Vai al contenuto

Fred Ward

Da Wikipedia.

C'l artìcul chè 'l è scrit in Miranduléś Emiliàn

Lò cun la Madsen in na figùra dal film Rivelasiòṅ finàla (2001)


Freddie Joe Ward, cgnusû méj cuma Fred Ward (San Diego, 30 ad Dicémbar dal 1942 - Los Angeles, 8 ad Maǵ dal 2022, a s lèś [frɛd wɔːrd] in ingléś) 'l è stâ 'n atōr americàṅ, specialiśâ in rōi da caraterìsta.

Biugrafìa

Sò pàdar 'l éra 'n cherokee puòs cun di prubléma cun la giustìsia. Quànd al gh'iva tri an, sò màdar la s è divìśa da sò marè miténd-as c'n un giustràr.

Prima 'd dvintàr atōr, laurànd a soquànti série televiśìvi a gl'inìsi di an Stanta mént'r al s catàva in Itàglia incruśànd anc Roberto Rossellini, 'l iva fat al pùgil, śbragànd-'s al naś tré vòlti, al buscajōl in Alàska, al cōg, al custòdi e 'l militàr par l'aviasiòṅ di Stat Unî, studiànd pò recitasiòṅ a 'l HB Studio ad New York.

Al sò primi part a 'l cìnema i èṅ stadi qvéli 'd un camiunìsta in dla cumèdia Un nuovo anno, un nuovo amore dal 1974 cun la Sissy Spacek e qvéla 'd un cowboy in dal western Pazzo pazzo West! dal 1975, pelìcula cun Jeff Bridges, Donald Pleasence, Alan Arkin e Alex Rocco.

In séguit 'l à tòlt part a film impurtànt cuma Fuga da Alcatraz (1979), a fiànc ad Clint Eastwood, I guerrieri della palude silenziosa (1981), thriller ad guèra cun Keith Carradine, e 'l drama Silkwood (1983), in dua 'l à fat la part ad Morgan, un mémbar dal sindacâ culéga 'd lavōr dla Meryl Streep. Sèmp'r in di an Utànta 'l à recitâ anc in dal drama stòrig Uomini veri (1983), insém a Scott Glenn, Ed Harris e Dennis Quaid, in dla cumèdia sentimentàla Swing Shift - Tempo di swing (1984), cun prutagunìsta la Goldie Hawn e Kurt Russell, in dal film 'd asiòṅ Il mio nome è Remo Williams (1985), in dla part dal pulisiòt Samuel Makin, e in Saigon (1988) a fiànc ad Willem Dafoe.

In di an Nuànta a 'l arcurdém par la part 'd Earl Bassett in di film ad scarésa Tremors (1990) e Tremors 2: Aftershocks (1996) ma anc par dū film girâ cun Robert Altman (I protagonisti e America oggi) e p'r al pelìculi Ore contate (1990), thriller cun Dennis Hopper e la Jodie Foster, Una pallottola spuntata 33⅓ - L'insulto finale (1994), cun Leslie Nielsen, e Reazione a catena, thriller cun Keanu Reeves e Morgan Freeman.

In di an Dumìla 'l à tòlt part a Il corvo 3 - Salvation, a fiànc dla Kirsten Dunst, a la cumèdia Le avventure di Joe Dirt (2001), in dla part dal pàd'r ad David Spade, a 'l thriller Rivelazione finale (2001), cun la Virginia Madsen, a Via dall'incubo (2002), film da śgriśōr cun prutagunìsta la Jennifer Lopez, e a la cumèdia sentimentàla Tutta colpa dell'amore, in dua 'l à incruśâ la Reese Witherspoon e Patrick Dempsey.

In televiśiòṅ a 'l ém vist in telefìlm cuma L'incredibile Hulk, Grey's Anatomy, E.R. - Medici in prima linea e Leverage - Consulenze illegali.

'L è mòrt a stanta-nóṿ an, dòp ès'r-as spuśâ tré vòlti e avēr abû 'n fiōl cantànt e chitarìsta, Django Ward, da la sò secónda mujēr.

Filmugrafìa

Culegamènt estéran

Estratto da "https://eml.wikipedia.org/w/index.php?title=Fred_Ward&oldid=167140"