Gnòc frit
|
C'l artìcul chè 'l è scrit in
Miranduléś |
Al gnòc frit (grocco fritto in itagliàṅ) 'l è 'n magnàr tìpic dla pruìnsa 'd Mòdna e dla pruìnsa 'd Réś e dla tradisiòṅ emigliàna in generàł tant ch'al s cata anc in atri parti dla regiòṅ o in di pòst lè darènt cun di nóm difarènt cuma carsinténa a Bulógna, chisulén a Piasénsa, pinsìn a Mantṿa e Frara o torta frita a Parma.
Al fat ch'a gh sia dènt'r al dastrùt al prév far pinsàr ch'la risèta la gh'àppia urìgin da i lungubàrd.
La risèta
A 'l inìsi a gh'è da far 'n impàst misćiànd insém dla farìna biànca téndra 'd furmènt 00, dal sâł, òli 'd ulìva, un bicirèṅ 'd àqua ch'la friś e dal lat, pò a gh'è da lasàr-al punsàr p'r almànc n'óra, quaciànd-al c'n un buràs o na scudèla.
In séguit cun na canèla a s tira 'l impàst su 'n tulēr in fiṅ a 'd far-al dvintàr sutìl (da 2 a 6 mm). A cal punt lè 'l al s taja faghénd di pès lung da 10 a 15 cm, a fórma 'd rómb o 'd retàngul. Chi pès lè i vànan frit in d'l òli bujènt o in dal dastrùt in fiṅ tant ch'al gnòc a taca a far dal bóli dvintànd ad culōr durâ. Dòp avér-al prilâ, a s cava esénd prònt p'r èsar magnâ.
A secónda di pòst, la risèta la pōl cambiàr in na quàlc manéra, a gh'è qualchidòṅ ch'al dróa 'l alvadōr.
Al gnòc frit a s pōl magnàr-al da par lò ma 'l è incóra méj śuntàr-ag dla sfatlàda cuma salàm, cópa, murtadèla o parsùt.
Arcgnusimènt
La regiòṅ Emìglia-Rumàgna e 'l Ministēr dal pulìtichi agrìculi alimentàri e furestàli, cun la sètma reviśiòṅ, i aṅ mis al gnòc frit in d'l elènc di prudót agroalimentàr tradisiunài itagliàṅ (P.A.T.).
