Frederic Forrest

C'l artìcul chè 'l è scrit in Miranduléś

Fenimore Frederic Forrest, Jr., cgnusû méj cuma Frederic Forrest (Waxahachie, 23 ad Dicémbar dal 1936 - Santa Mònica, 23 ad Śugn dal 2023, a s lèś [ˈfrɛdərɪk ˈfɔːrɪst] in ingléś) 'l è stâ 'n atōr americàṅ, candidâ a 'l Prèmi Òscar in dal 1980 par The Rose in du 'l fava 'l autìsta e 'l amànt dla prutagunìsta Bette Midler.

Biugrafìa

Uriginàri dal Tèxas, Forrest al s davśìna a 'l mónd dla recitasiòṅ a la mità di an Ssanta par pò giràr di film impurtànt in di an Stanta cuma 'l thriller La conversazione (1974), cun prutagunìsta Gene Hackman, al western Missouri (1976), insém a Marlon Brando e a Jack Nicholson, al film ad scarésa It Lives Again (1978), séguit ad Baby Killer dal 1974, la pelìcula 'd guèra Apocalypse Now (1959), in dla part dal cōg Jay Hicks, e 'l drama muśicàł The Rose ch'al gh fruta na candidadùra a i Academy Award.

In di an Utànta al gira dū film cun Francis Ford Coppola: Un sogno lungo un giorno dal 1982, in dua 'l è prutagunìsta a fiànc ad Raúl Juliá e dla Nastassja Kinski, e 'l biugràfic Tucker - Un uomo e il suo sogno dal 1988 insém a Jeff Bridges e a Martin Landau. Sèmp'r in chi an lè al tōś part anc a Hammett - Indagine a Chinatown, in dla part dal scritōr Dashiell Hammett, a 'l drama The Prison, in còpia cun Samuel L. Jackson, e a i thriller Oltre ogni rischio, cun la Kelly McGillis, e Music Box - Prova d'accusa cun la Jessica Lange.

In séguit a 'l ém vist in dal pulisiésc Un giorno di ordinaria follia (1993), faghénd la part 'd un negusiànt rasìsta, in dal thriller Trauma (1993), in dla part dal dutōr Judd, in dal drama Il coraggioso (1997), dirèt e interpretâ par Johnny Depp, in dal thriller Colpevole d'innocenza (1999), a fiànc dl'Ashley Judd e 'd Tommy Lee Jones, e in The house next door (2002) in dua 'l à laurâ cun James Russo, la Theresa Russell, l'A.J. Cook e la Sean Young.

Fra i sò ùltim lavōr a 'rcurdém al biugràfic Tutti gli uomini del re (2006) cun Sean Penn e Jude Law.

Filmugrafìa

Culegamènt estéran

(IT) Filmugrafìa in s'l IMDb

Àtar prugèt

Wikiquote contiene citazioni di o su Frederic Forrest
Wikimedia Commons contiene file multimediali su Frederic Forrest