954 - Il delitto perfetto (Dial M for Murder), 'd Alfred Hitchcock
- 1954 - La finestra sul cortile (Rear Window), regìa 'd Alfred Hitchcock
- 1954 - La ragazza di campagna (The Country Girl), regìa ad George Seaton
- 1954 - Fuoco verde (Green Fire), regìa 'd Andrew Marton
- 1954 - I ponti di Toko-Ri (The Bridges at Toko-Ri), regìa ad Mark Robson
- 1955 - Caccia al ladro (To Catch a Thief), regìa 'd Alfred Hitchcock
- 1956 - Il cigno (The Swan), regìa ad Charles Vidor
- 1956 - Alta società (High Society), regìa ad Charles Walters
- 1982 - Rearranged, regìa ad Robert Dornhelm - minga finî